2 Corinthians 4 - Iñupiatun Mumiksat Uqalugiksuat

Piqpaŋnaqtuat Aitchuusiat Puuqaqtuat Qikuyyanik

¹ Aitchuusiaqaġniqapta nagliktuutaagun God-im, qanutun aliuġnaqtigiruamik alġaqsruutigiraksramik uqaluksrirrusiamik, nikatchagluta aġiulaitchugut.

² Paaqsaaŋagiga kiñaliqaa alġaqsruiruaq suqpanaqsiḷiqłuni naagga iḷumun inŋitchuamik, naagga pisaasuġmiaġutikun, naagga allaŋŋuqtiqługu God-im uqalua. Tainna uvaŋa piḷaitchuŋa. Aglaan alġaqsruisuuruŋa iḷumutun, sivuġaani God-im pimmatun. Iluqaġmiŋ iḷisimaruat uvamnik, taamna aŋiġumiñaġaat iḷumun inniḷugu.

³ Aasii tusaayugaaġiksuaq alġaqsruutigikkaġa talutuġniqpan kimulliqaa, talutuġniqsuq kisiiññun tamatkunuŋa suksraunġiqsauniaqtuanun.

⁴ Tamatkua ukpiliŋaitchuat kaŋiqsitchaiḷiraġai tusaayugaaġiksuamik god-iŋata mattuma nunam, Tuunġaum. Ayaupkaqtitauruatun ittut, tautuquŋił̣ł̣ugu qiḷaŋmiŋŋaqtauruaq qaumanġa Christ, God-itun ittuam.

⁵ Alġaqsruutigigikput Jesus Christ Atanġunivḷugu. Alġaqsruutigiŋitchuŋa uvamnik. Uvagut ilivsi kivgaġigiptigut Jesus pisigivlugu.

⁶ God-im uqallaŋaruam uumiŋa, “Qaummaum simmausiġḷiuŋ taaqtuaq,” kaŋiqsipkaŋagaatigut aliuġnaqtuamik kamanautaanik Christ. Ilaimña ilaan simmausikkaŋa taaqtuaŋa uummatipta ilaan qaumaniġmiñik, uvaptiŋnun iḷitchuġipkaqługu ilaan qaumanini takunnaqaptigu Jesus kiiñaŋa.

⁷ Aglaan uvva pigigikput taamna piqpaŋnaqtuaq aitchuusiaq puuqaqsiññaqługu nunamiñ savaanik timiptiŋnik, sunauvva tautuquvlugu iñupayaanun taamna sapiġñaqtuaq suaŋŋan iḷuptiŋniittuaq God-miñ piruagutilaaŋanik, uvaptiŋniñ pisuŋaġnani.

⁸ Qanusipayaakun iłuiḷḷiuqtitaugaluaġaqtugut, akiiḷipkalaitchugut. Qanuqsausiiqsitaugaluaġmiraqtugut, uiŋasiḷaitchugut.

⁹ Nagliksaaqtitaugaluaqapta suksraalaiñmigaatigut. Ilauvagut akiḷḷivsa ulġutkaluakkaŋatigut, aglaan tuqunŋił̣ł̣uta.

¹⁰ Tavraasii ataramik anayanniuqtuaqtugut tuqutauniksramun, Jesus-tuttauq iḷisimanaqsitquvlugu iñuulipkaġuutilaaqput Jesus-mun iñuuruamun iḷuptiŋni.

¹¹ Iñuuniqtutilaaptiktun, itqanaitchugut tuquyumiñaqłuta Jesus pisigilugu. Tamauŋanun aglaan tuqutauŋaiñŋuraqpata iḷisimanaqtitkivut Jesus-mun iñuuruamun iḷuptiŋni iñuulimatilaaŋiññik tuquyumaaqtuat timivut.

¹² Anayanniuqtuaqtugut tuqqunmiñ pisigivlugu alġaqsruiñiqput, ilivsi piqaquvlusi isuitchuamik iñuggunmik.

¹³ Uqautigigikput taluqsraiqł̣uta ukpiġikkaqput, tainnatchimiktauq ukpiġutiqaqłuta iñuktun aglaŋaruatun Bible-ni inna, “Ukpilianikama uqarraqsiŋaruŋa.”

¹⁴ Nalupqigiŋitkikput God aŋipkaiŋaruaq Ataniġmik Jesus-mik, aŋipkaiyumiñaqtilaaŋaniktauq uvaptiŋnik atausiŋŋuqatauŋaruanik Jesus-mun, aasii qaġġisiluta piqatigilusi ilaan irviŋmiñun.

¹⁵ Iluqaan igḷutukkaġa anniqsuutauruq ilivsiññun, iñuvsaat kiikaa annaurraummata God-im nagliktuutiqpaŋagun, quyyativsaaksraqaqtusi God-mun, aasii ilaa nanġausiaqavsaalgiḷḷuni.

Iñuuniq Ukpiġutiqaqłuni

¹⁶ Tavraasii nikatchagluta aġiulaitchugut. Timivut piyyuġuqsaiññaġaluaqtillugich, uvagupiaqput iḷuptiŋniittuaq suaŋasiḷaaqtauviiññaġuuruq nutauruamik iñuggunmik uvlutuaġman.

¹⁷ Tamatkua iłuiḷḷiuġutivut paŋmapak suuvigruaŋitchut sivisuŋitchullu, itqanaiyaqsiññaġaatigut nakuaqsrisigitquvlugich God-im kamanaġniqsrat quviasuutiksrirrutiŋi uvaptiŋnun isuitchuamun.

¹⁸ Qanuq qiñiqtuiññaŋitkikput suna tautugnaqtuaq, aglaan ukpiġutikun qiñiqtuiññaġikput tautugnaitchuaq, qanuq suna tautugnaqtuaq piiġumaaqtuq, aglaan suna tautugnaitchuaq isuksraitchuq.