2 Kings 5 - Iñupiatun Mumiksat Uqalugiksuat

Naaman Iłuaqsirauruq

¹ Naaman, qaukłiat Syria-m aŋuyaktiŋisa, qutchiksuaġivlugu qiksigisuuniġaat umialgata Syria-m, qanukkii Naaman-kun Atanġum akimapkaŋamagaich Syria-ġmiut. Suaŋaruaguŋaruq aŋuyakti, aglaan naŋirrutiqaŋaruq kiḷḷiġruaqaqłuni.

² Aŋuyalgiññamirruŋ Israel, Syria-ġmiut aullaurriŋarut aġnaiyaamik Israel-miumik, kivgaġuŋaruaq Naaman aġnaanun.

³ Uvlut iḷaŋanni uqallautimagaa savautirani aġnaq, “Qaukłiġa uqaqtiŋanuquyumagaluaġiga Samaria-miittuamun! Mamititkayaġaa naŋirrutaaniñ.”

⁴ Naaman tusaagami taaptumiŋa, uqautiyyaŋagaa umialik aġnaiyaam uqaluanik.

⁵ Umialgum uqallautiŋagaa, “Aullaġiñ umialganun Israel aasii una tuyuutiga ilaanuutilugu.” Tavra Naaman aullaqiŋaruq, maniḷigaaqłuni 30,000 qatiqtuanik manigñik, suli 6,000 kaviqsuanik manigñik, suli qulinik qiññaġiksuanik annuġaatqiutiksranik.

⁶ Tuyuun tigumiaqtaŋa inna aglaqaŋaruq: “Uuma tuyuutim iḷitchuġipkaġliuŋ aŋuyaktigma aullarriŋat Naaman. Iliŋnun mamititqugitka kiḷḷiġruaŋi.”

⁷ Umialgata Israel taiguaqamiuŋ tuyuun, aligaŋagaich annuġaani qanuqsausiipiallakhuni aasii uqaqłuni, “Qanuġluni umialga Syria-m isumayumiñaqpa uvamnun mamititchumiñaġnasugilugu una aŋun? God-iunasugivaŋaaptuma, suaŋŋatiqaġluŋa iñuggunmun suli tuqqunmun? Nalunaitchuq qanaaġutiksraqsiuqsiññaqtuq uvamnun!”

⁸ Uqaqtaa God-im Elisha tusaagami uqalugmik, kiligiaqtinŋagaa umialik: “Summan imña annuġaatin aligaqpigich? Tilliuŋ aŋun uvamnuqulugu, aasii iḷitchuġipkaġumagiga God-im uqaqtiŋa Israel-miitilaaŋanik!”

⁹ Tavraasii Naaman tuttuqpaligaaqłuni aksraktuuraniglu nutqaŋaruq paaŋanun Elisha-m igluata.

¹⁰ Elisha-m kivgani tiliŋagaa uqallautisaqtuquvlugu iqaġiyyaqulugu ilaanik tallimat malġuktun Jordan River-mi, aasii kiḷḷiġruaŋich iluqatik mamitauniaqtut.

¹¹ Aglaan Naaman aullaniqł̣aŋaruq uumitchakhuni, “Isumalgiññiqsuŋa aniḷuni ullagluŋa, aŋaiyyuniaġnasugilugu Ataniġmun God-imiñun, isaaġutilugu argani naŋirrutimnun aasii iłuaqsiḷuŋa!

¹² Uvvasuli, kuuŋik Abana-m suli Pharper-m, Damascus-mi, nakuułhaaŋitpak kuuŋaniñ Israel? Iqaġiyumiñaġaluaqtuŋa taapkugnagni aasii iłuaqsirauluŋa!” Tavraasii Naaman aullaniqł̣aŋaruq uumitchakhuni.

¹³ Kivgaŋisa ullakługu uqallautigaat, “Aŋuun, uqaqtaata God-im uqallautiŋakpatin sumik siġġaġnaqtuamik, piñayaġaluaġiñ. Tavra summan iqaġiyumiñaitpich iliŋnik, uqallausiatun, aasii mamillutin?”

¹⁴ Tavraasii Naaman saaviłłuni Jordan-mun kiñił̣ł̣uni ilimiñik tallimat malġugni, Elisha-m piraksriutaatun, tavraasii iluqaġmi iłuaqsivḷuni. Uviñiŋa irrusiñiŋaruq miqłiqtum uviñiŋatun.

