1 Timothy 3 - Iñupiatun Mumiksat Uqalugiksuat

Umialiŋnat Aŋaiyyuliqiruani

¹ Una uqaluk iḷumun ittuq. Kiñaliqaa kipiġniuġumi savaaŋanun umialiŋnaunġum, ilaa kipiġniuqtuq savaaġiksuamik.

² Umialiŋnat naġġukkusiagitchuksraurut, atautchimik nuliaqaġlutiŋ, qaaŋiulaaŋaŋiḷḷutiŋ, inmiŋnik aŋalalluataġlutiŋ, pialaŋiḷḷutiŋ, tukkuulutiŋ, iḷisaurriyumiñaġlutiŋ,

³ taaŋŋalaiḷḷutiŋ, piaqłuktaiŋiḷḷutiŋ pikałaktaqtuaguŋiḷḷutiŋ, qanaaġuksiññaqtuaguŋiḷḷutiŋ, piviuttaqsrałhaaŋaiġḷutiŋ maniŋmik.

⁴ Umialiŋnat aŋalalluatapiagaksraġigaich miqłiqtutiŋ, kamaksripkaġlugich, qutchiksuakullu isumakkusiaqallasiḷugich.

⁵ Qanuq iñuk naluruaq aŋalatchiñiġmik miqłiqtumiñik, qanuġluni qaunagiyumiñaqpagich God-im aŋaiyyuliqiruaŋi?

⁶ Umialiŋnaġuġniaqtuaq ukpiqtuaguqqammiqsuksrauŋiñmiuq, iḷaanni kamasaaliqpiaqtuq aasii tatavsaqtauluni Tuunġaqtun.

⁷ Sulivsauq isumakkusiaqaġluataqtuksraummiuq ukpiqtuaġuŋaitchuaniñ. Tainnainŋisuaġumi, ilaa kanŋusaaġutauniaqtuq aŋaiyyuliqiruanun, aasii Tuunġaġmun payaripkaġluni.

Tiikauruat Aŋaiyyuliqiruani

⁸ Tiikauruat tainnatuttauq iñuulluataġniaqtuksraummiut, malġuŋnik uqaluqaŋaiġḷutiŋ, imiqpaiñŋaiġḷutiŋ wine-mik, piḷḷatutaiḷḷutiŋ pigiitchuakun maniññaŋniaġniġmun.

⁹ Iliŋisa ukpiġipiagaksraġigaat iḷumun ittuaq nayummataulutiglu iḷumun ittuanun iḷisaurrutinun Christ-kun, qiñiġnaił̣ł̣uni kaŋiuruamun ukpiġunmiŋnun.

¹⁰ Suli tiikauruat uuktuaqtauqqaaġlich, aasii iḷumun itilaaqtauganikpata, savarraqsiḷich tiikauruatun.

¹¹ Nuliaŋich tainnatuttauq iñuulluataġniaqtuksraummiut, uqqaqtuŋaiġḷutiŋ, aglaan qaaŋiulaaŋaŋiḷḷutiŋ, pitqiksiġautaiḷḷutiŋ supayaakun.

¹² Tiikauruat nuliaqaġlich atautchimik, suli aŋalallisigik miqłiqtutiŋ igluqatitiglu iłuatun,

¹³ qanuq tamatkua savaurriḷḷuataqtuat tiikauniġmi piññaktut qutchiksuakun isumakkusiamik inmiŋnun aasii uqautiqaġumiñaqtut ukpiġun mik taluqsrautaiḷḷutiŋ pigikkaptiŋnik atausiŋŋuqatigikaptigu Christ Jesus.

Kamanaqtuq Kaŋiqsiñaiñŋaruaq

¹⁴ Tuyuksriullaġma ukuniŋa tuyuutinik piyummatiqaqtuŋa ullagumavlutin tautuŋnasuaġukłutin.

¹⁵ Aglaan qaikallaŋisiġuma ukua tuyuutit iḷisimapkaġniaġaatin qanuq iñuusiqaqtuksrautilaaptiŋnik God-mun igluqatauniptiŋni, aŋaiyyuliqiruaguvluta iñuuruamun God-mun. Ilaan aŋaiyyuliqiruaŋi tamatkuagurut kamaksriruat, ukpiġnaqtuakullu nayummataurut iḷisaurriruat God-im iḷumun ittuamik uqaluanik.

¹⁶ Kialiqaa piiḷaaġiyumiñaitkaa qanutun kamanaġniŋa kaŋiqsiñaiñŋaruam ukpiġikkapta. Christ qiñiġnaqsiŋaruq timiqaqłuni iñuktun, iḷumun inniŋagaa Ilitqusiġiksuam, tautuŋagaat isaġulgich. Ilaa alġaqsruutauŋaruq akunġanni nunauruat, ukpiġiŋagaat iñuich, mayuurrauŋaruq qiḷaŋmun.