2 Kings 2 - Iñupiatun Mumiksat Uqalugiksuat

Elijah Mayuurrauruq Qiḷaŋmun

¹ Atanġum Elijah qiḷaŋmuutisaġmagu uyalunakun, Elijah-lu Elisha-lu aullaġniqsuk Gilgal-miñ.

² Elijah-m uqallautigaa Elisha, “Uvaniittuallagiñ; Atanġum tiliŋagaaŋa Bethel-muquvluŋa.” Aglaan Elisha-m kiugaa, “Ataniq iḷumutun iñuumman, suli iñuuvlutin, uniññiaŋitkikpiñ.” Tavraasii Bethel-muŋaruk.

³ Qavsiuvlutiŋ God-im uqaqtiŋich iñuuruat Bethel-mi ullaŋagaat Elisha aasii apiġivlugu, “Iḷisimavich Ataniġmun aullautiniaqtilaaŋa umialgiñ uvlupak?” “Aaŋ, iḷisimaruŋa,” Elisha-m kiugaich. “Aglaan uqausiġiŋiḷḷaglakput.”

⁴ Tavra Elijah-m uqallautigaa Elisha, “Uvaniittuallagiñ; Atanġum piraksriġaaŋa Jericho-muquvluŋa.” Elisha-m aglaan kiugaa, “Iḷumutun Ataniq iñuuruagumman suli ilvich iñuuvlutin uniññiaŋitkikpiñ.” Tavraasii Jericho-muŋaruk.

⁵ Qavsiuvlutiŋ God-im uqaqtiŋich iñuuruat tavrani Elisha ullakługu apiġiŋagaat, “Iḷisimavich Ataniġmun aullautiniaqtilaaŋa umialgiñ uvlupak?” “Aaŋ, iḷisimaruŋa,” Elisha-m kiugaich. “Uqautigiŋiḷḷaglakput.”

⁶ Tavra Elijah-m uqallautigaa Elisha, “Uvaniittuaġiñ; Atanġum piraksriġaaŋa Jordan River-muquvluŋa.” Elisha-m aglaan kiugaa, “Ilumutun Ataniq iñuuruagumman qiksiksrautiqaġnipkun suli ilvich iñuukavich uniññiaŋitkikpiñ.” Tavraasii aullaqilgitchuk,

⁷ aasii malġukipiaq quliuruat (50) God-im uqaqtiŋisa maliŋagaik Jordan-mun. Elijah-lu Elisha-lu nutqaŋaruk kuugum siñaanun, aasii malġukipiaq quliuruat (50) God-im uqaqtiŋich qikaŋarut uŋasiuraqłutiŋ.

⁸ Tavra Elijah-m mattaqługu qaliġuani, imuniġaa, aasii anaugutigivlugu immamun; imaq aviŋaruq, aasii ilaalu Elisha-lu ikaaqłutiŋ paliumaruakun nunakun.

⁹ Ikaaġanigmaŋnik, Elijah-m uqallautigaa Elisha, “Uqallautiŋŋa sumik pisuktilaaġnik aullaurrauŋaiñŋaġma.” “Apiġigikpiñ, kiŋuvaannaktaaqaġuktuŋa malġuullugu ilitqusiġñik,” Elisha-m kiugaa.

¹⁰ “Taamna siġġaġnaġaluaqtuq apiqsriaġiran,” Elijah-m kiugaa. “Aglaan akuqtuġniaġiñ tautukkumŋa aullaurrauguma iliŋniñ; aglaan tautuŋitkumŋa, akuqtuġniaŋitkiñ.”

¹¹ Uqqaaġiḷḷaġmiŋ pisuaqtillugik, tavraŋŋatchiaq aksraktuuraq igniġuvluni qimuktiqaqłuni tuttuqpagnik igniġuvlutik akunnaaġutiruk iliŋigñun, aasii Elijah qiḷaŋmuurrauŋaruq uyalunakuaqłuni.

