2 Corinthians 2 - Iñupiatun Mumiksat Uqalugiksuat

¹ Sivunnipiaŋaruŋa isumaaġnaqtuakun ullatqiguŋił̣ł̣usi.

² Qanuq uvaŋa quviasuutaiqsitkuvsi, allamik iñuŋmik quviasaaqtiksraitchuŋa ilivsi quviasuutaiqsittaġma quviasaaŋisuaġuvsiŋa.

³ Suli tuyuŋaruŋa aqulliġñi tuyuutimni tainna tuyuusivsun, isumaat chaktitquŋił̣ł̣uŋa ilivsiññun ullakkuvsi quviatchaktitiksramnun, qanuq nalupqisuŋitchuŋa quviasuunma quviatchaktinniaġmigaasi.

⁴ Tuyuqavsi, iłuiḷḷiupiaġataŋaruŋa isumaaqłuŋalu iḷumni, qiaŋaruŋaunnii, mamiatchaquŋitkivsi aglaan iḷisimatqugivsi qanutupayauraq piviuttaġitilaavsiññik.

Suliqutigiŋaiġun Piḷuksiruamun

⁵ Aglaan taavruma iñuum isumaalluksairuam kisima isumaaqtinŋaitkaaŋa, aglaattauq ilivsi isumaaqtitaŋammigaasi, tunikłisaqługu uqallausiġigiga.

⁶ Taamna iñuk naamaruamik tatavsausiaqaaniktuq atisivḷusi naġġuksruqavsiuŋ.

⁷ Tavraasii paŋmapak suliqutigiŋaigaksraġigiksi itqaumaŋaiġḷugu killuliqiaŋa, aasii qapiŋaisaaġlugu payaritquŋiḷḷugu mamiatchaunmun igḷutuġumiñaiġḷugu tatavsausiani.

⁸ Tavraasii iŋiulagivsi tuniqsiḷaatqiquvlugu piviuttaqqutiksi ilaanun.

⁹ Taamnalu pisigivlugu tuyuŋagivsi, uvaŋa uuktuaġukłusi iḷitchuġisaġluŋa kamakkutiqaġniaqtilaavsiññik supayaakun.

¹⁰ Kialiqaa killuliqiaŋa suliqutigiŋaikkaqsi itqaumaŋaiqł̣ugu, uvaŋaptauq suliqutigiŋaiġmigiga itqaumaŋaiqł̣ugu. Suliqutigiŋaiŋagupku killuliqun itqaumayumiñaiġḷugu, suliqutigiŋaiġiga pisigivlusi, suli pisivlugu Christ.

¹¹ Pitchaiḷisaqługu Tuunġaq atiqaqtuaq Satan-mik akimmatiksraŋaniñ uvaptiŋniñ, qanuq naluŋiñmigivut ilaan piraġausiŋi.

Paul Piŋiksraqtuq Troas-mi

¹² Tikiññama Troas-mun alġaqsruutigisukługu tusaayugaaġiksuaq Christ-kun, Atanġum piviksriñŋagaaŋa alġaqsruitquvluŋa,

¹³ aglaan isumaga tutqiksiḷḷaiŋaruq paqinŋiññapku aniqatiga Titus tavrani. Tavraasii qimaŋagitka aasii iglauvluŋa Macedonia-mun.

Christ Akimmatauruq

¹⁴ Aglaan God quyyavigirauli ataramik akimapkairuaq uvaptiŋnik pisigivlugu atausiŋŋuqatauŋaniqput Christ-lu, suli tilisiruaq uvaptiŋnik sumulliqaa, quliaqtuaġutitquvlugich iñuich Christ-mik.

¹⁵ Qanuq iviġakkikput God alġaqsruutigikaptigu Christ akunġanni iñupayaat, tamatkua annaurrauniaqtuallu suksraunġiqsauniaqtuallu.

¹⁶ Tamatkua suksraunġiqsauniaqtuat qanuqpisiiḷḷivḷugich tuquniksraŋannun piḷuusiqiraulutiŋ, tamatkuali annaurrauniaqtuat attaqsraŋaivsaaqługich iñuggunmik isuitchuamik. Kiña nalliummativa alġaqsruutigiyumiñaqługu tusaayugaaġiksuaq?

¹⁷ Kisimiŋ tamatkua uvaptiktun ittuat, alġaqsruiruat piŋŋuaġutaitchuakun, nalunaiqsaŋi God-im, alġaqsruiruat iḷumun ittuamik Christ-kun, God-im takkuani pimmatun. Uvagut inŋitchugut allatun iñugiaktuatun iñuktitun alġaqsruiruatun God-im uqaluanik iḷumun inŋaiqł̣ugu, maniññagniutigigiññaqługu.