2 Corinthians 9 - Iñupiatun Mumiksat Uqalugiksuat

Ikayuutit Ukpiqtuaguqatinun

¹ Sivuniġilugu aitchuiñiqsi God-im ilaaguaqtaŋiñun iñuŋnun, tuyuaksraitkaluaġmiusi taavrumuuna,

² qanuq iḷisimagivsi aitchuiyummatiqaqtuasii. Taavrumiŋa uqautigilluataŋagivsi Macedonia-mi ukpiqtuaguruanun, quliaqtuaġutivlugich aŋaiyyuliqiruat nunami Greece-mi itqanaiganiŋanivḷugich aitchuisukłutiŋ ukiutqik. Taamna tusaakamirruŋ iñugiaŋniqsrat qapiŋaisaaġusiaġiŋagaat aitchuiñikun.

³ Tavra tiliñiaġitka aniqatit nalupqinaimmaġiksitquvlugu itqanaipiaqtilaaqsi aitchuutivsigun, uqaġiŋakavsi itqanaiññiaġnivḷusi, uqautigilluataŋavlusi, taamna taŋiġitquŋitkiga.

⁴ Qanuq iñuich iḷaŋich iḷaanni qaikpata Macedonia-miñ maligluŋa, iḷitchuġikparruŋ itqanaiñŋisilaaqsi nalupqisuŋipiaqqaaġlutiŋ itqanaitchualiŋavlusi, kamanaiqsauviaqtugut uvaŋalu ilivsiḷu.

⁵ Tavra isummiŋaruŋa aniqatit ayutqulugich ilivsiññun sivumni kiaqsrugaksraupiaġasugalusi, aasii iłuaqsruiḷutiŋ sivuani taapkunuuna aitchuutiksratigun unniqsuqłiisigiŋakkavsigun aitchuutisi itqanaitchumaut. Aitchuitquyumagivsi piyummatiqaġlusi, pipkaġniapiaqtauŋaiġḷusi.

⁶ Nalunaigilugu una. Iñuk nautchirriiruaq iñugiapiaŋitchuanik nautchiaksranik katitchiñiaqtuq iñugiapiaŋitchuaniktauq nauruanik nautchiaksrat nauganikpata. Aasiivsauq iñuk nautchirriiruaq iñugiaktuanik nautchiaksranik katitchiñiaġmiuq iñugiaktuanik nautchianik.

⁷ Ilivsigullaa iñuich ilivsi aitchuisitchi sivunniutivsisun, pisuŋitkavsautigillaan piŋaiġḷusi, naagga piruksraupiaġasugalusi. God-im piviuttaġigaa iñuk quviasuutiqaqtuaq aitchuiñiġmik.

⁸ Aasii God-im aitchuġumiñaġaasi agliḷugich supayaat pigiraksraġikkasi, ilivsi piqaġumiñaqsiḷusi ataramik naamasiḷugich pigiraksraġikkasi sippiġḷugich unnii, aitchuiqpakkumiñaqsiḷusi supayaanun savaaġiksuanun.

⁹ Taavrumuuna aglausimaruq Bible-ni inna. Iñulluataq “aitchuiyumiñaġniaqtuq nagliktuutinik nauttaasuŋaġnagich iḷiappaŋnun. Ataramik inuaŋaiññiaqtuq nagliktuutiksraqaġumiñaġluni ataramik.”

¹⁰ God-im aitchuiñiŋatun nautchiaksranik iñuŋmun nautchirriiruamun, aasii taapkunaŋŋa punniġmik niqiksramik, tainnatun suli piqaqtinniaġaasi pigiraksraġiravsiññik, sippakuulaaġluguunii pigiraksraqsi, ilivsi nauttaaŋaiġḷusi aitchuiyumiñaqsiḷusi allanun, taavrumuunaasii agliḷaaġlugu nagliktuiḷḷatutilaaqsi.

¹¹ Piḷḷuataqtitauniaqtusi supayaami, aitchuiyumiñaqsiḷusi nauttaaŋaiġḷusi. Aasii qaitkuptigik aitchuutisi, iñuich quyyatiqaqtinniaġisi God-mun.

¹² Qanuq aitchuiñiqsi piqaqtitchigiññaŋitchuq piiḷḷiuqtuanik ilaaguaqtauŋaruanik God-mun, aglaattauq iñugiaktuat quyyatiksriuġmigisi God-mun.

¹³ Aitchuiñivsi nalupqinaiġñiaġaa iḷumun akuqtuŋatilaaŋa tusaayugaaġiksuaq Christ-kun aasii kamagivlugu. God-ttauq nanġausiaqaġniaġmiuq taavrumuuna, ilivsiḷu nauttaaŋił̣ł̣usi aitchuiñivsigun Jerusalem-miittuanun, iluqaiññullu allanun.

¹⁴ Suli iliŋisa kasuġumaniaġaasi, aŋaiyyutilusiḷu pisigilugu aliuġnaqtuaq nagliktuutiqpaŋa God-im iḷuvsiññiittuaq.

¹⁵ Quyyavigisiuŋ ilaan aitchuutiŋi pisigilugich, aliuġnaqpaił̣ł̣utiŋ uqalugianilgunaitchut.