1 Timothy 6 - Iñupiatun Mumiksat Uqalugiksuat

¹ Iluqaġmiŋ kivgauruat isumakkutiqaġluataqtuksraurut ataniġikkaġmiŋnun, kiñaliqaa uqallautiksraitchumauq pigiitchualiḷugu God-im atqa, iḷisaurrutikpullu.

² Tamatkua kivgat ukpiqtuaguruanik ataniqaqtuat kamaksriruksraurut pisigilugu aniqatiginiḷugich ataniġikkatiŋ. Savautilluataġniałhaaġlisigik pisigilugu tamatkua kivgauruat savautikkatiŋ ukpiqtuaguniḷugich piviuttaġivlugich. Ilivich iḷisaurrutigiraksraġigitin alġaqsruutigilugiḷḷu tamatkua.

Iḷumun Inŋitchuat Iḷisaurrutit Suġalipiallu

³ Kiñaliqaa iḷisaurrikpan allauruanik iḷisaurrutinik iḷumun ittuaniñ uqaluŋiñiñ Atanipta Jesus Christ, iḷisaurrutiniḷḷu ukpiġikkaptiŋniñ god-tiliqinikun,

⁴ ilaa kamanaqsiḷiqtuq, naluruġlu sumik. Pigiitchuamik kipiġniuttaqaqtuq uqavaaġutiksramun qanaaġniksramullu pisigivlugich uqaluich. Taamna salapqiisuuruq killuqsrautinik, atinġiutinik, pisaaŋŋatinik, pigiitchuakun iḷimasuutinik,

⁵ suli iñiqługu aŋalatchiruq uqavaaġutinik akunġanni iñuich isumatummaaġiitchuat, suli ayuqtuat iḷumun ittuamik, isumavlutiŋ aŋaiyyuliqiniq suġallagniutaunasugalugu.

⁶ Tavra iñuk god-tiliqiruagukami iḷumun ittuamik suġalliruq, apaigigumigich pigikkani.

⁷ Qanuq sumik qaġġirriŋaitchugut nunamun anikapta, suli tuqugupta aullaurriyumiñaiñmiugut sumik nunamiñ.

⁸ Tavraasii niqiksraqaġupta annuġaaksraqaġlutalu taapkua apaigiraksraurut uvaptiŋni.

⁹ Aglaan iñuich suġallisuktuat ikł̣igutchaktitausuurut aasii pisaġipkaqłutiŋ iñugiaktuanun isumalluaġiirrutinun anniaġutauruanullu kipiġniuġutinun, tikiurrisuuruanun iñuŋnik suksraunġiunmun.

¹⁰ Qanuq iñuich piviuttaqsriruat maniŋñik killukuaġutigisuugaich qanusipayauranik pigiitchuanik. Iñuich iḷaŋich kipiġniuqpaił̣ł̣utiŋ maniŋñun asiñuŋarut ukpiġunmiñ aasii inmiŋnun isumaaqpautiksriuqłutiŋ.

Iḷisaurrutit Timothy-mun

¹¹ Aglaalli ilivich, iñua God-im, pitchaiḷikkich iluqaisa tamatkua. Siġġaqilutin iłuaqtualiqiniġmun, god-tiliqiniġmun, ukpiġunmun, piviuttaqqunmun, tuniqsimmanmun, pikałaktaŋirrunmullu.

¹² Aqpaliurraqtitun akimasaqtuatun akiññagukłuni, tainnatulli pisuqtilaaġiñ savaan piḷḷuataġniaġlugu piññaktaaġisuglugu iñuggun isuitchuaq. God-im ququaŋagaatin taavrumuŋa iñuggunmun isuitchuamun, ilivich iñugiaktuanun iñuŋnun iḷisimanaqsivḷugu piŋakapku ukpiliġñiġiñ Christ-mun.

¹³ Piraksriġikpiñ tamatkuniŋa takkuani God-im aitchuiruam iñuggunmik supayaanun, takkuaniḷu Christ Jesus uqalugaaġluataŋaruam sivuġaani Pontius Pilate,

¹⁴ kamaksritquvlutin iluqaiññik ilaan piksraksriutiŋiññik iliŋnun, iñuŋmun kimulliqaa pasiyumiñaiġḷutin paŋmapaŋmiñ qaiñiŋanun aglaan Atanipta Jesus Christ.

¹⁵ Ilaa salapqiqsitauniaqtuq nalaunŋasikpan piviksriutaa God-im kisimi sapiġñaqtuam quvianaqtuavlu Umialgata umialgich, Atanġatalu atanġich,

¹⁶ kisimisualuk tuqulaitchuq, suli iñuuruq qaninŋaġnaitchuami qaummaġmi, iñuum qaŋaunnii tautuŋaitkaa naagga tautukkumiñaitkaa. Ilaa nanġausiaqaġli isuitchuamun atanniqsimmannigli. Amen.

¹⁷ Suġallirualli mattumani nunami piraksrikkich kamasaaġutigitquŋiḷḷugich suġalitiŋ, naaggaunnii arguaŋŋatiqaquŋiḷḷugich nalupqinaqtuanik suġaliġnik, aglaan God-mik atqunaqługu piqaqtitchiruamik uvaptiŋnun supayaanik quviasuutigitquvlugich.

¹⁸ Piraksrikkich suġalliruat nakuurualiqitqulugich nauttaaŋaiġḷugu nakuuruanik savaaqaġniq, suli anniqsraŋaiġḷutiŋ piyummatiqaqulugich, saqqiqutiqallaatqulugich piiḷḷiuqtuanun.

¹⁹ Tainna pigumiŋ tutquiñiaqtut quviasuusiaksramiŋnik qiḷaŋmun, aasii tatpaŋmani quviasuutigilluataaqsiḷugu iñuggutipiaġatavaalluk.

²⁰ Suuramikunnii piŋiññagich, Timothy, sut God-im qaunaksraġitqukkaŋi iliŋnun. Pitchaiḷiiñ god-taitchuat uqausiŋiññik asiḷiqqutikullu uqavaaġutinik taivḷugich iḷisimmanmik, iñuich iḷaŋisa killukun sivuniqaqługu iḷisimman uqausiatitun.

²¹ Qanuq iñuich iḷaŋisa iḷisimmatiqaġnigaluaqłutiŋ, taamna pisigivlugu tammaiŋagaat nalaunŋaruakun ukpiġutiqaġniq. God naglikkutiqpaqaġli iluqavsiññun.