2 Peter 3 - Iñupiatun Mumiksat Uqalugiksuat

Atanġum Qaitqigñiaġniŋagun Unniqsuqłiiñ

¹ Piviuttaġirauruasii, ukua tuyuutit alġaigigaich tuyuunma ilivsiññun. Iluqaiññi tuyuutimni aŋalayyaŋniaqsaaŋagitka piḷuutaitchuakun isumaqaġniksrasi itqaaqtuutivlusi tamatkuniŋa uqautigiŋakkamnik.

² Itqaumatqugitka ilivsiññun uqaluich iŋiḷġaan uqautigiŋakkaŋich piḷuutaitchuat uqaqtiŋisa God-im, piraksriutiŋiḷḷu Atanipta Annaurriptalu tilirauruat qaisaŋich ilivsiññun.

³ Sivulliq uvva kaŋiqsiqqaagaksraqsi. Aqulliġñi uvluni kipakłiqsich iñuich iñukpalliġñiaqtut iñuusimiŋni aŋalatittuat pigiitchuanun kipiġniuġunmiŋnun. Kipautiginiaġaasi

⁴ uqaġlutiŋ, Jesus imña unniqsuqłiiŋaruaq qaitqigñiaġnivḷuni? Aasiimma sumiitpa? Christ-miuġuqqaaqtuatqaŋa tuqummata sunapayaaq allaŋŋuŋaitchuq, tamarra igliqtuq tainna qaŋapak, nunaqaŋa savaagulġataġniġman.

⁵ Piiguqsaaġirut uumiŋa. Iŋiḷġaan God uqallaŋman qiḷaiḷḷu nunalu savaaguŋarut. Nuna nunaġuŋaruq immamiñ immakullu,

⁶ immakuttauq-suli uliqpaktuakun nunaqqaaq suksraunġiqsauŋaruq. Taamna piiguqsaaġiŋagaat.

⁷ Tainnatuttauq qiḷaiḷḷu nunalu paŋmapak ittuat qaunaksriqaqtut uqaluagun God-im qakugukpan suksraunġiġumaaqługich igniġum. Iḷimaaqtaurut uvlumun taivrumuŋa piḷuusiqirauruat iñuich isivġiqsauviksrautaannun aasii suksraunġiqsaulutiŋ.

⁸ Aglaan piiguġnagu una atausiq iḷumun ittuaq, piviuttaġirauruasii. Ataniġmi uvluq atausiq ukiutun 1,000-tun ittuq, suli 1,000 ukiut atautchisun uvlutun.

⁹ Ataniq uimaiñŋitchuq taŋŋiisaqami unniqsuqłiiñmiñik, uimaiññivḷugu iñuich iḷaŋisa isummatigisuugaluaġaat. Aglaan ilaan qiñuirrutigaluaġaasi, qanuq ilaan kiñaliqaa suksraunġiqsautquŋitkaluaġaa, aglaan iluqaisa iñuich isumalitqiqugaluaġai piḷuunmiŋniñ.

¹⁰ Aglaan Uvlua Atanġum tikiññiaqtuq niġiiḷḷautiluni tigligayuktim qaġġisiatun. Taavrumani Uvlumi qiḷaich piiġñiaqtut qukiġñaqtuamik tusaġnaqaġlutiŋ, qiḷaŋmiittuat qaummatit igniġum augniaġai suksraunġiġḷugich, suli nuna supayaallu nunamiittuat ikirauniaqtut.

¹¹ Tamatkua iluqaġmiŋ suksraunġiġumaaġmata, qanutchiñik iñuusiqaqtuksraumavisi? Iñuusiqaqtuksrauniqsusi piḷuutaitchuanik god-iliqiruaniglu,

¹² utaqqiḷḷaan God-im Uvlua tikitchumaaqtuaq. Aasii pisuqtilaavsisun tikisinniaġasuaqsiuŋ taimña uvluq, tainnatun iñuuniaġlusi, qiḷaich ikuallagviksrautaat aasii suksraunġiġḷutiŋ, suli qaummatit auglugich uunnaum.

¹³ God aasii unniqsuqłiiŋammiuq nutauruanik qiḷaŋnik nutauruamiglu nunamik, kisimik iñuich nalaunŋaruat sivuġaani God-im iñuuviksraŋannik, aasii tamarra tamatkua utaqqiuġivut.

¹⁴ Tavraasii piviuttaġirauruasii, utaqqiuŋŋavsi taivrumiŋa Uvlumik, pisuqtilaavsisun piḷuutaiññiaġitchi pasirauyumiñaiḷḷusiḷu sivuġaani God-im akiḷḷiḷiqsuŋaiġḷugulu.

¹⁵ Isumalaaġutigisiuŋ Atanġum qimmaksaliyairrutaa utiġniksraŋannun piviksraqaquvlugich iñuich annaurrauniksramiŋnun. Taamnaptauq piviuttaġivlugu aniqatipta Paul aglaaġiŋammiraŋa God-im isumattutiksriñmani.

¹⁶ Tainna Paul uqaġuuruq tuyuutipayaamiñi tuyuqami taamna uqautigivlugu. Uqaluŋisa iḷaŋich siġḷiġnaqtut kaŋiqsiñiaġniŋat tuyuutiŋiñi, tamarraasii iñuich iḷitchiŋaitchuat tuniqsimalguitchuallu piuŋiḷanik sivunniuqługich piḷġusikaamiktuttauq allanik Bible uqaluŋiññik, aasii inmiŋnun suksraunġiqł̣utiŋ.

¹⁷ Aglaan ilivsi piviuttaġirauruasii iḷisimaaniŋakavsiuŋ taamna, qaunagisitchi asiñuurrausuŋiḷḷusi killukuaġutiŋisigun pitquraiḷaqtuat iñuich, aasii tuniqsimmataiŋiḷḷusi iḷisimanivsiññun God-im iḷumun ittuaŋanik.

¹⁸ Aglaan naglikkutaukkaqsisaiññaġitchi iḷitchuġimmaġiksisaiññaġlugulu Ataniqput Annaurrikpullu Jesus Christ. Ilaa nanġaqtauli paŋmapak isuitchuamullu. Amen.