2 Kings 10 - Iñupiatun Mumiksat Uqalugiksuat

Kiŋuniiŋich Ahab-gum Tuqutaurut

¹ Iñugiaktigiruat piŋasukipiaq qulitun (70) kiŋuniiŋich Umialgum Ahab iñuuŋarut iniqpaŋani Samaria-m. Jehu tuyuŋaruq aasii tuyuutigivlugich atanauraŋiñun iniqpauruam, aullarriuruanun iñugnun suli munaqsriuruanun Ahab kiŋuniiŋiñun. Tuyuutaa innaiłłuni:

² “Umialgum kiŋuniiŋi itqatigigaatin, suli aksraktuuraksranik, tuttuqpagnik, satkunik, suli sapukusiqsuŋaruanik ininik. Tavraasii tuyuun una tikitpan,

³ naliġaktuksraurusi piḷḷayumiñałhaaqtuamik umialgum kiŋuniiŋiñiñ, umialiguġlugu suli aŋuyautilugu ikayuqsaġlugu.”

⁴ Atanauraŋich Samaria-m qanutun iqsiḷiŋarut. “Qanuġlugu akiḷḷiqsruġumiñaqpisigu Jehu,” uqaqtut, “Umialgum Joram naakka Umialgum Ahaziah-m akiḷḷiqsruġumiñaiñmarruŋ?”

⁵ Tavraasii qaukłiuruam igluqpagmun suli qaukłiuruam iniqpagmun, atautchikun aullarriuruallu iñuich suli munaqsriuruat, tuyuġniġaat uumiŋa Jehu: “Kivgaurugut iliŋnun, itqanaitchugut qanupayaaq pitquguvsigut. Aglaan kimik umialiguqtitchiñiaŋitchugut; isumaktun iłuaġnasugiraġnik piiñ.”

⁶ Jehu-m allamik tuyuvsaaŋagaich: “Uvamnuktuġuvsi suli itqanaitkuvsi maliġisaġlugich piraksriutitka, qaġġisisigik niaquŋich Umialik Ahab kiŋuniiŋisa uvamnun, Jezreel-mun, innaiḷikpan uvlaaku.” Piŋasukipiaq quliuruat (70) kiŋuniiŋich Umialgum Ahab munaġiniġaich iñuuniaqtuaguruat Samaria-mi, qaġġisuutiraŋich.

⁷ Jehu-m tuyuutaa akuqtuġmarruŋ, aullarriŋisa Samaria-m tuqunniġaich iluqaisa piŋasukipiaq quliuruat (70) Ahab-gum kiŋuniiŋich, niaquŋich aguummagnun iḷivḷugich tuyuġiŋagaich Jehu-mun Jezreel-miittuamun.

⁸ Jehu-m kiligmanni niaquŋich Ahab kiŋuniiŋisa qaġġisinivḷugich, piraksriġñiġaich qaliġiiksitquvlugich malġuigullugich iniqpaum upkuaqpaŋanun suli tavraniitquvlugich uvlaaġataqtillugu uvlaakukpan.

⁹ Uvlaami Jehu-m upkuaqpagmuŋaruq aasii uqallautivlugich iñuich tavraniittuat, “Uvaŋauvva nalunaqtuakun sivunniiŋavḷuŋa akiḷḷiġiraġa Umialik Joram aasii tuqułługu; ilivsi patchisauŋitchusi taaptumiŋa. Aglaan kia tuqutpagich ukua iluqaisa?

¹⁰ Nalunaiġaa taaptuma Atanġum uqallautaa kiŋuniiŋigun Ahab iḷumun inniaqtilaaŋanik. Ataniq ilaa savaktuq unniqsuqłiiramiñik uqaqtimigun Elijah-kun.”

¹¹ Tavra Jehu-m tuquġaġniġaich iluqaisa nanmiñiq iḷaŋich Ahab-gum iñuuruat Jezreel-mi, suli iluqaisa atanauraŋich, avilaitqatiŋich, suli aŋaiyyuliqsiqpaŋich; atausiuraq unnii iñuupkaŋiññiġaat.

