2 Kings 7 - Iñupiatun Mumiksat Uqalugiksuat

¹ Elisha-m kiugaa, “Naalaġniiñ Atanġum uqallautaanik! Innaiḷikpan uvlaaku tauqsiḷḷasiñiaqtutin Samaria-mi qulit pounds-tun uqumaisigiruanik palauvaksranik naakka iñuiññaq (20) pounds-tun uqumaisigiruanik barley-ñik akikaqtuamik atausimik qatiqtuamik manigmik.”

² Atanauram kiuŋagaa inna, “Qanuġluni piyumiñaqpa tainna—Ataniq unnii ilaa qaipkaiḷḷagumi qiḷaŋmiñ palauvaksranik tavrauvvaa!” “Tautugniaġiñ nalautitpan, aglaan niġiñiaŋitchutin iḷaŋanik unnii niqim,” Elisha-m kiugaa.

Syria-m Aŋuyaktiŋich Aullaarut

³ Sisamat iñuich naŋirrutiqaqtuat leprosy-mik siḷataaniinniqsut upkuaqpaŋisa Samaria-m, aasii avanmun uqaġniqsut, “Summan uvagut uvaniisiññaġniaqpisa tuqulġataġluta?

⁴ Sunnagniaŋitchugut iniqpagmukkaluaġupta, kaaksiulutakii tuquniaġmiugut tavrani; aglaan uvaniisiññaġupta, tuquniaġmiuguttauq; Syria-ġmiut nullaummivianukta; tuqunniaġaluaġuŋnaġaatigut, iḷaanniḷuunnii iñuupkaġniaġaatigut.”

⁵ Tavraasii, tanuġaaksimmiuġlu, Syria-ġmiut nullaummivianuŋarut, tikiññamiŋ aglaan iñuiññiqsuq tavrani.

⁶ Atanġum Syria-ġmiut tusaapkaŋamagaich iñugiakpaktuatun aŋuyaktinik, tuttuqpagaqtuanik suli aksraktuuraqaqłutiŋ; Syria-ġmiut isumaŋarut umialgat Israel ikayuqsaġasugalugich Hit-miuguruaniglu Egypt-gumlu umialiŋich aŋuyaktiŋiḷḷu aŋuyaksaqługich iliŋich.

⁷ Tavraasii taaptumani anaqami Syrian-gich pigruŋamarut iñuggutitiŋ annautisaqługich, unirruiññaqługich tupitiŋ, tuttuqpatiŋ, suli kakaktitiŋ, unił̣ł̣ugu nullaummiviktiŋ tainnaiññaq.

⁸ Sisamauruat iñuich tikiññamiŋ isuanun nullaummiviuruam, tupiġmukhutiŋ, niġimarut imiqhutiglu tavrani, qatiqtuallu kaviqsuallu maniich pivḷugich suli annuġaat paqittatiŋ, aasii aullaqhutiŋ iriqługich; tavraasii utiqhutiŋ, isilgitchut allamun tupiġmun, aasii tainnasuli piḷgił̣ł̣utiŋ piusimiktun.

⁹ Tavra avanmun uqautimarut, “Tainnauvva piruksrauŋitchugut! Tusaayugaalluatanik uvva piqaqtugut, uvaptinnułhiñaq piruksrauŋitchugut. Utaqqigaluaġupta uvlaaġataqtillugu, tatavsaqtauniaqtugut. Akkupak aullaġluta kiligiaġlavut umialgum atanauraŋich!”

¹⁰ Tavraasii aullaqhutiŋ Syria-ġmiut nullaummivianniñ, Samaria-mutqigniqsut, aasii ququulavlugich upkuaqpagnik munaqsrit, uqallautivlugich: “Syria-ġmiut nullaummiviannuktuagut aasii tautuŋitchugut naakkaunnii tusaaŋitchugut iñugnik; tuttuqpaiḷḷu kakaktillu pituiŋaiñmiut, suli tupqich irrusimiktun ittut Syria-ġmiut uniñmagich.”

¹¹ Munaqsrit quliaŋagaich tusaayugaaqtatiŋ, aasii iḷitchuġiŋarut igluqpagmi.

¹² Unnuaŋagaluaqtillugu, umialik makiłłuni siñigvigmiñiñ uqallaŋaruq atanauramiñun, “Uqallautiniaġivsi susuktilaaŋiñik Syria-ġmiut! Iḷisimarut maani kaagnaq iḷiŋatilaaŋanik, tavraasii uniññiġaat nullaummiviktiŋ iriġiaqhutiŋ avuŋa nunamun. Isumavlutiŋ aullaġniaġnivḷuta iniqpagmiñ niqiksraqsiuġiaġluta, aasii iliŋisa pisaġisukłuta iñuuluta suli pisaġilugu iniqpak.”

¹³ Iḷaŋata atanaurat uqallautigaat, “Iñuich marra maani iniqpagmi qanuqsausiiññamun iḷiŋammiruat, taipkunatitun tuquġaaniktuatun. Tainnamik aullaqtitchiiñ aŋutinik tallimanik tuttuqpaligaaġlugi kisiŋŋuqtauruanik iniqpagmi, iḷitchuġiyumaugut sutilaaŋiñik.”

¹⁴ Aullaqtuksranik iñuksraqłutiŋ, aasii umialgum tiligai malġugnik aksraktuuraligaaġlugi piraksriqł̣ugiḷu iḷitchuġiyyaquvlugi suŋatilaaŋiññik Syria-ġmiut aŋuyaktiŋi.

¹⁵ Aŋutit aullaqtitaŋich Jordan-muaglaaġniqsut, aasii tamarra apqutini tautukkaich annuġaat suli suġautat Syria-ġmiut unisiqtaŋich qimaakamiŋ. Tavraasii utiqhutiŋ kiligiaqługu umialik.

¹⁶ Iñuŋich Samaria-m aullaqhutiŋ suġauttaiyaġniġaat Syria-ġmiut nullaummiviŋat. Suli Atanġum uqallausiatun, qulit pounds-tun uqumaisigiruaq palauvaksraġiksaaq naakka iñuiññaq-tun (20) uqumaisigiruaq barley tuniñiaġnivḷugu atausiuramik qatiqtuamik manigmik.

¹⁷ Tavraasii umialgata Israel munaqsriḷiŋaniġaa iniqpaum paaŋa atanauramik ikayuqtigisuuramiñik ilaata. Taamna atanauraq tunmalugivlugu tuqunniġaat iñuich, Elisha-m uqallausiatun umialgum ullaŋammani.

¹⁸ Elisha-m uqallautiŋaraŋa umialik tainnaiḷikpan uvluq uvlaakukpan qulit pounds-tun uqumaisigiruaq palauvaksraġiksaaq naakka iñuiññaq (20) pounds-tun uqumaisigiruaq barley tuniḷḷaniaġnivḷugu Samaria-mi atausimik qatiqtuamik manigmik.

¹⁹ Atanauram kiuŋaraa inna, “Qanuġluni piyumiñaqpa tainna—Ataniq unnii ilaa qaipkaiḷḷagumi qiḷaŋmiñ palauvaksranik tavrauvvaa!” Aasii Elisha-m kiuŋaraa, “Tautugniaġiñ nalautitpan, aglaan niġiñiaŋitchutin iḷaŋanik unnii niqim.”

²⁰ Tavraasii tainnapiallak nalautinŋaruq ilaanun—ilaa tuquvluni, tunmalugivlugu iñuich iniqpaum paaŋani.