2 Kings 8 - Iñupiatun Mumiksat Uqalugiksuat

Aġnaq Shunem-miu Utiqtuq

¹ Elisha-m uqallautiŋaraŋa aġnaq Shunem-miu, iġñiŋa iñuguqtitqiŋarani, Ataniġmun kaagnaq iḷipkaġniaġnivḷugu nunamun, tallimat malġugni ukiuni, suli aullautitquvlugich iḷani sumi allami iñuuniaġiaġlugich.

² Aġnam kamagivlugu iñua God-im aullautiŋagaich iḷani aasii iñuusaqtuaqhutiŋ Philistia-mi tallimat malġugni ukiuni.

³ Tallimat malġuuruat ukiut naanmata utiŋaruq Israel-mun nunaŋanniñ Philistia-ġmiut aasii ullakługu umialik igluni pitqigukługu suli nunani.

⁴ Umialgum uqaqatigilġatavigñiqsaŋa Gehazi, Elisha-m kivgaŋa; umialik iḷisimasukłuni Elisha-m aliuġnaqtuanik savaaŋiñik.

⁵ Gehazi uqaqtiłługu umialigmun qanuq Elisha-m tuqugaluaqtuaq iñuguktinŋanivḷugu, aġnam iŋiqsruġaa umialik iglumigullu nunamigullu. “Umialiik, uvva uuma aġnam iġñiŋa Elisha-m iñuguqtitqiŋaraŋa!”

⁶ Umialgum apiġimmani, nalupqinaiġaa Gehazi-m quliaqtuaŋa, tavraasii umialgum ququaqługu atanauraq uqallautiniġaa utiqtitquvlugich supayaat aġnam pigiraŋich, iḷalugich akiannik nauŋaruat nautchiiviŋiññi tallimat malġugni ukiuni aullaŋapkaqtillugu.

Elisha-lu Umialik Benhadad-lu Syria-ġmiu

⁷ Elisha Damascus-muŋaruq, Umialik Benhadad naŋiliġmiuġlu. Umialik kiligmanni iñua God-im Elisha qaiñivḷugu,

⁸ uqallautiŋagaa Hazael, iḷaŋat atanauraġmi, “Aitchuutiligaaġlutin God-im uqaqtaanun aasii uqallautilugu apiqsritqulugu Ataniġmun iłuaqsiñiaqtilaamnik uumaŋŋa naŋirrutimniñ.”

⁹ Tavra Hazael-gum usiḷḷiivḷugich malġukipiat (40) pikukturuat kakaktit qanusiḷimaanik suġautaġiksaaŋiñik Damascus-mi aasii Elisha-mugniqsuq. Hazael-gum kasuġamiuŋ, uqallautigaa, “Kivgaġiraqpich Umialik Benhadad-gum tiligaaŋa apiġitquvlutin iłuaqsiñiaqtilaamiñik naakka iłuaqsiñiaŋisilaamiñik naŋirrutimiñiñ.”

¹⁰ Elisha-m kiugaa, “Atanġum iḷitchuġipkaġaaŋa tuquniaġnivḷugu; aglaan ullaglugu uqallautisaġiñ iłuaqsiñiaġniḷugu.”

¹¹ Tavra Elisha-m takunnaŋagaa aasii Hazael qanuġviiġataqtillugu. Elisha qulviñagutillagruaŋaruq.

¹² “Summan imña qiavich, aŋuun?” Hazael-gum apiġigaa. “Iḷisimaruŋakii uvva piaġiipiaġataqtuakun aŋalanniaġisi iñuŋich Israel,” Elisha-m kiugaa. “Ikipkaġniaġisi sapukutaŋich, tuquġaġlugich nukatpiaŋich, anaullaġlugich miqłiqtuŋich tuqullugich, suli siŋaiyauruat aġnat agmaaġlugich narraaŋich.”

¹³ “Qanuġluŋa uvaŋa tainnatun kamanautiqaġniaqpik?” Hazael-gum apiġigaa. “Uvaŋa suuŋitchuŋa!” “Atanġum iḷisimapkaġaaŋa umialiguġniaġnivḷutin Syria-mi.” Elisha-m kiugaa.

