1 Timothy 5 - Iñupiatun Mumiksat Uqalugiksuat

Qaunakłaaġniq Ukpiqtuanun

¹ Suaŋnagu utuqqanaaq aglaan araktuaġuŋ aapagimmatun. Aŋalatkich nukatpiat aniqatiktun iḷiḷugich.

² Utuqqanaat aġnat aŋalatkich aakagimmatun, suli niviaqsiat aniqatiktun, aŋalallugich piḷuutaitchuakun.

³ Suuŋiḷaġinagich uiḷgaŋaruat ikayuqtiqaqtuksraupiaqtuat.

⁴ Uiḷgaŋaruaq miqłiqtuqaqpan naagga tutaaluuqaqpan piḷḷasiŋaruanik, tamatkua qaunagilirruŋ ilaa, puttuqsriḷutiŋ tainna pigumiŋ paaqłiiñiḷuktilaamiŋnik aŋayuqaamiŋnik ataataamiŋniglu, aasii tainna pikamiŋ savaurrirut God-mik, iviġakługulu.

⁵ Aġnaq uiḷgaŋaruaq qaunaksriksraił̣ł̣uni niġiuktuaguruq ikayuusiaksramiñik God-miñ, aasii aŋaiyyuuqłuni apiġivlugu unnuakkaluami uvlumiḷu ilaanun ikayuquvluni.

⁶ Aglaalli uiḷgaŋaruaq qaunakł̣aaŋił̣ł̣uni aliasuŋiññiaqsiññaqtuaq, iñuugaluaŋŋaġmi tuquŋaruatun ittuq sivuġaani God-im.

⁷ Taavrumiŋa piraksrikkich, pasiñaġumiñaitchumaut.

⁸ Kiñaliqaa pamatchiŋitkumi nanmiñiġmiñik, taapkuniŋałhaaqami nanmiñiq qitunġamiñik, iñuuŋitchuq tuvraġlugu ukpiġikkaqput, aasii pigiił̣haaqtuq unnii ukpiŋaitchuamiñ.

⁹ Kiñapayaaq kisiuqatiginagu uiḷgaŋaruanun ukiuqaqtuaq inuqsimalugu piŋasukipiaq ukiuq. Aasiisuli uiñiŋaruksrauruq atautchimi.

¹⁰ Suli uiḷgaŋaruaq uqausikkusiaqaġluataqtuksrauruq savaalluatamigun, iñukkuksaiḷḷuataŋaluni miqłiqtumiñik, tukkuliisuuluniḷu iglaanik aimaaġviŋmiñun, iqaġisuulugiḷḷu ukpiqtuat isigaŋich, ikayuġuulugiḷḷu iłuiḷḷiuqtuat, nakuurualiqiluniḷu qanusipayaakun.

¹¹ Aglaan iḷaḷiutinagich uiḷgaŋaruanun nutauŋŋaġmiŋ uiḷgaŋaruat. Qanuq pisuguunmiŋni uiñigulitqikkumiŋ saquniaqtut savaurriḷḷuataġniksramiŋniñ Christ-mik,

¹² aasii tainna pikamiŋ pasiraurut navguiñikun unniqsuqłiisiqqaamiŋnik ilaanun.

¹³ Taamnatualuuŋiñmiuq, iḷisaqtut iḷatchiġñiġmik, kukiḷuksiññaqłutiŋ igluniñ iglunun, aasiisuli pigiił̣haaqtuaq iḷisaqługu uqqaqtuniq, iḷaksianniktuagurullu uqaqłutiŋ uqaluksraġiŋisamiŋnik.

¹⁴ Tamatkua pisigivlugich nutauvlutiŋ uiḷgaŋaruat tuvaaqatiniqugitka, miqłiqsiuġlich, qaunagilugiḷḷu aimaaġvisiŋ, uumigirivut uqautikkutiksraitchumaut pigiitchuamik uvaptigun.

¹⁵ Qanuq iḷaŋich uiḷgaŋaruat asivaaniŋarut malikługu Tuunġaq.

¹⁶ Kiñaliqaa ukpiqtuaguruaq uiḷgaŋaruaqaġumi qitunġaamiñi ilaan qaunagiraksraġigai, aasii naŋniŋiḷḷugich aŋaiyyuliqiruat ikayuiyumaut uiḷgaŋaruanik ikayuqtiksraipiaqtuanik.

¹⁷ Umialiŋnat aŋalatchiḷḷuataqtuat aullarrauniġmik nalliummatirut malġuktun akiḷiusiamik, tamatkuałhaaq siġġaqiruat alġaqsruivḷutiŋ iḷisaurrivḷutiglu,

¹⁸ qanuq Bible uqaluŋich uqaqtut inna, “Sigguġutituġniaŋitkiñ qimukti amiġaiyairuaq tunmaqługich palauvaksrat,” suli “Savakti nalliummatiruq akiññaktaaksramiñun.”

¹⁹ Naalaġniñasi suuramikunnii pasikkusiaŋagun umialiŋnam, malġuk naagga piŋasut uqautigiŋisuaqparruŋ pasiḷugu.

²⁰ Tamatkuali sivunmuuruat piḷuunmi, suakkich takkuanni iñuich iluqaġmiŋ, kisiŋŋuqtat piḷuksiŋitchuat sivuuqqatiqaġumaut piḷuksiñiksramun.

²¹ Takkuaŋni God-im Christ-lu Jesus piḷuutaitchuallu isaġulgich, piraksripiaġikpiñ kamagitquvlugich tamatkua piraksriutitka, iñuich iḷaŋich iviġaumagiłhaaŋaiġḷugich allaniñ iñuŋniñ supayaatigun ilivich pikkapkun.

²² Qilamiqsruuttaġinagu iḷisiñiaġniq argaŋnik ilaaguaqsiñiksramun iñuŋmik savaaŋanun Atanġum. Patchisauyumiñaqsiñak allat iñuich piḷuutiŋiññun. Qaunakkuiñ iliŋnik piḷuutaitchuglutin.

²³ Tavraŋŋaaglaan imiqaġnak imiłhiñamik, aglaan wine-tułaurallaalutin pisigilugu aqiaqqun, qanuq naŋitchuurutin akulaitchuamik.

²⁴ Piḷuutiŋich iñuich iḷaŋisa nalunaitchut, aasii taamna pisigilugu nalupqinaitchuq isivġiqsauniaqtut. Aglaan piḷuutiŋich allat iḷisimanaqsiñiaqtut aquvatigun.

²⁵ Tainnatuttauq savaalluatat nalunaiñmiut, nalunaiñŋitkaluaġumikunnii iriqsimaanikkumiñaitchut.