2 Corinthians 7 - Iñupiatun Mumiksat Uqalugiksuat

¹ Piginiqaptigik taapkua unniqsuqłiisit, piviuttaġirauruasii, salummaqta uvaptiŋnik piḷuutipayaaniñ timiptiŋnullu ilitqutchiptiŋnullu salumaiḷḷisauruaniñ sivuġaani God-im. Iñuuniḷukta kiikaa piḷuutaiññiaġluta, qanuq qiksigigikput God.

Paul Quviasuktuq

² Saġiagisigut piviuttaġilutalu. Pimaqłuiŋaitchugut iñuŋmik. Asiñuurriŋaitchugut iñuŋmik. Ivayaġniŋaitchugut iñuŋmik.

³ Taamna uqallausiġiŋitkiga suaksaġlusi naagga pasiḷusi. Uqallautiŋagivsi sivuani piviuttaġivaił̣ł̣usi atausiŋŋuqatigiŋanivḷusi iñuuqatigiikkaluaġupta naagga tuquqatigiikkaluaġupta.

⁴ Ukpiġiqpakkivsi, suuramikunnii kanŋugiŋitkivsi. Qapiŋaisaaġutauqpaktusi uvamnun, quviatchaktitpakłuŋa iłuiḷḷiuġnimni.

⁵ Tikitkaluaqaptaunnii Macedonia-mun, piḷaiŋiaqsiaġviitchugut, iłuiḷḷiuqtitaukaptaaglaan qanusipayaakun, nagliksaaqtitaunikun ukpinaitchuaniñ, isumaaluutiptalu ukpiqtuanun.

⁶ Aglaan God-im, qapiŋaisaaqłiisuuruam tamatkuniŋa nikatchaktitauruanik, qapiŋaisaaŋagaatigut Titus qaipkaqługu uvaptiŋnun.

⁷ Qapiŋaisaaġusiaqaŋiñmiugut qaiñiŋanik kisianik, aglaallu pisigivlugu ilaan qapiŋaisaaġusiaŋa ilivsiññiñ, ilaan quliaqtuaġutivluta ilivsiññun kipiġniuttaġinivḷuŋa tautugukłuŋa, isumaaluutivsigullu sutigun piruatigun ilivsiññi, suli kipiġniuġutivsiññik iviġagukłuŋa, quviatchavsaapiksuaŋaruŋa tamatkua tusaayugaaġikapkich.

⁸ Isumaaġutigiŋaiġiga tuyuŋaniġa ilivsiññun, nunuurallakkaluaŋaruŋa iḷitchuġiqqaaqama qanutun isumaatchautiginiqavsigik tuyuutitka. Aglaan isumaaqtitkaasi sivikitchuamik.

⁹ Tavraasii quviasuktuŋa, pisigisuŋaġnagu isumaatchaktitauniqsi, aglaan isumaatchautiginiqavsigik piḷuutisi aasii isumalitqikł̣usi. Tainnatchim isumaaġutim qaġġisillammasi God-mun, anniŋitkivsi.

¹⁰ God-im iñuk isumaaliqsinmagu piḷuutit pisigivlugich, aasii isumalitqikł̣uni iñuum nunuuraġilaitkaa taamna qanuq qaġġirigisuugaa ilaan annaunmun. Aglaalli ukpiŋaitchuam isumaaġutaa tuqqutauruq.

¹¹ Ilivsiññik iḷitchuġiŋarusi qanutun anniqsuusiaqaġnaqtilaaŋanik isumaaġunmiñ God-im pipkaġmagu. Qanutupayauraq isumalitqiŋarusi. Qanutun piyummatiniŋarusi patchisausuŋił̣ł̣usi. Qanutun uumigiliqsigiŋagiksi piḷuun. Qanutun annaŋasuktigiliqł̣usi iḷaanni pigiitchuaq piimmaġiksipiaŋaiññasugalugu, qanutun kipiġniuttaġivlugu piiġukługu. Qanutun tatavsaŋagiksi piḷuusiqiri. Qanusipayaakun iḷisimanaqsiŋarusi nalautilaavsiññik pasiñaġumiñaiqł̣usi taavrumuuna.

¹² Tuyuŋagivsi tainna tuyuusivsun sivuġaani God-im puttuqsritquvlusi qanutupayauraq piviuttaqqutiqaqtilaavsiññik uvaptiŋnun. Taamna sivunniuġutigiŋagiga ikayułhaaqsasuŋaġnaguunnii iñuk piḷuksiruaq, naaggaunnii iñuk killukuaġusiaqaqtuaq.

¹³ Tavraasii qapiŋaisaaqtauŋaruŋa. Aasii kisian qapiŋaisaaġusiaġa piqutigiŋitkiga, aglaallu quviasuqatigiłhaaqługu Titus pisigivlugu ilivsi tagialasaaŋiññiqavsiuŋ.

¹⁴ Qanuq uvaŋa nanġaŋagivsi ilaanun aasii ilaan inmiñik iḷitchuġivlugu nanġaiñiġa ilivsiññik iḷumun itilaaŋanik. Tainnatuttauq supayaurat uqautitka ilivsiññun iḷumun inmatun, tainnatun nanġaqavsi Titus-mun, nanġaiñiġa iḷumun inŋammiuq.

¹⁵ Aasii ilaan piviuttaġilivsaaŋagaasi itqaqamiuŋ iluqavsi kamakkutiqaġniqsi inmiñun, piyumapiaqavsigiglu iluqaisa piraksriutiŋi.

¹⁶ Qanutun quviasuktigiruŋa, qanuq nalupqigiŋaiġivsi supayaatigun kamaksriñiaqtilaavsiññik.