¹² Elisha-m tautukługu nivliqsuq Elijah-mun, “Aapaaŋ, Aapaaŋ! Suaŋŋatiqaqtuaq ikayuqtiŋa Israel! Aullaġruiññaqtutin!” Aasii taututqiŋiḷḷakkaa Elijah. Isumaaġunmiñi aligaŋagaa qaliġuani malġuułługu Elisha-m.

¹³ Tavraasii tiguniġaa Elijah-m qaliġuaŋa kataktuaq ilaaniñ, aasii utiqłuni qikaġniqsuq siñaani Jordan.

¹⁴ Ilaata anauŋagaa imaq Elijah-m qaliġuaŋanik aasii uqallakhuni, “Nauŋ imña Ataniq, God-iŋa Elijah-m?” Tavraasii anauvsaaqługu imaq, aasii avgusiġman, pisuaqhuni ikaaqhuni avuŋatchianun.

¹⁵ Malġukipiaq quliuruat (50) God-im uqaqtiŋich Jericho-miñ qiñiqługu uqallaktut, “Suaŋŋataa Elijah-m Elisha-muktuq!” Kasuġiaŋagaat aasii pułłutiŋ nunamun sivuġaanun,

¹⁶ aasii uqallakłutik, “Uvva uvagut malġukipiaq quliurugut (50) uvani, iluqata suaŋarugut. Aullaġluta ivaġiaġlakput umialgiñ. Iḷaanni imma ilitqusiata Atanġum tigumiaqługu aasii unitkaa iġġimun naakkaqaa suqpani natiġnamun.” “Naumi, aullaġniaŋitchusi,” Elisha-m kiugaich.

¹⁷ Aglaan katchuŋaił̣ł̣utiŋ kiiqsruġaluaġmanni qanuġviiqhuni aullaqumagaich. Taapkua malġukipiaq quliuruat (50) aullaqhutiŋ ivaġaluaġaat qutchiksuani suli naqittuani Elijah piŋasuni uvluni, aglaan paqinŋiḷḷakkaat.

¹⁸ Tavra utiŋarut Elisha-mun, utaqqiuqtuamun Jericho-mi, aasii uqallautimagaich, “Uqallautiŋitpisimi aullaquŋitkaluaqłusi?”

Aliuġnaqtuat Savaaŋich Elisha-m

¹⁹ Qavsiuvlutiŋ aŋutit Jericho-miñ ullaŋagaat Elisha aasii uqallautivlugu, “Iḷisimarutin, aŋuun, una iniqpak inilluatauruq, aglaan imiq nakuuŋitchuq suli iġñiayaaqtitchisuuruq.”

²⁰ “Taġiuḷiġḷugu nutauruaq iḷuturuaq puggutauraq qaġġisisiuŋ uvamnun,” piraksriġaich. Aasii qaġġisigaat ilaanun,

²¹ aasii maqsraluktuamuŋaruq, miḷuqsautivlugu taġiuq immamun, aasii uqallakhuni, “Ataniq inna uqallaktuq: ‘Salumaruaġuġiga una imaq, tuqupkaitqigñiaŋitchuq naaggaunnii iġñiayaaqtitchiḷuni.’”

²² Aasii tavra taamna imaq salumasiŋaruq tavraŋŋaaglaan, Elisha-m uqallausiatun.

²³ Elisha aullaŋaruq Jericho-miñ Bethel-muksaqłuni, aasii iglaupkaqługu aŋutaiyaat qaiñiqsut nunaaqqimiñ aasii kipagiaqsivḷugu. “Maaŋŋa piiġiñ, mitquiḷamik niaquqaqtuatiin!” saqłautimagaat.

²⁴ Elisha-m kiŋiaqhuni, qiññaqłuŋagaich, aasii uqallamaqłuutivlugich atqagun Atanġum. Tavraasii malġuk aġnasalluk akłak tavraŋŋatchiaq nuiŋaruk napaaqtut iḷuanniñ aasii ugiaŋagaich malġukipiaq malġuuruat (42) aŋutaiyaat.

²⁵ Elisha Mount Carmel-muŋaruq aasii aquvatigun utiqhuni Samaria-mun.