¹⁵ Utiqhuni ullagniġaa Elisha piqatigivlugich iluqaisa iñuni aasii uqallakhuni, “Tavra iḷitchuġiruŋa allamik god-aisilaaŋanik aglaan God-iŋa Israel; tavraasii, aŋuun, akuqtuġuŋ aitchuutiga.”

¹⁶ Elisha-m kiugaa, “Iñuuruakun Atanikun savautirapkun, unniqsuqłiiruŋa akuqtuiñiaŋitchuŋa aitchuunmik.” Naaman-gum aitchuġupiaġaluaġaa, aglaan akuqtuġuŋitkaa.

¹⁷ Tavra aasii Naaman uqallaktuq, “Akuqtuġumiñaitkupku aitchuutiga, aggirriḷaŋa malġuk qimuktik usiaŋigñik nunamik, qanukkii uvva tavraŋŋaaglaan aitchuiraġaġniaŋitchuŋa ikipkautitigun allanun god-inun aglaan Ataniġmun.

¹⁸ Tavraasii Atanġumtuq suliqutigiŋaiġḷiŋa piqasiġupku umialiga aŋaiyyuvianun Rimmon, god-iŋanun Syria-m, suli aŋaiyyuvigilugu. Iḷumutun Atanġum suliqutigiŋaiġñiaġaaŋa!”

¹⁹ “Aullaġiñ tutqiutiqaġlutin,” Elisha uqallaktuq. Aasii Naaman aullaqhuni. Ayuuŋaisillugusuli,

²⁰ Elisha-m kivgaŋa Gehazi uqallakhuni, “Umialigma aullaqtitkaa Naaman sumik akiḷiiguraġaluaġnagu! Akuqtuġliuŋ imma Syria-ġmium aitchuutaa ilimiñun. Iñuuruakun Atanikun malikataġlugu sumik piksraġniaqtuŋa ilaaniñ.”

²¹ Malikataġniġaa Naaman. Naaman-gum tautukkamiuŋ aŋun aqpamik qaiḷġataviksuaq, atqaġniqsuq aksraktuuramiñiñ, aasii apiġivlugu, “Nakuugaluaqpich?”

²² “Ii,” Gehazi-m kiugaa. “Aglaan uvva umialigma tiligaaŋa uqallautitquvlutin tikiññivḷugik malġuk iḷauruak God-im uqaqtiŋiññi qimiqqaniñ nunaŋaniñ Ephraim, aasii uvva aitchuqugaik 3,000-nik qatiqtuanik manigñik suli malġuiñik annuġaatqiutiksranik.”

²³ “Piksraġiñ 6,000-nik qatiqtuanik manigñik,” Naaman-gum kiugaa. Pitqupiaġataqługich, qiḷiġutivlugich qatiqtuat maniich malġugnun puugnun, aitchuqługik malġuiñik annuġaatqiutinik kivgagni, aasii aullaqtinniġaik sivuani Gehazi-m.

²⁴ Tikiññamiŋ qimiqqamun Elisha-m inaanun, Gehazi-m tigumiaqługik malġuk puuk itqutigaik iglumun. Tavraasii aullaqtiłługik Naaman kivgaŋik.

²⁵ Isiġman iglumun, Elisha-m apiġigaa, “Sumiittuatin?” “Aa, sumuŋaitchuŋa aŋuun,” kiugaa.

²⁶ Elisha aglaan uqallaktuq, “Taamaniinŋaitpik imña ilitqusimñi aŋun atqaġman aksraktuuramiñiñ kasuġiaqhutin? Piviksraq nalautinŋaitchuq akuqtuiyumiñaġluni manigñiglu annuġaaniglu, olive-giḷḷu nautchiiviŋiñik suli siiġñanun nautchiivigñik, imnaiñiglu suli pamiqsaanik, kivgakkaluanik unnii!

²⁷ Tavraasii Naaman-gum naŋirrutaa iliŋnugniaqtuq, aasii ilviḷḷu kiŋuvaatillu piginiaġaat taimuŋa!” Gehazi aasii aullaqami, naŋirrutiniŋaruq—uviñiŋa qatiqtigiliŋaniqsuq aputitun.