Nanmiñiq Iḷaŋich Umialgum Ahaziah-m Tuquġaqtaurut

¹² Jehu aullaŋaruq Samaria-mun. Iglaullaġmi, tikiññami inimun tairaŋannik “Imnaiḷiqirit Nullaummiviat,”

¹³ kasuiñiqsuq iḷaŋiññik tuquŋaruam Umialgum Ahaziah-m Judah-ġmium aasii apiġivlugich, “Kitkut ilivsi?” “Ahaziah-m iḷagigaatigut,” kiugaat. “Jezreel-muksaqtugut ullallagukługich miqłiqtuŋich Umialgum Aġnaata Jezebel-gum suli iḷaŋiḷḷu umialguruam.”

¹⁴ Jehu-m piraksriġaich iñuni, “Iñuulugich pisaġisigi!” Tiguniqłagniġaich, aasii tuquġaqługich qaniŋani iḷuqsram. Iñugiaktigiŋarut malġukipiaq malġuktun (42) iñuich katiłługich, nalliat unnii iñuupkaŋaiñŋagaat.

Iluqaġmiŋ Kisiŋŋuqtauŋaruat Iḷaŋich Ahab-gum Tuqutaurut

¹⁵ Jehu aullaqivsaalgitchuq, aasii iglaupkaqtillugu kasuŋagaa Jonadab, iġñiŋa Rechab-gum. “Ilviḷḷu uvaŋalu atiruamik isumaqaqtuguk. Tunulliḷiqsuġniaqpiŋa?” “Ii,” Jonadab-gum kiugaa. “Argaiñmi qairruŋ,” Jehu-m kiugaa. Iḷallisivḷutik, aasii Jehu-m ikayuqługu ikupkaŋagaa aksraktuuramun,

¹⁶ uqaqłuni, “Maligluŋa qiñiġiaġiñ iliŋnik qanutun kipiġniuġutiqaqtilaamnik Ataniġmun.” Tavraasii atautchimi usiaqsiqł̣utiŋ Samaria-muŋaruk.

¹⁷ Tikiññamiŋ tavruŋa, Jehu-m tuquġaŋagaich Ahab-gum iḷapayauraŋich tamatkiqł̣ugich. Tavra tainnaġniaġnivḷugich Atanġum uqautiŋagaa Elijah.

Aŋaiyyusuuruat Baal-mun Tuqutaurut

¹⁸ Jehu-m ququaŋagaich iñuŋich Samaria-m atautchimuquvlugich aasii uqaqhuni, “Umialgum Ahab-gum savautiŋagaa Baal savautiłauraqługu, aglaan Jehu-m savautiłhaaŋagaa.

¹⁹ Tavraasii ququaqsigik atautchimuktillugich uqaqtiŋich Baal-gum, iluqaisa maliġuaqtiŋich, suli iluqaisa aŋaiyyuliqsiŋich. Nalliat unnii minitauŋitchuq. Aitchuiñiaqtuŋa kamanaqtuamik Baal-mun, aasii kiñapayaaq ullautiŋitchuaq tuqutauniaqtuq.” (Taamna tavra pisaasuġmiaġutaa Jehu-m sivuniqaqłuni tuqutchukługich iluqaisa nanġaisuuruat Baal-mun.)

²⁰ Tavraasii Jehu piraksriiruq, “Inillaisitchi uvlumik nanġaiviksramik qutchiksiḷiqsaġlugu Baal!” Kiliktuiŋarut,

²¹ aasii Jehu-m kiliktinniġaich iluqaani nunaŋani Israel. Iluqaġmiŋ aŋaiyyusuuruat Baal-mun qairut; atausiuraq unnii iñuk uniktauŋiññiqsuq. Iluqaġmiŋ aŋaiyyuviŋanuŋarut Baal-gum, siḷiviłługu isuaniñ isuanun.

²² Tavraasii Jehu-m piraksriŋagaich aŋaiyyuliqsiqpaich munaqsriuruat qaliġuaŋich qaġġisitquvlugich aasii qaiḷḷugich aŋaiyyuliaqtuanun.

