2 Kings 9 - Iñupiatun Mumiksat Uqalugiksuat

Jehu Uqsruqtiġaat Umialliutivlugu Israel-mun

¹ Tavra God-im uqaqtaata Elisha-m ququaŋagaa iḷaŋat nutauruat God-im uqaqtiŋisa aasii uqallautivlugu, “Itqanaiyaġlutin aullaġiñ Ramoth Gilead-mun. Una misuġuqtuun olive uqsrua kaluġlugu,

² aasii taamuŋa tikitkuvich ivaġlugu Jehu, iġñiŋa Jehoshaphat-gum suli tutaalua Nimshi-m. Iñuiḷaamun inauramuutilugu iḷauraaŋiñiñ,

³ kuviḷuguasii una olive uqsrua niaquanun, aasii uqallaglutin, ‘Ataniq uqallaktuq ilaatagguuq uqsruqtiġaatin umialiguqłutin Israel-mun.’ Aasii tavraŋŋa aullaġlutin qilamiqsruġlutin.”

⁴ Tavraasii nutaġaq God-im uqaqtaa Ramoth Gilead-muŋaruq,

⁵ tavraniinŋaniqsut aŋuyaktit atanauraŋich kasimaruat. Uqallaktuq, “Aŋuun, piqaqtuŋauvva kiliktuunmik iliŋnun.” Jehu apiqsriruq, “Nalliqput uvva uqautiviuŋ?” “Ilvich, aŋuun,” kiugaa.

⁶ Tavraasii iluqatik isiqłutik iglumun, aasii nutauruam God-im uqaqtaata kuviñiġaa olive uqsrua Jehu-m niaquanun suli uqallakhuni ilaanun, “Ataniq, God-iŋa Israel, uqallaktuq: ‘Uqsruqtiġikpiñ umialiguqłutin iñugiramnun Israel-mun.

⁷ Tuquttaksraġigiñ qaukłiñ umialik, iġñiŋa Ahab, tatavsaġumagiga Jezebel iñuaqtaġiŋammagich uqaqtitka allallu kivgaġiratka.

⁸ Iluqaġmiŋ Ahab nanmiñiq qitunġaŋich tuquruksraurut; Piiġñiaġitka iluqaisa aŋutauruat qitunġaŋich, nutaqqallu utuqqanaaġuŋaruallu.

⁹ Aŋalanniaġitka qitunġaŋich piusiptun qitunġaŋiñik Israel-miut Umialgata Jeroboam-gum, iġñiŋata Nebat, suli Israel-miut Umialgata Baasha-m, iġñiŋata Ahijah.

¹⁰ Jezebel iḷuviqtauniaŋitchuq; timaa niġiñiaġaat qimmich nunaŋani Jezreel.’” Taamna pianigman, nutauruaq God-im uqaqtaa aniñiqsuq aasii qimakhuni.

¹¹ Jehu utiŋaruq atanaurauqatiimiñun, iliŋisa apiġigaat, “Nakuugaluaqpat sut? Susuksimava amna kinnaŋaaqtuaq iliŋniñ?” “Iḷisimarutin qanuġitilaaŋit iñuit tainnaittuat suli qanuq uqaġuutilaaŋit.” Jehu-m kiugaa.

¹² “Taamna iḷumun inŋitchuq!” kiugaat. “Uqallautisigut qanuq uqaqtilaaŋanik!” “Uqallautigaaŋa Atanigguuq uqallaktuq: ‘Uqsruqtiġikpiñ umialiguqłutin Israel-mun.’”

¹³ Tavrauvvaa atanaurauqatiiŋisa qaliġuatiŋ qaaŋanugniġaich tunmiġat Jehu-mun makitavigitquvlugich, nipauqłuktautit nivliqsiłługich, nipattut nipatuvlutiŋ, “Jehu umialiguqtuq!”

Israel-gum Umialiŋa Joram Tuqutauruq

^14-15 Tavraasii Jehu, iġñiŋa Jehoshaphat-gum suli tutaalua Nimshi-m, nalunaqtuakun sivunniuŋaruq akiḷḷiġivlugu Umialguruaq Joram, Jezreel-miittuaq, mavsiġiaŋavluni ikiḷiktinnami aŋuyakkamiŋ Ramoth Gilead-mi akiḷḷimiñin Umialik Hazael Syria-mi. (Joram-gum iluqatiglu Israel-guruat ikayuŋaraat Ramoth Gilead Hazael-miñ umialganiñ Syria-m). Tavra Jehu-m atanaurauqatiini uqallautiŋagaich, “Piqatauguvsi uvamnun, kiñaunnii aullaġnani Ramoth-miñ kiligiaġlugich iñuŋich Jezreel.”

¹⁶ Tavraasii ikuvluni aksraktuuramiñun aullaŋaruq Jezreel-mun. Joram-suli maminŋaił̣ł̣uni mavsiŋaruq, suli Umialik Ahaziah tavruŋaŋaruq, tautugiaqługu.

¹⁷ Munaqsrim nasiqruġviŋani Jezreel tautuŋagaich Jehu-lu iñuniḷu qaiḷġataviksuat. “Tautukkitka avva iñuich qairuat!” ququularuq. Joram-gum kiugaa, “Tilisiiñ tuttuqpagaqtimik iḷitchuġisaqtuġli aŋuyautairrutikun qaitilaaŋat.”

¹⁸ Tuttuqpagaqtim kasuqługu Jehu apiġigaa, “Umialik iḷisimasuktuq qaitilaaġnik avilaitqatauvlutin.” “Taamnaunnii nalugupku suŋitchuq!” Jehu-m kiugaa. “Aqumnugiñ.” Munaqsrim nasiqsruġvigmi kilikkaich, kiliksiyyaqtuam tikiñŋagaluaġaich aglaan utiqsaŋitchuq.

