2 Kings 6 - Iñupiatun Mumiksat Uqalugiksuat

Isagmarruŋ Anauttam Sikua

¹ Uvlut iḷaŋanni qavsiuvlutiŋ uqaqtauruat God-mun Elisha-m qaunagiraŋich uqaġniqsut Elisha-mun, “Inikput uvva inikitpaitchuq!

² Aullaqtitchigut Jordan-mun aasii kivluiḷuta napaaqtunik, nappaiyumaugut iniksraptinnik taikani.” “Kiami,” Elisha-m kiugaich.

³ Iḷaŋata katchuŋaił̣ł̣uni maliquŋagaa. “Ii, piñiaqtuŋa,” Elisha-m kiugaa,

⁴ aasii atautchikun aullaqivlutiŋ. Tikiññamiŋ Jordan-mun, kivluiñagutirut napaaqtunik.

⁵ Iḷaŋat kivluiḷḷaġmi napaaqtumik, tavraŋŋatchiaq savił̣haq anauttaŋata sikua immamun kataktuq. “Suniaqpik aasii, aŋuun?” uqallaktuq Elisha-mun. “Attaqsiagummiruaq anauttaq!”

⁶ “Suqpanun katakpa?” Elisha-m apiġigaa. Aŋutim tikkuaġutigaa inaanik, aasii Elisha kipisivḷuni qirugmik, miḷuqsautimagaa immamun, aasii anauttam sikua puktallaŋaruq.

⁷ “Isaguŋ,” piraksriġaa, aasii aŋutim isaŋagaa tiguvluguasii.

Syria-m Aŋuyaktiŋich Akiiḷiraurut

⁸ Umialgata Syria-m aŋuyaksaŋagaa Israel. Uqaqatigivlugich atanaurani naliġaŋaruq inillagviksramignik.

⁹ Aglaan Elisha-m kiliktinŋagaa umialga Israel, qaninŋaquŋił̣ł̣ugu taamna ini, Syrian-gitkii amma utaqqirut iriqsimavlutiŋ.

¹⁰ Tavraasii umialgata Israel kiligniġaich iñuich tavrani iñuuniaqtuat, aasii nipuŋaisaaŋarut. Qavsiiqsuaqłutiŋ tainna piŋaniqsut.

¹¹ Syria-m umialiŋat atqunaq isummaaŋiñŋaruq taaptumuuna; ququaŋagaich atanaurani aasii apiġivlugich, “Nalliqsiimña umialganuktuqpa Israel?”

¹² Iḷaŋata kiumagaa, “Nalliqput unnii piŋitchuq, Umialiik. Uqaqtauruam God-mun Elisha-m uqallautisuugaa umialga Israel uqalugnik nalunaqtuamiunnii uqaġaluaqavich inauraġni.”

¹³ “Iḷitchuġisaqtuġitchi sumiinmagaan,” umialik piraksriiruq, “aasii pisaġiniaġiga.” Uqallautimmanni Elisha Dothan-miinnivḷugu,

¹⁴ aullaqtitchiŋaruq inugiaktuanik tuttuqpagaqtuanik suli aksraktuuranik. Tikiññiġaat nunaaqqiq unnuami aasii avałługu.

¹⁵ Uvlaatchaurami Elisha-m kivgaŋa makinŋaruq, anivḷuni iglumiñ, aasii tautukługich Syria-m aŋuyaktiŋich tuttuqpaŋiḷḷu suli aksraktuuraŋich avanŋaniġaat nunaaqqiq. Utiqhuni Elisha-mun upinniqsuq, “Qanuqsaġviiġñiġaatiguk, aŋuun! Suniaqpiñuk?”

¹⁶ “Iqsiñak,” Elisha-m kiugaa. “Piqatiqaqtuguk iñugiałhaaqtuanik iliŋiññiñ.”

¹⁷ Tavraasii aŋaiyyuruq, “Atanġuruatiin, agmakkik irraŋik tautullasiḷugu!” Atanġum kiuŋagaa aŋaiyyutaa, aasii Elisha-m kivgaŋa aaġluqhuni tautukkaa qimiqqam maniñaaŋa matuŋaniqsuq tuttuqpagniglu aksraktuuraniglu igniġuruanik avałługu Elisha.

¹⁸ Syria-m aŋuyaktiŋisa ullaksaġmanni, Elisha aŋaiyyuruq, “Atanġuruatiin, anaukkich makua aŋutit ayaupkaġlugich!” Atanġum kiumagaa aŋaiyyutaa aasii anauvlugich ayaupkaqługich.