²³ Taamna pianigman, ilaa Jehu aŋaiyyuvigmuŋaruq piqatigivlugu Jonadab iġñiŋa Rechab-gum aasii uqallautivlugich iñuich tavrani, “Nalupqinaiḷḷugi kisianik Baal-mun aŋaiyyusuuruat itkaluaġmagaisa suli allat aŋaiyyusuuruat Ataniġmun qaiŋaitkaluaġmagaisa.”

²⁴ Tavraasii ilaalu Jonadab-lu isiqłutiŋ aitchuiyyaŋaruk ikipkautikun Baal-mun. Inillaiŋaruq sisamakipianik (80) aŋutinik siḷataanun aŋaiyyuvium aasii piraksriqł̣ugich: “Tuquġaqtaksraġigisi iluqaisa ukua iñuich; kiña annaktitchiñiġumi atausimik akiḷiiruksrauruq ilaata iñuggutimiñik!”

²⁵ Jehu qaitchianipqauraqami aitchuutinik, uqallautigaich munaqsrit suli atanaurat, “Isiġlusi tuquġaqsigik iluqaisa; nalliat unnii annaktinnasiuŋ!” Isiqtut itqanaił̣ł̣ugi savikpatiŋ, tuquġaqługich iluqaisa, aasii kaliksraqługich timiŋich siḷataanun. Aasii isiqłutiŋ iḷulliġmun aŋaiyyuvianun Baal,

²⁶ annisivḷugu salumaruaq napaqutaq tavraniittuaq, aasii ikipkaqługu.

²⁷ Tavra navguŋagaat iñuuraqpaŋat Baal-gum suli aŋaiyyuvikpak, aasii aŋaiyyuvikpak quqtaqaġviḷiuqługu—paŋmamisuligguuq tainnaittuq.

²⁸ Tainnaasii tavra Jehu-m nutqaqtinŋagaa aŋaiyyuraġaġniq Baal-mun Israel-mi.

²⁹ Aglaan tuvrautiŋaniqsuq piḷuutaanun Umialgum Jeroboam-gum, Israel-miut piḷuusiqipkaŋaraŋich aŋaiyyuuqtiłługich kaviqsuamik manigmik savaamun aŋusallunun nuġġaġnun nappaamiñun Bethel-miḷu Dan-miḷu.

³⁰ Ataniq uqaqtuq Jehu-mun, “Piḷḷuataqtutin savaaġikapkich Ahab kiŋuniiŋich iluqaagun piraksriutigirapkun. Tavraasii unniqsuqłiigikpiñ ilvich kiŋuvaatin, sisamaŋannuaglaan kiŋuniġiiksuat, Israel-mi umialiusuuniaqtut.”

³¹ Aglaan Jehu kamakkutiqaŋaiñŋaruq iluqaaqługu uummatini pitquraŋiñun Atanġum, God-iŋanun Israel; aglaan maliġiŋagaa tuvraaksriutaa Jeroboam-gum, piḷuksipkaiŋaruam Israel-guruanik.

Tuqumman Jehu

³² Tavrani Atanġum mikł̣iḷaaŋagaa aktilaaŋa Israel-gum nunagiraŋa. Umialgata Syria-m Hazael-gum pisaġiŋaniġaa Israel nunaŋa

³³ kivalliani Jordan, kiluliñaaŋanuaglaan nunaaqqiŋata Aroer-m Arnon River-mi—taaptuma iḷagivlugu nunaŋa Gilead suli Bashan-gum, iñuuruat maŋŋuqallaaruanik Gad-mik, Reuben-mik, suli Manasseh-mik.

³⁴ Sunapayaaq Jehu-m savaaġiŋaraŋa, iḷagivlugich ilaan uluġiił̣ł̣uni savaaŋich, agliusimarut makpiġaani Inillaaniŋaruat Savaaŋisigun Umialiŋisa Israel.

³⁵ Tuquŋaruq aasii iḷuviqtauvluni Samaria-mi, aasii iġñiŋa Jehoahaz umialiguqhuni aquagun.

³⁶ Jehu umialguŋaruq Israel-mun Samaria-mi iñuiññaq tallimat piŋasuni (28) ukiuni.