¹⁹ Allamik suli tilisiñiqsuq, apiqsriyyaqtuamik Jehu-mun tainnasuli apiqqunmik. Jehu-m kiuvsaalgitkaa, “Taamnaunnii nalugupku suŋitchuq! Aqumnugiñ.”

²⁰ Munaqsrim qulialgitkaa tilirauruaq tikitkaluaġnivḷugu aglaan utiqsaŋiññivḷugu. “Aullarriŋat avva aksraktuuraġaqtuaq suurimmaaŋisimaruq Jehu-tun, Nimshi-m iġñiŋatun!

²¹ “Itqanaiqsiuŋ aksraktuuraq,” Umialik Joram piraksriiruq. Itqanaiġmarruŋ, ilaalu Umialik Ahaziah-lu aullaqiruk, ilimiktigun aksraktuuraqallaavlutiŋ, kasuġiaqługu Jehu. Kasuġniġaak nunaŋani Naboth Jezreel-mium.

²² “Qaivisi tutqiutiqaqłusi?” Joram-gum apiġigaa. “Qanuġluni tutqiun illaniaqpa,” Jehu-m kiugaa, “piqaqtillutasuli aŋatkularuanik suli iñuuraqpaktuqtuanik aakavich Jezebel aullaġniiŋaraŋiñik?”

²³ “Ahaziah, pisaasuġmiaġutigaatigut!” Joram-gum nivliutigaa, aasii tunutiqamiuŋ aksraktuurani qimmaġmik isagutiruq.

²⁴ Jehu-m pisiksiñi iigutivlugu, siitilauramisun pisiksaġaa aasii pisikługu Joram tunuagun uummataa nalaułługu. Joram ulġumaruq aksraktuuramiñi,

²⁵ aasii Jehu-m uqallautigaa ikayuqtini Bidkar, “Timaa piḷugu igirruŋ nunaŋanun Naboth Jezreel-mium. Itqaumalugu usiaqsiqamnuk atautchikun aquagun Umialgum Joram aapaŋata Ahab, Ataniq uqallaŋaruq inna akiḷḷiġivlugu Ahab:

²⁶ ‘Tautuktatka iñuaqtauruat Naboth-lu iġñiŋiḷḷu unnugman. Aasii unniqsuqłiiruŋa tatavsaġukłutin tavrani nunami.’ Tavraasi Joram timaa piḷugu,” Jehu-m piraksriġaa ikayuqtini, “aasii igillugu nunaŋanun Naboth, taŋŋiqsaġlugu Atanġum unniqsuqłiisaa.”

Judah-m Umialiŋa Ahaziah Tuqutauruq

²⁷ Umialgum Ahaziah-m qiñiġniġaa nalautittuaq, aasii tavra qimaŋaruq aksraktuuramiñi, tuŋaanun nunaaqqiŋata Beth Haggan-gum, aquliraŋagaa Jehu-m. “Tuqunmisiuŋ!” Jehu-m piraksriġaich iñuni, aasii pisigniġaat aksraktuuraġaqtillugu apqunmi tuŋaanun Gur-m, qaniŋani nunaaqqiŋata Ibleam. Aglaan iglillavluni tikirruiññaŋaruq iniqpaŋanun Megiddo-m, tavrani aasii tuquvluni.

²⁸ Kivgaŋisa timaa utqutiŋagaat Jerusalem-mun aksraktuurakun aasii iḷuviqługu umialgich kiŋuniiŋisa iḷuviġviŋiñun David Iniqpaŋani.

²⁹ Ahaziah umialguŋaruq Judah-mi, qulit atausiŋanni (11th) ukiut, Joram, iġñiŋa Ahab, umialgupkaqługu Israel-mi.

Umialgum Aġnaat Jezebel Tuqutauruq

³⁰ Jehu tikiñŋaruq Jezreel-mun. Jezebel, tusaavluni suna pitilaaŋanik, irigiksaqłuni, nusaġiksaqłuniḷu, aasii makinŋaruq anmun igalaurakun itchuaqtuqłuni igluqpagmiñ.

³¹ Jehu isiġmiuġlu upkuaqpakun, saqłaŋaruq, “Zimri-ii! Iñuaŋaruatiin umialignik! Suliaqpich mauŋa?”

³² Jehu qunmun qiviaqhuni nivliŋaruq nipatuvluni, “Kiña uvamnun iḷauva?” Malġuk naakka piŋasut igluqpagmi munaqsrit qiviaġaat igalaurakun,

³³ aasii Jehu-m uqallautigaich, “Miḷuqsautisiuŋ!” Miḷuqsautiŋagaat, suli auŋa siqpałłiutivluni katchimullu tuttuqpagnullu. Jehu-m aasii tuttuqpagmiñik tunmalugiŋagaa timaa,

³⁴ isiŋaruq igluqpagmun, aasii niġivḷuni. Tavraasii uqallagataqtuq, “Pigiitchuaq aġnaq iḷuviġiaqsiuŋ; uvvaluami, ilaa umialguruam panigimmigaa,”

³⁵ Aglaan aŋutit iḷuviġiaqsaqtaŋata paqinŋitkaat tavra kisian niaqualu, sauniŋiḷḷu argaŋisa isigaŋisalu.

³⁶ Taamna quliaġiaġmarruŋ Jehu-mun, uqallaktuq, “Tavra tainna piñiaġnivḷugu Ataniq uqallaŋaruq, uqallakkami kivgamigun Elijah-kun: ‘Qimmich niġiñiaġaat Jezebel timaa nunaŋani Jezreel.

³⁷ Ilaata timaa siammayaaqtauniaġnivḷugu maqqutun, kia unnii iḷisaġiyumiñaiġḷugu.’”