¹⁹ Tavraasii Elisha-m ullakługich uqallautigaich, “Killuġmiuvva apqunmiittusi; una nunaaqqiq ivaŋitkiksi. Maliġisiŋa, aullatiniaġivsi iñugmun ullaguktavsiññun.” Aasii aullatiŋagaich Samaria-mun.

²⁰ Tikisanipqauraqamiŋ iniqpagmun, Elisha aŋaiyyuruq, “Agmakkich iriŋich, Ataniiq, aasii tautullasiḷugich.” Atanġum kiugaa aŋaiyyutaa; tautullasitqikkaich, aasii tavra iḷitchuġirut Samaria-miitilaamignik.

²¹ Umialgata Israel tautukkamigich Syria-ġmiut, apiġigaa Elisha, “Tuquttaġlagich ukua, aŋuun? Tuquttaġlagich?”

²² “Naumi,” kiugaa. “Aŋuyaktit unnii pisaġiratin aŋuyakkavich tuquttaġniaŋitkitin. Niġipkakkich suli imiqtillugich, aasii utiġumaut umialimignun.”

²³ Tavraasii umialgata Israel niġipkaŋaniġaich; aasii niġianiŋmata imianigmatalu, aullaqtinŋagaich utiqtiłługich umialganun Syria-m. Tavraŋŋaaglaan aasii Syria-ġmiut nunaŋannullaiŋaniqsut pisaġinialalugich Israel-guruat.

Avałługu Pisaġimmarruŋ Samaria

²⁴ Qakugulimman aquvatigun Syria-m Umialiŋata Benhadad-gum, aullatiŋaniġaich iluqaisa aŋuyaktini akisaqługu Israel suli avatiłługu iniqpaŋa Samaria-m.

²⁵ Avanŋammatiŋ niqaiḷḷiuliqpaŋamarut iniqpagmi kakaktim niaqua akisutigiliqsaallaan sisamakipiatun (80) qatiqtuat maniurat, suli uqumaisigiruaq avvaŋatun pound-gum tiŋmiam anaŋa akisutilaanikhuni tallimat qatiqtuat maniurat.

²⁶ Umialga Israel pisuaġuraaqtillugu iniqpaum katchiŋata qaaŋagun aġnaq ququulaŋaruq, “Ikayuŋŋa, Umialiik!”

²⁷ Ilaata kiugaa, “Atanġum ikayuġumiñaitpatin, sumik ikayuġumiñaqpigiñ? Palauvaksrautiqaqpik naakka wine-mik?

²⁸ Sumik isumaaluutiqaqtuatin?” Aġnam kiugaa, “Ikpaksraaq uvva aġnam uqallautiraani niġiḷakpurguuq miqłiqtuġa, aasii niġiḷuguli ilaata miqłiqtuŋa uvlaakukpan.

²⁹ Tavraasii igavlugu iġñiġa niġiraqput. Uvlaakumman uqallautigapku niġisukługu iġñiŋa, aglaan iriŋaniġaa!”

³⁰ Tusaagami taaptumiŋa, umialgum aligaŋagaich annuġaani isummaaŋitpakhuni, suli iñuich qanimi ittuat katchimun tautullaniġaat annuġaaqtuŋatilaaŋanik miitchugnik ataatigun atuqtaġmi.

³¹ Uqallaŋaruq, “God-imtuq anauluŋa tuqutiġliŋa Elisha niaquiqsauŋitpan uvluq taamna nuŋugaluaqtinnagu!”

³² Tilisiŋaruq aasii aitquvlugu Elisha. Elisha aimmiuraaġniqsuq piqatigivlugich utuqqanaat isiqattaaŋaruat. Umialgum kiliksiyyaqtiŋa tikitkaluaqtinnagu, Elisha-m uqallautimagaich utuqqanaat, “Taamamna amma iñuaqtuqti tilisiŋaruq tuqutchaqtuquvluŋa! Tikitpan mauŋa, umiglugu upkuaq isiqsaiḷiyumagiksi. Umialgum samma ilaata aquliraġniaġaa.”

³³ Uqaqtillugusuli, kiliksiyyaqtuaq tikisaaqtuq. Aasii umialik uqallaktuq, “Isumaalugnaqpak marra qaiŋaruq Ataniġmiñ! Susugluŋa utaqqiuġniaqpigu Ataniq?”