2 Corinthians 1 - Iñupiatun Mumiksat Uqalugiksuat

¹ Ukua tuyuutit qairut ilivsiññun Paul-miñ tiliraŋaniñ Jesus Christ pisuutaagun God-im, Timothy-miḷḷu aniqatiptiŋniñ. Tuyuutaurut aŋaiyyuliqiruaŋiñun God-im Corinth-miittuanun, tamatkunuŋalu iluqaiññun God-im ilaaguaqtaŋiñun iluqaani nunaŋani Greece.

² Nagliktuusiaqpaqaġitchisuq tutqiunmiglu God-miñ Aapaptiŋniñ, Ataniptiŋniḷḷu Jesus Christ-miñ.

Paul-gum Quyyavigigaa God

³ Nanġaġlakput God, Aapaŋa Atanipta Jesus Christ, Aapauruaq nagliktauvluni suli qapiŋaisaaqłiiḷḷavluni.

⁴ God-im qapiŋaisaaġuugaatigut iluqaiññi iłuiḷḷiuġutiptiŋni, uvaptiŋnulli qapiŋaisaaġumiñaquvlugich iñuich allat iłuiḷḷiuliqpata qanusipayaakun iłuiḷḷiuġutikun, tainnaptauq God-im qapiŋaisaaqłiisiatun uvaptiŋnik.

⁵ Qanutupayauraq iḷaŋiutikapta Christ nagliksaaġutigiŋakkaŋiñun, tainnatuttauq qanutupayauraq Christ qapiŋaisaaġuummigaatigut.

⁶ Iłuiḷḷiuqtitaukapta tusaayugaaġiksuaq pisigivlugu, taamna qapiŋaisaaġutauruksrauruq ilivsiññun annaurrauniksravsiññullu. Suli God-im qapiŋaisaaġmatigut, qapiŋaisaaqtausuummiusi, qanuq iḷitchirusi uvaptiŋniñ qimmaksaliyairrutikun igḷutuġumiñaqsivḷugich iłuiḷḷiuġutit, iłuiḷḷiuqtitaukavsi uvaguttauq igḷutukkaptiŋnik.

⁷ Nalupqisuŋitchugut ilivsi iłuiḷḷiuqtitaksrauniġuvsi uvaptiktuttauq, qapiŋaisaaġniaġmigaasi God-im uvaptiktun.

⁸ Nalutquŋitkivsi aniqatiit, qanutun suamatigivlugu iłuiḷḷiuqtitauŋatilaamnik nunaŋani Asia-m, iłuiḷḷiuqtitauvaił̣ł̣uŋa qaaŋiqł̣uguunnii igḷutuiyumiñaġniġa, nalupqitchaŋagaluaqtuŋa iñuuniaqtilaamnik.

⁹ Tavraami, iḷumutun isumalipiaġaluaqtuŋa tuqquviksraġa tikiññasugalugu. Taavruma nalautaġma iḷisautigaaŋa nayummatigiraksraġiŋipiaqtilaamnik uvamnik, aglaan God-mun aŋipkairuamun tuquruanik.

¹⁰ Ilaan iñuuliŋagaaŋa tuquruksraġuqama tuqquviksramaaġnaitchuamiñ, suli iñuulivsaaġniaġaaŋa. Suliami niġiugigiga iñuuligaluamiiġñiaqtilaaġa ilaanun.

¹¹ Suli ikayugaksraġigivsiŋa aŋaiyyutiluŋa, iñugiaktuat iñuich quyyatiksraqaġumaut God-mun iñuuliraunipkun, kiuvlugich iñugiaktuat iñuich aŋaiyyutiŋich.

Paul Allaŋŋuġaa Sivunniuġutini

¹² Quyaruŋa isumama killuliqirualiŋiñmaŋa itqaġaġikapku iñuuniaġusiġa sivuġaanni iñupayaat, ilivsił̣haaġluami takkuvsiññi, qanuq iñuuŋaruŋa piḷuutaitchuakun piŋŋuaġutaitchuakullu sivuġaani God-im. Iluqaan iññiqiniġa aulanŋitkaa iñugruiññaum pisaasuutaata, aglaan God-im nagliktuutiqpaŋata.

^13-14 Tavra tuyuutitka ilivsiññun taiguallagisi kaŋiqsiḷḷuatallagisiḷu, malġugnik sivuniqaŋitchut. Paŋmapak-unnii kaŋiqsimmaġiksiŋaitkaluaġuvsiŋa, kaŋiqsimmaġiksitquyumagaluaqtuŋa ilivsiññun, kanŋugiyumiñaiġḷuŋa uvluani Atanipta Jesus qaikpan, uvaŋaptauq kanŋugiyumiñaiñmatun ilivsi.

¹⁵ Qanuq uvaŋa nalupqisuŋitchuŋa ilivsi arguasuŋisilaavsiññik piŋŋuaŋisilaamnik, ullaqqaaġuŋagivsi aasii ullatqiḷgiḷḷusi, piqaquvlusi malġuiqsuaġlugu quviasaaġusiamik.

¹⁶ Innauvva, ullagukkivsi sivunmukkuma nunaŋiñun Macedonia-m, aasii utilgitkuma Macedonia-miñ nalaulgiḷḷusi, ilivsiññun upaluŋaiyaquluŋa iglauniksramnun Judea-mun.

¹⁷ Tainna piyumakama, isummitqigaqsiññaqtuaguvik? Naumi. Sivunniulaitchuŋa uvaŋa nunam iñuŋisun, aŋiqqaaqłutiŋ piḷaitchuatun.

¹⁸ Nalupqinaisilaaŋatun God-im iḷumun itilaaŋa, tainnatun uqaluutivut ilivsiññun aŋŋautaugiññaŋaitchut piyumaaŋiḷḷapta.

¹⁹ Silas-lu Timothy-lu uvaŋalu alġaqsruutigiŋagikput ilivsiññun Iġñiŋa God-im, Jesus Christ. Ilaa inŋitchuq iñuktun aŋiqqaaqłuni taŋŋiiḷaitchuatun. Ilaan ataramik pisuugaa suna piñiaġnivḷugu uqallausiġirani.

²⁰ Qanuq ilaagun iluqaġmiŋ God-im unniqsuqłiisiŋi taŋŋiŋarut. Taamna pisigivlugu uqallausiġisuugikput Amen, ilaagun nanġaqaptigu God.

²¹ God-im atausiŋŋuqataupkaŋagaatigut uvagullu ilivsiḷu Christ-mun, suli ilaaguaqłuta ilaan savaamiñun,

²² nalunaiñŋutchiqł̣uta inmiñuksrivḷuta, Ilitqusiġiksuani iñuupkallasivḷugu uummatiptiŋni iḷisimatquvluta ilaanun pigitilaaptiŋnik.

²³ Qaisukkaluaŋŋaġmaunnii Corinth-mun, qaiŋitchuŋa. God iḷisimaruq iḷumun ittuamik uqaqtilaamnik ilivsiññun. Qaiŋirrutigigiga qanusiġaġuŋił̣ł̣usi.

²⁴ Atanniqsimasuŋił̣ł̣usi ilivsi ukpiġutisiḷu, qanuq ukpiqtuagulluataqavsi, aglaan savaqatigisukkivsi quviasuutivsaaqaquvlusi pisigilugu ukpiġutiksi.