1 Timothy 2 - Iñupiatun Mumiksat Uqalugiksuat

Qanuq Ukpiqtuat Aŋaiyyuniksraŋat Piḷġusiksraŋallu

¹ Tavra apiġipiaġivsi aŋaiyyutigiłhaaquvlugu sivulliġilugu aŋaiyyutilugich iñupayaat, qiññuaqtuutilugich God-mun nagligitqulugich, quyyavigilugu supayaatigun ilaan piñiakkaŋigun pisilugich iñuich.

² Aŋaiyyutilugich umialgich iluqaisalu ataniġnaqusiraqtuat, iñuuyumaugut tuaksruitchuamik tutqigñaqtuamiglu, god-tiliqiruamik isumakkusiaqaġluataqtuamiglu suraġaġnipayaami.

³ Taamna nakuuruq, suli iviġaumanaqtuq God-mun Annaurriptiŋnun,

⁴ kipiġniuqtuamun iñupayaat annaurrautquvlugich suli iḷitchuġitquvlugich ilaan iḷumun ittuaŋanik.

⁵ Qanuq atausiuruq God, suli atausiq atisipkaiñiaqti God-miglu iñuŋniglu, iñuk Christ Jesus,

⁶ piviksraq nalautinman tuqutinŋaruaq inmiñik tasuqsaqługich iñupayaat. Taamna ukpiġnaqsiḷġutauŋaruq God-mun annaurrautqutilaaŋannik iñupayaat.

⁷ Suli taamna pisigivlugu nalunaiqsauŋaruŋa alġaqsruitquvluŋa iḷisaurritquvluŋalu Jew-guŋitchuanik God-im annaurrisaanik iñuŋnik ukpiliġmata. Sagluŋitchuŋa. Iḷumun ittuamik uqaqtuŋa.

⁸ Kipiġniuġutigigiga sumipayaaq iñuich aŋaiyyutquvlugich isaaġutilugich argatiŋ, iñuuniaqtuaguruat iḷumun pisilugu God qinnautaiḷḷutiŋ naagga qanaaġutaiḷḷutiŋ iñupayaanun.

⁹ Aġnat annuġaaqtuqtuksraugaluaqtut qaaŋiulaaŋaŋaiġḷutiŋ isumattutikullu iruġnaiġḷutiŋ annuġaaġlutiŋ. Aġnat ukpiqtuat nalunaigiraksraułhaaŋaiġḷugich nutchiqiniġmikkun, naagga qiñiyunaqusiqsuġniġmikkun uyamitquanik akisuruanik, naagga akitchuuqtinniġnik annuġaanik,

¹⁰ aglaan iḷisimanałhaaġlutiŋ savaalluatatigun nalliummatiruatigun aġnanun aŋaiyyuliqiniruanun.

¹¹ Aġnat naalaġniruksraurut iḷisaurriruanun nipaisaaġlutiŋ piuniaŋaiġḷutiglu.

¹² Iḷisaurripkaġumiñaitkitka aġnat naaggaunnii ataniġnaqutiqaqulugich aŋutinun. Nipaisaaqtuksraurut.

¹³ Qanuq Adam iñuġuqtitauqqaaŋaruq, maanna Eve.

¹⁴ Suli Adam sagluqirauŋaitchuq, aglaan aġnaq sagluqirauŋaruq kamagiŋił̣ł̣ugu God-im pitquraŋa.

¹⁵ Tavraasii God-im aġnat piqaqtitkai kiiqsiuġunmik isumaaġunmiglu miqłiqtuŋich aniñiaġaġimmata, aglaan ilaan annautiniaġai iliŋisa ukpiġikpanni, iñuuyugaġlutiŋ pialaŋiḷḷutiŋ, nakuulutiŋ, piviuttaġinaqtuanik iñuusiqaġlutiŋ.