2 Kings 1 - Iñupiatun Mumiksat Uqalugiksuat

Atanġum Isivġiutaa Ahaziah-mun

¹ Tuquanigman Israel-mi Umialik Ahab Moab-miut paaqłaŋasiŋagaa Israel.

² Umialik Ahaziah Israel-miu kataŋaruq qiḷaguamiñ, qiruuranin ayagutalianin igluqpagmi Samaria-mi aasii anniusiqł̣uni. Tavraasii tilisiŋamaruq kiliksiyyaqtinik apiġiyyaquvlugu Baalzebub, god-iŋat Philistia-ġmiut iniqpaŋani Ekron, iḷitchuġisukłuni iłuaqsiñiaqtilaamiñik naakka iłuaqsiñiaŋisilaamiñik.

³ Aglaan isaġulgata Atanġum piraksriŋagaa Elijah, God-mun uqaqtauruaq Tishbe-miñ, kasuġiaquvlugich kiliksiyyaqtiŋich Umialgum Ahaziah-m aasii apiġilugich, “Summan uvva apiġiyyaqsaqpisiuŋ Baalzebub, god-iŋat Ekron-miut? Isumavlusi God-aiññasugilugu Israel-mi?

⁴ Uqallautiyyaqsiuŋ umialik Ahaziah Ataniq inna uqallagnivḷugu, ‘Iłuaqsiñiaŋitchutin anniġñiġniñ; tuquniaqtutin!’” Elijah piŋaniqsuq Atanġum piraksriutaatun,

⁵ aasii kiliksiyyaqtit utiŋarut umialigmun. “Summan imña utiqpisi?” apiġigaich.

⁶ Ilaisa kiugaat, “Iñuum kasuqtapta uqallautiraatigut utiġluta uqallautitquvlutin Atanġum uqallautaanik iliŋnun, ‘Summan tilisivich kiliksiyyaqtinik apiġiyyaquvlugu Baalzebub, god-iŋa Ekron? Isumavich God-aiññivḷugu Israel-mi? Maminniaŋitchutin anniġñiġniñ; tuquniaqtutin!’”

⁷ “Qanuq aŋun qiññaqaġniqpa?” umialgum apiġigaich.

⁸ “Qaliġuaqaġniqsuaq niġrutit amiŋiñik, tavsiaqaqłuni qisigmik,” kiugaat. “Elijah-aumaruq!” umialik uqallaktuq.

⁹ Tavraasii atanauraq piqasiqł̣ugu malġukipiaq qulinik (50) aŋuyaktinik aitquŋagaa Elijah. Atanauram paqinŋagaa aquppiruaq qimiqqami aasii uqallautivlugu, “Iñugiraatin God-im, umialgum piraksriġaatin atqaquvlutin.”

¹⁰ “Iñugikpaŋa God-im,” Elijah-m kiugaa, “igniqtuq qaiḷi qiḷaŋmiñ aasii tuqullutin aŋuyaktitillu!” Tavra igniq kataŋaruq aasii tuqułługu atanauraq iñuŋiḷḷu.

¹¹ Umialik tilisivsaaŋaruq allamik atanauramik piqasiqł̣ugusuli malġukipiaq qulinik (50) aŋuyaktinik, aullaqłutiŋ uqallautigaat Elijah, “Iñugiraatin God-im, umialgum piraksriġaatin atqaquvlutin akkupak!”

¹² “Iñugikpaŋa God-im,” Elijah-m kiugaich, “Igniqtuq katagli qiḷaŋmiñ aasii tuqullutin aŋuyaktitillu!” Tavrauvva igniq God-miñ kataŋaruq aasii tuqułługu atanaurauruaq suli iñuŋich.

¹³ Atausivsaami umialik tilisiŋaruq atanauramik piqatiqaqługu malġukipiaq qulinik (50) aŋuyaktinik. Mayuŋaruq qimiqqamun, sitquqłuniasii sivuġaanun Elijah-m, aasii iŋiulavluni, “Iñuuruatiin God-mun, naglikkutiqaġiñ uvamnun aŋuyaktimnullu. Iñuupkallagniaqsigut!

¹⁴ Malġuuk allak atanaurak suli aŋuyaktiŋich tuqutauŋarut ignikun qiḷaŋmiñ; aglaan naglikkutiqaġiñ uvamnun!”

¹⁵ Isaġulga Atanġum uqallaktuq Elijah-mun, “Atqaġiñ ullaglugu, suli iqsiñak.” Tavraasii Elijah-m aullaqatigiŋagaa atanauraq umialigmun

¹⁶ aasii uqallautivlugu, “Ataniq uumiŋa uqaqtuq: ‘Pisigivlugu kiliksiyyaqtit apiqsriyyaqtinnapkich Baalzebub-mun, god-iŋanun Ekron—God-aitchuatun iḷivḷugu Israel-mi apiġiraksramik—iłuaqsiñiaŋitchutin; tuquniaqtutin!’”

¹⁷ Ahaziah tuquŋaruq, Atanġum uqallautaatun Elijah-kuaqługu. Ahaziah iġñiġiñŋamaruq, tavraasii aniqataata Joram-gum inaŋiŋaniġaa umialiguqłuni tugliani ukiut, umialgumman Jehoram, iġñiŋa Jehoshaphat, umialga Judah-m.

¹⁸ Savaapayaaŋich Umialik Ahaziah-m agliusimarut makpiġaani Inillaaniŋaruat Savaaŋisigun Umialiŋisa Israel.