2 Corinthians 8 - Iñupiatun Mumiksat Uqalugiksuat

Ukpiqtuat Aitchuirut

¹ Aniqatiit, iḷisimatqugivsi aŋaiyyuliqiruanik iluqaani nunaŋani Macedonia-m. Iliŋisa satqummiŋagaat God-im nagliktuutiqpaŋa

² iłuiḷḷiuqpauraġaluaŋŋaġmiŋ. Qanutun iḷiappautigigaluaŋŋaġmiŋ aitchuiŋarut siŋñataipiaġataqłutiŋ, qanuq quviasupiaġataŋarut.

³ Uqallautiyumiñaġivsi nalupqisuŋiḷḷuŋa iliŋisa aitchuiñiŋannik piyumiñaqtilauramiktun, piyumiñaqtilaaqtikunnii qaaŋiqł̣ugu aitchuiyummatiqaqpaił̣ł̣utiŋ uvamnun unnii kiaqsruŋitkaluaqtillutiŋ.

⁴ Arapiaġataŋagaatigut akuqtuquvlugich maniich aitchuutitiŋ piqatauyumavlutiŋ quviasuutaani ikayuiñġum ukpiqtuanik Jerusalem-mi.

⁵ Aasii tamatkua aŋaiyyuliqiruat qaaŋisugruŋagaatunnii niġiugikkaqput, qanuq inmiŋnik ilaaguaqqaaŋarut Ataniġmun. Piyummatiqaŋarut kamagiyumavlugu God-im pisuutigikkaŋa supayaatigun uvagut uqallautiptigun ilimiŋnun.

⁶ Aitchuiŋammata piyummatiqpaqaqłutiŋ kiaqsruŋagikput Titus ullaquvlusi, katitquvlugich aitchuutisi maniich, taavrumuuna naatquvlugu savaaq isagutiŋakkaŋa ilivsiññi.

⁷ Tainnaptauq piḷḷuataanikavsi supayaatigun, ukpiġutivsiññi, uqaqtaunivsiññi God-mun, iḷisimmativsiññiḷu Ataniġmik, suli piviuttaqqutivsiññi uvaptiŋnun, tainnatuttauq piḷḷuatapiaġitchi aitchuiñikun.

⁸ Pitquraliŋitkivsi taavrumiŋa pitquuġlusi, aglaan pisuksaaġutigigiññaġiga aitchuiyumalaaġutaa allat, iḷisimanaqsitquvlugu piviuttaqqutiksi iḷumun itilaaŋanik.

⁹ Qanuq iḷisimagiksi nagliktuutiqpaŋa Atanipta Jesus Christ. Piqataugaluaŋŋaġmi iluqaani God-im kamanautaani iḷiappaguutigiŋagaasi, sunauvva ilaan iḷiappaguġniġmigun ilivsi iḷaŋiutiyumiñaqsitquvlusi God-im kamanautaanun.

¹⁰ Sivuniġilugu aitchuiñiq, paŋmapak naatquyumagiga ilivsiññun ukiutqik isagutisaŋakkaqsi piyummatigivlugulu.

¹¹ Taamna piguvsiuŋ, aitchuiḷusi pigikkavsiññiñ, aitchuiyummatiksi taŋŋiġñiaġiksi aitchuiḷusi.

¹² Kipiġniupiaġuvsi aitchuisuglusi, naumaniqsrauŋitchuq qanutun aktilaaŋa aitchuutivsi. God-im aitchuitqugaasi pigikkavsiññiñ, pigiŋisavsiññik apiqsriŋitchuq.

¹³ Sivuniġiŋitkiga ilivsiññik naŋniġlusi kisivsi aitchuiñiqsi pitqulugu, allat iḷasi naŋniisaaqtillugich aitchuiñiġmun,

¹⁴ aglaan atunim piruksraurusi. Sippaksranikavsi paŋmapak, aitchuiyumiñaqsirusi tamatkunuŋa piiḷḷiuqtuanun. Aquvatigulli piiḷḷiunġiġumiŋ ikayuġniaġmigaasi piqaqtuksraġuġuvsi. Tainna piguvsi atunim piqatigiigñiaqtusi.

¹⁵ Aglausimaruatun Bible-ni inna, “Iñuk katitchiqpaktuaq maana-mik sippakuulaaŋaitchuq, suli iñuk katitchipasaŋitchuaq piiḷḷiuŋaiñmiuq.”

¹⁶ Quyyavigigiga God qanuq aitchuŋagaa Titus tainnatuttauq saġiaksrautipiaġatamik ilivsiññun uvaptuttauq.

¹⁷ Ilaan ullagniaġaasi, pisigiłhaasuŋaġnagu uvaŋa takuritqutiga, aglaan pisigilugu ilaan kipiġniuġutini inmiñik ullagumavlusi.

¹⁸ Piqasiqsaġiga tilisivḷuŋa aniqanmik iḷisimmaġikkaŋannik aŋaiyyuliqiruat alġaqsruiñiŋagun tusaayugaaġiksuamik.

¹⁹ Taamnatualuk pisaqutauŋiñmiuq, aglaan ilaa nalunaiqsaġivlugulu aŋaiyyuliqiruat iglauqatigitquvluta ilaanun Jerusalem-mun qaitchaqtuġlugich aitchuutit. Taavrumuuna Ataniq nanġaqtauniaqtuq, suli uvagut kipiġniuġutikput ikayuiyumavluta iñuŋnik iḷisimanaqsiḷuni,

²⁰ qaunakłaaġuktugut aŋalatchiñiptigun taapkuniŋa aitchuutisalaŋnik maniŋñik, kimulliqaa iḷimagiyumiñaiġḷuta.

²¹ Piyumagikput sunapayaaq Ataniġmun pasiyumiñaiġḷuta iñuŋnullu.

²² Aasii piqasiqsaqługik suli taapkuak iññuk, tilisivsaaġmiugut allamik aniqanmik uuktuġaluamiiġuukkaptiŋnik aasii iḷitchuġivlugu ukpiġnaqtuaguvlugu. Qaŋapaŋmiñ unnii paŋmapak kipiġniulivsaaŋaruq ukpiġiliqpaił̣ł̣usi ilaata.

²³ Titus-liasii, ilaa piqatigigiga ikayuqtiga uvaŋa ikayuqavsi. Aasii taapkuak aniqatiivut piqatigikkaka, aŋaiyyuliqiruat kivgaŋich, tuvraaksriiḷḷuataqtuk Christ iñuŋiñik.

²⁴ Tavra iḷisimanaqsisiuŋ piviuttaqqurri aŋaiyyuliqiruanun aitchuiḷusi, aasii nalautipiaġlugu nanġaiñiqput ilivsiññik taapkunuŋa iñuŋnun.