¹⁴ Hazael utiġniqsuq Benhadad-mun, aasii Benhadad-gum apiġigaa, “Qanuqpa Elisha?” “Uqallautiraani iłuaqsiñiaġnivḷutin,” Hazael-gum kiugaa.

¹⁵ Aglaan uvlaakumman Hazael mapturuamik ukił̣haamik pivḷuni, kiñił̣ł̣ugu immamun aasii kiiñaŋanukługu umialgum, ipinniġaa. Hazael-gum inaŋiŋagaa Benhadad, umialigugłuni Syria-mi.

Judah-m Umialiŋa Jehoram

¹⁶ Tallimaŋanni ukiut umialguvluni Joram iġñiŋa Ahab-gum, Umialguvluni Israel-mi, Jehoram, iġñiŋa Jehoshaphat, umialiguŋaruq Judah-mi

¹⁷ ukiunikami iñuiññaq qulit malġuktun (32), aasii umialguvluni Jerusalem-mi tallimat piŋasuni ukiuni.

¹⁸ Nuliaqaŋaruq Ahab panianik, aasii tainnaptauq iḷaŋisitun Ahab-gum maliġuaŋagaich pigiitchuat piḷgusiŋich umialiŋisa Israel. Ilaa piḷuusiqiŋaruq akiḷḷiġivlugu Ataniq,

¹⁹ aglaan Atanġum suksraunġiġumaŋaiññiġaa Judah, unniqsuqłiiŋavlugu kivgani David kiŋuvaaŋich aŋalatchirausuuniaġnivḷugich Judah-mi.

²⁰ Jehoram umialgupkaqługu, Edom-gum paaqłaŋasiŋagaa Judah aasii ilimiktigun atanniqsimaviguqhutiŋ.

²¹ Tavraasii Jehoram aullaqiŋaruq iluqaisa atuqługich aksraktuurani Zair-mun, Edom-miuguruat tavrani avanŋagaat. Unnuakun ilaalu aksraktuuraŋisalu qaukłiŋich aŋuyaŋarut aasii tapiglautivlutiŋ annagniqsut, aasiiḷi aŋuyaktiŋich qimaavlutiŋ aimmivigmignun.

²² Edom aasii taimaŋŋaaglaan ilimigun itchuusiŋamaruq Judah-miñ. Taimaniptauq iniqpaŋa Libnah-m akiḷḷiqsruliŋamammiuq.

²³ Sunapayaaq Jehoram-gum savaaġiŋaraŋa agliusimaruq makpiġaani Inillaaniŋaruat Savaaŋisigun Umialiŋisa Judah.

²⁴ Jehoram tuquŋaruq aasii iḷuviqtauvluni umialguruat iḷuvviviŋanni David Iniqpaŋani, suli iġñiŋa Ahaziah umialiguqhuni aquagun.

Judah-m Umialiŋa Ahaziah

²⁵ Qulit malġuanni ukiut umialgumman Joram iġñiŋa Ahab-gum Israel-mi, Ahaziah iġñiŋa Jehoram-gum umialiguŋaruq Judah-mi

²⁶ ukiunikami iñuiññaq malġuktun (22), aasii umialguvluni Jerusalem-mi atausimi ukiumi. Aakaŋata atiŋa Athaliah, pania Umialgum Ahab-gum suli tutaalugivlugu Israel Umialiŋata Omri-m.

²⁷ Ahaziah nanmiñiq iḷaumman Umialigmun Ahab-mun katitinniġmigun, ilaa piḷuusiqiŋamaruq akiḷḷiġivlugu Ataniq, Ahab-gum qitunġaŋisa piḷġusiatitun.

²⁸ Umialik Ahaziah piqasiutiŋamaruq Umialigmun Joram-mun, Israel umialganun aŋuyaksaqługu Umialik Hazael Syria-ġmiu. Aŋuyaktit aŋuyaŋarut Ramoth Gilead-mi, aasii Joram ikiḷḷauŋaruq.

²⁹ Utiŋaruq iniqpaŋanun Jezreel mamitchiaġiaqługu ikiḷiñi, aasii Ahaziah-m tavruŋa takuŋaniġaa.