2 Kings 21 - Iñupiatun Mumiksat Uqalugiksuat

Judah-m Umialiŋa Manasseh

¹ Manasseh ukiuqtutigiŋaruq qulit malġuktun (12) umialiguqami Judah-mi, aasii umialguvluni Jerusalem-mi malġukipiaq akimiaq (55) ukiuni. Aakagiŋagaa Hephzibah.

² Tuvraqługich piḷġusipałłuŋich nunaqpauruat Atanġum uŋuttaŋich nunamiñ iñuni sivunmugmata, Manasseh piḷuksiŋaruq paaqłakługu Ataniq.

³ Nappatqiŋagaich god-iŋŋuat nanġaiviich aapami Hezekiah-m siquminŋaraŋich; ikipkaiviḷiuqhuni nanġaiviksramik Baal-mun suli iñuuraqpalivḷuni god-iŋŋuamik Asherah-mik napaqutamik, Israel Umialgata Ahab-gum piḷġusiatun. Manasseh nanġaisuuŋamammiuq uvluġianik.

⁴ Ikipkaiviḷiuqhuni god-iŋŋuanun Aŋaiyyuvikpagmi, inimi Atanġum uqallautigiŋaraanun ilimiñun nanġaiviuniaġnivḷugu.

⁵ Malġugni siḷalliŋigñi Aŋaiyyuvikpaum nappaiŋaruq nanġaiviksranik uvluġianun.

⁶ Aitchuutigiŋagaa iġñini ikipkautikun aitchuivigmi. Aŋatkullatiniglu atuqhuni suli apiqsrisuuvluni nalautchaqtiniñ. Piḷuusiqiqpaŋaruq paaqłakługu Ataniq aasii qinnaliqsiłługu.

⁷ Iñuuraqpaŋa god-iŋŋuam Asherah-m napaqutaa iḷiŋagaa Aŋaiyyuvikpagmun, inimun Atanġum uqallautigiŋaraanun David-mun iġñiŋanullu Solomon-mun: “Uvani Jerusalem-mi, uumani Aŋaiyyuvikpagmi, iniksraqtaaġiŋagiga nunapayaaŋaniñ qulit malġuuruat (12) maŋŋuuruat Israel-mi inigitquvlugu uvamnun nanġairuanun.

⁸ Aasii iñuŋisa Israel kamagituaqpatigik iluqaisa piraksriutitka suli kamagilugu iluqaan pitquraliaġa kivgaġma Moses-gum qaiñŋaraŋa iliŋiññun, uŋutaupkaġniaŋitkitka nunamiñ qaiñŋaramniñ kiŋuniiŋiñun.”

⁹ Iñuŋisa-aglaan Judah-m kamagiŋaiñŋagaat Ataniq, suli Manasseh-m aullatiŋagai pigiił̣haaqtuanun piḷuutinun savaaġiŋaraŋiñiñ nunaqpauruat Atanġum suksraunġiŋaraŋiñiñ takkuanni Israel iñuŋisa.

¹⁰ Kivgamigun uqaqtauruatigun Ataniq uqaqtuq,

¹¹ “Umialguruaq Manasseh savaaqaŋaruq pigiipiaġataqtuanik, iŋattaŋałhaaqtuanik Amor-miut savaaŋiñiñ; suli piḷuksipkaqługich iñuŋich Judah-m, iñuuraqpagmigun.

¹² Tavraasii uvaŋa, Atanġuruaŋa God-iŋa Israel, suksraunġiġñiaġiga Jerusalem-lu Judah-lu. Kiñapayaaq tusaaruaq tupagniaqtuq.

¹³ Tatavsaġniaġiga Jerusalem piusiptun Samaria-mik, tuvraġlugu aŋalatchisiġa Israel Umialganik Ahab-mik suli kiŋuvaaŋiñik. Tamatkiġḷugich Jerusalem iñuŋich piiġñiaġitka, salumasiruatun puggutauratun salummaqtatun aasii palułługu.

¹⁴ Suksraaġniaġitka iñuich kisiŋŋuqtauruat, aasii qaiñmiḷugich uumigiriŋiñun, pisaġiniaġai aasii tigligaiḷugu nunaŋat.

¹⁵ Tainna aŋalanniaġitka iñutka piḷuksiŋarut-kii paaqłakłuŋa suli qinnaguksaaqłuŋa kiŋuniiŋich qaikamiŋqaŋa Egypt-miñ uvlupagmun-aglaan.”

¹⁶ Manasseh tuquttaiŋavaił̣ł̣uni patchisaiḷaanik iñugnik apqutiŋich Jerusalem maqiulaŋarut augmik; tainna piŋaruq aullatiŋaqqaaġmivḷugich iñuŋich Judah-m iñuuraqpaktuġniġmun, piḷuksipkaqługich paaqłakługu Ataniq.

¹⁷ Supayaat Manasseh-m savaaŋich, iḷagivlugich piḷuksiŋaniŋich, agliusimarut makpiġaani Inillaaniŋaruat Savaaŋisigun Umialiŋisa Judah.

¹⁸ Manasseh tuquŋaruq aasii iḷuviqtauvluni igluqpaum nautchiaqaġvianun, nautchiaqaġviŋanun Uzza-m, suli iġñiŋata, Amon-gum, inaŋiŋagaa umialiguqhuni.

Judah-m Umialiŋa Amon

¹⁹ Amon iñuiññaq malġuktun (22) ukiuqtutigiŋaruq umialiguqami Judah-mi, suli umialguvluni Jerusalem-mi malġugni ukiugni. Aakaŋata atiŋa Meshullemeth, pania Haruz-gum nunaaqqiŋaniñ Jotbah-m.

²⁰ Aapamisun Manasseh-tun, piḷuusiqiŋaruq paaqłakługu Ataniq;

²¹ tuvraŋagai aapami piḷġusiŋich, suli aŋaiyyusuuvluni iñuuraqpagnun aapami nanġaiviŋiñun.

²² Ilaata ayyaŋagaa Ataniq, God-iŋat kiŋuniiġmi, suli kamagilaił̣ł̣ugich Atanġum piraksriutiŋich.

²³ Amon-gum atanauraŋich sivunniuŋarut nalunaqtuakun akiḷḷiġsruqługu aasii tuqułługu igluqpagmi.

²⁴ Judah-m iñuŋisa tuqunŋagai Amon-mik iñuaŋaruat aasii iġñiŋa, Josiah, umialiguqługu.

²⁵ Sunapayaaq Amon savaaŋa agliusimaruq makpiġaani Inillaaniŋaruat Savaaŋisigun Umialiŋisa Judah.

²⁶ Amon iḷuviŋagaat iḷuvvivigmi nautchiaqaġviani Uzza-m, aasii iġñiŋata, Josiah-m, inaŋiŋagaa umialiguqhuni.