2 John 1 - Iñupiatun Mumiksat Uqalugiksuat

¹ John umialiŋnauruaq tuyuqtuq ukuniŋa aġnamun God-im piksraqtaaŋanun miqłiqtuŋiñullu piviuttaġipiaġatakkamnun. Kisimałhiñaq piviuttaġiŋitkivsi aglaallu iluqaġmiŋ iḷisimaruat God-im iḷumun ittuaŋanik,

² pisigivlugu iḷumun ittuaq iḷuptiŋniittuaq, suli iḷuptiŋniittuaq isuitchuamun.

³ God-iptuq Aapam Jesus Christ-lu Aapam Iġñiŋata iviġaummatigilisigut nagligilutalu tutqiutiqaqtillutalu iñuuyumiñaqsiḷuta ilaan iḷumun ittuaŋagun piviuttaqqutaagullu.

Iḷumun Ittuaq Piviuttaqqullu

⁴ Quviasupiaġataŋaruŋa iḷitchuġikapkich iḷaŋich miqłiqtuvich iñuummata iḷumun ittuakun, nalaupiaqługu piraksriutaa Aapam uvaptiŋnun.

⁵ Aasiuvva paŋmapak apiġipiaġikpiñ aġnaaq, piviuttaqqutita avanmun. Nutauruamik pitquramik tuyuŋitkikpiñ, aglaan pitquramik pigiŋakkaptiŋnik isuaniñqaŋa.

⁶ Taamna uqautigikkaġa sivuniqaqtuq iñuutquvluta kamagilugich God-im pitquraŋi. Pitquraq tusaaŋakkaqsi isuaniñqaŋa uvva, iluqasi piviuttaqqutiruksraurusi avanmun.

⁷ Qanuq iñugiaktut sagluqirit sumiḷiqaa ittut, iñuich quliaqtuaqaŋitchuat Jesus Christ qaiŋanivḷugu timiqaqłuni. Tainnasiq iñuk sagluqinnigniaqtuaguruq akiḷḷiḷiqsuiruġlu Christ-mik.

⁸ Qaunagisitchi iliŋiññiñ asiñuurrauŋitchumausi aasii tammaiŋiḷḷusi akiḷiusiaksramik ilivsiḷu uvaŋalu siġġaqutigiŋaraptiŋnik aitchuusiaġiyumavlugu. Piññaktaġiniaqsiuŋ inuaŋaitchuaq akiḷiusiaksraqsi Ataniġmiñ.

⁹ Iñuk ukpiqsimatuiññaŋitkumi taavrumuŋa iḷisaurrunmun Christ-kun, aglaan arguakkiutigumiuŋ, atausiŋŋuqatauŋaitchuq God-mun. Kiñaliqaa ukpiġutiqaqtuiññaqtuaq taavrumuŋa iḷisaurrunmun atausiŋŋuqatauŋaruq Aapamun Iġñiġmullu.

¹⁰ Kiñaliqaa ullautikpan ilivsiññun iḷisaurriŋiḷḷuni iḷumun ittuamik Christ-kun, tukkuliġñagu aimaaġvivsiññun naaggaunnii uqallautinagu, Tutqiutiqaġiñ.

¹¹ Qanuq paġlariruaq ilaanik tainna piqatauruq pigiitchuamun iḷisaurrutaanun.

Uqallaguiqsaaġutit

¹² Uqaluksraukkaġaluaqtuŋa iliŋnun aglaan uqautigisuŋitkitka ukunuuna tuyuutitigun, qanuq qaiñasuaġumaruŋa takulutin aasii kasuġlutin uqaqatigilutin. Tavraasii quviasupiaġataġniaqtugut.

¹³ Miqłiqtuŋisa aġnam aniqarvich piksraqtaaŋata God-im paġlagaatin.