2 Corinthians 3 - Iñupiatun Mumiksat Uqalugiksuat

Alġaqsruiriksraqtaat Tusaayugaaġiksuamik

¹ Isumanasi uvamnun uqautitqiksaġasugalusi uvagut nalliumatiniḷuta akuqtuusiaksraptiŋnun ilivsiññiñ. Tuyuutinik piqaqtuksrauvisa iñuich allat aglaaŋiññik akuqtuġnaqsiḷiġutiksraptiŋnik ilivsiññun, naagga ilivsi tuyuutivsiññik allanun akuqtuitqutinik uvaptiŋnik?

² Naumi. Ilivsi Corinth-mi ukpiqtuaguruasii tuyuutitun ittusi, iḷisimanaqsisiksrat nalupqinaiġḷugu kisuutilaaptiŋnik. Qanuq allaŋŋuqtauŋaruat iñuutchisi iñupayaat qiñillagaich,

³ aasii allaŋŋuqtauruatigun iñuutchivsigun iḷisimanaqtitkiksi ilivsi itilaaqsi tuyuutitun aglaaŋisun Christ, uvagut alġaqsruiñiptigun ilivsiññun. Tuyuutitun inŋitchusi aglaaguruatun misuktautitaqługich, aglaan Ilitqusiġiksuaŋagun iñuuruam God-im. Kamaginiataŋitkisi pitqurat titiqtuurrat saapaqayaamun uyaġaŋmun, aglaan iñuuvlusi God aglaŋaruatun iḷivḷugu pitquramiñik uummativsiññun.

⁴ Tavra allaŋŋuqtauŋaruat iñuutchivsi nalupqisuŋisitkaanŋa, alġaqsruiñiġa akuqtuġnaqtilaaŋanik God-mun Christ ikayuqłuŋa.

⁵ Isumanaqsiḷiġuŋitkiga uvaptuġruiññaq piḷḷasiñasugalugu iñiqsiñiq tainnatchimik savaamik. God-im suaŋŋasiqsuġaaŋa,

⁶ nalliummatillasivḷuŋa alġaqsruutigiyumiñaqługu God-im nutauruaq sivunniuġutaa iñuich annagniksraŋatigun. Taamna nutauruaq sivunniuġun inŋitchuq utuqqaqtun sivunniuġutitun, aglausimaruatitun pitqurani, tuqqunmik tatavsautiqaqtuatun kamaksriŋitchuni. God-im nutauruaq sivunniuġutaa iñuggutauruq isuitchuamun Ilitqusiġiksuakun.

⁷ Utuqqauruaq sivunniuġun titiqtuurrauŋaruq uyaġaŋmun, aasii iñuich iḷitchuġipkaqługich piḷuutautilaaŋanik kamaksriŋiññiq God-mik aasii tuqqutaullavluni. God-im aitchuutigiŋagaa qaumaniqpaqaqługu Moses unnii kiiñaŋa qiŋŋaġnaqsiŋaruq Israel-guruanun qiñilgunaiqsaallaan. Taamnaasii qaumaniqpak nalunaqsiñasuaŋammiuq.

⁸ Aasiiḷi igḷuani, qaummaġił̣haasugruktuaq piqatauruq nutauruamun sivunniuġunmun, qanuq Ilitqusiġiksuam itqanaiyaġai iñuich iñuuniksraŋannun qiḷaŋmi.

⁹ Iñuich aliuŋarut tautukamirruŋ qaumaniqpak utuqqauruaq sivunniuġun aitchuutaumman, iḷitchuġipkaġmatiŋ suksraunġiqsauniksramik. Qanutułhaaq aliuġnaqtigiruq nutauruaq sivunniuġun iḷitchuġipkairuaq iñuŋnik nalaunŋasipkaqtauyumiñaqtilaaŋannik sivuġaani God-im.

¹⁰ Aasiisuli nutauruaq sivunniuġun qanutupayauraq aliuġnałhamaaqtigiruq utuqqauruamiñ sivunniuġunmiñ, utuqqauruaq sivunniuġun iḷiḷḷavlugu aliuġnautiqaŋaitchuatun qaŋaunnii.

¹¹ Qanuq utuqqauruaq sivunniuġun isukłiñŋaruaq aliuġnaŋakpan, nutauruaq sivunniuġun isukłitchumiñaitchuaq aliuġnałhamaaqtuksrauruq.

¹² Uvagut iḷisimavlugu God-im nutauruaq sivunniuġutaa isukłitchumiñaisilaaŋanik, minitchiḷuta iḷaŋanik alġaqsruiŋitchugut.

¹³ Moses-tun piŋitchugut matutuliqsuatun kiiññamiñik Israel-guruat tautuquŋił̣ł̣ugich qaumanini nalunaqsisaiññaqtilaaŋanik.

¹⁴ Iliŋich kaŋiqsiḷaiñŋarut, qanuq uvlupak-unnii taiguaqamiŋ God-im utuqqauruamik sivunniuġutaanik, kaŋiqsiḷaitchut simmausiŋatilaaŋanik ilaan nutauruamik sivunniuġutaanik Christ-kun. Taamna ittuq Moses-gum taalutaqtuutaatun piiŋaitchuatun suli. Kisianik ukpiliġmata Christ-mun taamna taalutaq piiqsausuuruq.

¹⁵ Aaŋ, uvlupaŋmun-aglaan isumaŋich taalutaqtuqtuatun suli ittut naalaġnikamisigik Moses aglaaŋi, iñuum taiguaġmagich.

¹⁶ Aglaan iñuk mumikami Ataniġmun kaŋiqsisuuruq, taalutaq piiġmatun isumaŋaniñ.

¹⁷ Atanġum tavrani sivuniġigaa Ilitqusiġiksuaq aitchuiruaq iñuggunmik, aasii Ilitqusiġiksuaq iñuŋmiinman, taamna iñuk atanniqsimaraitchuq.

¹⁸ Tavraasii uvagut ukpiqtuaguruaguut taalutaitchugut iriġumiñaġluta Atanġum qiḷaŋmiŋŋaqtauruamiñ qaumanġaniñ. Uvagut qiñiqtuiññaqaptigu Ataniq ukpiġutikun, allaŋŋuqtuaqtugut ilaatun iḷisaiññaqłuta, suli Atanġum Ilitqusiġiksuaŋata kiikaa iḷisaiññaqtitkaatigut ilaatun.