2 Kings 3 - Iñupiatun Mumiksat Uqalugiksuat

Aŋuyagmagnik Israel-lu Moab-lu

¹ Akimiaq piŋasuni (18th) ukiuni umialgumman Jehoshaphat Judah-mi, Joram iġñiŋa Ahab-gum umialiguŋaruq Israel-mi, aasii umialguvluni Samaria-mi qulit malġugni (12) ukiuni.

² Piḷuusiqiŋaniqsuq paaqłaklugu Ataniq, aglaan aapamisun pigiiḷḷiqitigiŋaił̣ł̣uni naakka aakamisun Jezebel-tun; ulġunŋaniġaa aapami iñuuraqpaŋa aŋaiyyuviḷiaŋa Baal-mun.

³ Naakka-suli Umialik Jeroboam-tun, iġñiŋa Nebat-gum sivumiñi, Israel-miuguruat piḷuusiqipkaŋamagaich nutqautaił̣ł̣ugi.

⁴ Umialik Mesha Moab-mi pamiqsaisuumaruq imnaiñik, aasii ukiutuaġaġimman akiḷiġuumagaa akiḷiaksramik umialga Israel 100,000-tun iñugiaktigiruanik imnaiyaanik suli mitquŋiññik 100,000-tun aŋusalluŋiññin imnaich.

⁵ Umialik Ahab aglaan tuqumman, Mesha-m paaqłaŋasiŋagaa Israel.

⁶ Umialik Joram aullaqłuni Samaria-miñ katinŋagaich aŋuyaktini.

⁷ Kiliktitchaqtuŋaniġaa Umialik Jehoshaphat Judah-mi: “umialgata Moab paaqłakkaaŋa; piqasiġumiñaqpiŋa aŋuyagiaġupku?” “Piñiaqtuŋa,” Umialik Jehoshaphat-gum kiugaa. “Qanutun ikayuqtigiyumiñaġiŋma, suli iñutkalu tuttuqpatkalu.

⁸ Suqpatikuaġluta aŋuyagiaġniaqpisa?” “Sivisuruakun nunagluktuaŋaguaġniaqtugut Edom,” Joram-gum kiugaa.

⁹ Tavra Umialik Joram-lu umialiŋigḷu Judah-m Edom-lu aullaqiniqsut. Iglauganikłutiŋ tallimat malġugni uvluni, imġiġutiŋarut, imiksraiqł̣utiŋ iñuŋillu pamiqsaallu niġrutiŋich.

¹⁰ “Qanuġumiñaiqsugut!” Umialik Joram nivliqsuq. “Atanġum piŋasuuvluta atautchimuktitpatigut pisaġitquvluta umialganun Moab!”

¹¹ Umialik Jehoshaphat apiqsriruq, “God-im uqaqtaanik iñuqaqpa maani apiqsrisiriksraptinnik Ataniġmun?” Atanauraŋisa iḷaŋata Umialik Joram-gum kiugaat, “Elisha iġñiŋa Shaphat maaniittuq. Elijah-m ikayuqtigisuuŋaraŋa.”

¹² “Iḷumutun God-mun uqaqtiuruq,” Umialik Jehoshaphat uqallaktuq. Tavraasii piŋasut umialgich ullaŋagaat Elisha.

¹³ “Summan ikayuqtaksraġivigiñ?” Elisha-m uqallautigaa umialga Israel. “Apiġiyyakkich taipkua god-im uqaqtiŋich aapaviḷḷu aakaviḷḷu uqaurrigisuuraŋich.” “Naumi!” Joram-gum kiugaa. “Atanġum ilaata atautchimuktinŋagaatigut piŋasuuruagut umialgich pisaġitquvluta umialganun Moab.”

¹⁴ Elisha-m kiugaich, “Iñuuruakun Atanikun, savautirapkun, uqallaktuŋa suqutigiyumiñaipiaġaluaġikpin qiksigiŋisuaġupku iḷaksi, umialga Judah-m Umialik Jehoshaphat.

¹⁵ Atuqtuuraqtimik qaipkaisitchi uvamnun.” Atuqtuuraqti atuqtuurauraaqtillugu nuqaqtiligmiñik, suaŋŋataa Atanġum qaiŋaruq Elisha-mun,

¹⁶ aasii uqallaqhuni, “Ataniq inna uqallaktuq: ‘Nivagitchi iḷuqsranik iñugiaktuanik iluqaagun mattumuuna natiġnakun.

¹⁷ Tautugniaŋitkaluaqtusi sialugmik naakka anuġimik, manna kuuġayaaq siḷivinniaqtuq immamik, ilivsiññullu, pamiqsaavsiññullu, suli niġrutisi iḷaŋaniñ imiksraqaġniaqtut.’”

¹⁸ Suli Elisha uqavsaaqtuq, “Aglaan uvva taamna siġġaġnaitchuq Ataniġmun, savakkumiuŋ; akimmatiqaqtinniaġmigaasi Moab-miuguruaniñ.

¹⁹ Akiiḷiñiaġisi qiñiyunaqtuat avaluliqsuŋaruat iniqpaŋich; kivluġlugiḷḷu iluqaisa napaaqtulluataŋich, miliktuġlugich nivviaŋich, suli suksraunġiġḷugich naurisuqtuat nunaŋich matuuġlugich uyaġagnik.”

²⁰ Uvlaakumman uvlaami, aitchuivikaaŋat nalautinmiuġlu, imaq maqirraqsiruq tuŋaaniñ Edom aasii matuvlugu nuna.

²¹ Moab-miut tusaagamiŋ piŋasut umialgich aŋuyagiaġnivḷugich, iluqaġmiŋ aŋutit piyumiñapayaaqtuat, utuqqauruaniñ nutauniqsranun, inillaktinniġaich nunam killiŋanun.

²² Uvlaatchaurami makinnamiŋ, siqiñiq qaummatinniqsuq immamun, kaviqsuatun auktun qiññanikługu.

²³ “Auk marra!” upittut. “Piŋasuuruat umialgich avanmun aŋuyakhutik tuquutiŋamarut! Aullaġluta suġautaiyaġiaġlakput nullaummiviat!”

²⁴ Aglaan tikiñmata inaannun, Israel-miut pigruġviginiġaich aasii uŋułługich utinmun. Israel-miut aquatigun malikataŋaġaich, tuquttaqługich Moab-miut

²⁵ suli siqumiłługich iniqpaŋich. Nalautchaaqamisigik nautchiiviŋich, Israel-miupayaam miluqsautiraġigaich uyaġaich tamauŋa nunaŋat matulġataqługu; suli kivviiŋaniġaich nivviaŋich, kivluqługiḷḷu napaaqtulluataŋich. Tavraasii kisiŋŋuġataqługu iniqpak Kir Heres, aasii illuutitaqtit avałługu aŋuyaŋagaat.

²⁶ Umialga Moab-gum iḷitchuġikami akiisitauruiññaaqsitilaamiñik aŋuyaktamiñiñ, 700-tun iñugiaktigiruanik savikpagaqtinik piqasiqł̣uni tapiglautisaġaluaġniqsuq umialiŋagun Edom, aglaan piyumiñaiñŋaruq.

²⁷ Tavraasii aŋayukłiq iġñini pivḷugu, aqumigun umialiguqtuksrautikkaluaq, ikipkautikun aitchuutigiŋaniġaa iniqpaum katchiŋani god-iŋanun Moab. Israel-miuguruat tatamaalaliqhutiŋ iniqpagmiñ utiġniqsut nanmiñiq nunamignun.