1 Timothy 1 - Iñupiatun Mumiksat Uqalugiksuat

¹ Ukua tuyuutit tuyuġigai Paul, tilirautquŋakkaŋata piraksriivḷuni God-im Annaurriptalu Jesus Christ annagummatigikkapta.

² Tuyuutaurut iliŋnun Timothy, iġñipiaġataptun ittuamun ukpiliqsinŋavlutin Christ-mun. God-tiptuq Aapam Christ-lu Jesus Atanipta iviġaummatigilisin nagligilutillu tutqiutiqaqtillutillu.

Paul Kiliktuutiŋi Iḷumun Inŋitchuatigun Iḷisaurrutitigun

³ Ephesus-miitqugikpiñ, taimanisun Macedonia-muksaqama apiġipiaŋavlutin. Iñuich iḷaŋich taamani iḷisaurrivḷutiŋ iḷumun inŋitchuanik iḷisaurrutinik, aasii uqallautiraksraġigitin iḷisaurriŋaiqulugich iḷumun inŋitchuanik.

⁴ Uqautilugich aptatiqaŋaiqulugich unipkaalianik, maŋŋuumiŋniglu takisipiaġataqługich atiqaġviḷiamiŋnik, qanuq tamatkua aguirrutaugiññaġuurut uqaġlaqutiksranun, ikayuutaulaitchut nalautchiñiaġniġmun God-im sivunniuġutiŋiñik, ukpiġunmullu agliḷaaġutaulutiŋ piḷaitchut.

⁵ Piraksriġikpiñ uqallautitquvlugich iñuich piviuttaqqutimmaġiksaaliquvlugich avanmun, naġġutchaktaŋaiġḷutiŋ isumamiŋni, suli suaŋaruamik ukpiġutiqaquvlugich.

⁶ Iḷaŋich iñuich saquŋarut iḷumun ittuaniñ taŋiġitchuanun uqavaaġutinun.

⁷ Kipiġniuqtut iḷisaurrausukłutiŋ God-im pitquraŋiñik, kaŋiqsigaluaġnagich nallipayaaŋich uqaluŋmiŋ naagga sutigun uqautigikkaġmikkun nalupqinaigivlugich.

⁸ Paŋmapak iḷisimarugut pitqurat nakuutilaaŋannik, kialiqaa atuqpagich God-im sivunniutaatun.

⁹ Qanuq iḷisimarusi God-im pitquraŋi pitquraliaguŋisilaaŋannik iñuŋnun nalaunŋaruanun sivuġaani God-im. Aglaan pitquraliagurut iñuŋnun piḷuusiqirinun uumikłiqsuanun God-mik, tamatkunuŋa paaqłaŋaruanun pitquranik, piḷuktuanun iñuŋnun, god-taiḷaqtuanun, iñuaqtinun aapamiŋnik aakamiŋniglu, iñuaqtuqtinullu,

¹⁰ allatuqtinullu, aŋutinullu kanŋunaqtuakun atuutiruanun, tainnatuttauq aġnat aġnauqanmiŋnun, iñuŋniglu tigliguuruanun, tamatkunuŋalu sagluturuanun iḷumun inŋitchuanik quliaqtuaqaqłutiŋ, suli piruanun supayaanik paaqsaaŋaruanik nalaunŋaruanun iḷisaurrutinun qanuq God-im pitqutipiaŋiñik.

¹¹ Tamatkua nalaunŋaruat iḷisaurrutit iḷagigai tusaayugaaġiksuam nalunaiqsautigikkaġma uqautigitquvlugich, tusaayugaaġiksuat kamanaqtuamiñ quyyavigiraksrauruamiḷḷu God-miñ.

Quyyatit God-im Nagliktuutaagun

¹² Quyyavigigiga Christ Jesus Ataniqput suaŋŋasiġmaŋa savakkumiñaqsivḷuŋa. Quyyavigimmigiga nalliummatipkaġmaŋa savaktiksraqtaaġivluŋa inmiñun,

¹³ uvaŋa sivuani uqamaqłuktaugaluaqtilluŋa nagliksaaqtitchivḷuŋalu suli pisaaŋavlugu ilaa. Aglaan God-im nagligiŋagaaŋa pisigivlugu suliqitilaamnik naluniġa ukpiŋaił̣ł̣uŋa.

¹⁴ Ataniqput naglikkutiqpaqaŋaruq uvamnun, suli ukpiliqsiłłuŋa piviuttaġipkallasivḷugiḷḷu allat iñuich pigillakkaptiŋnik atausiŋŋuqatigiŋavlugu Christ Jesus.

¹⁵ Una uqallautauŋaruaq iḷumun ittuq suli akuqtugaksraupiaqtuq ukpiġilugulu, Christ Jesus qaiŋaruq nunamun annautiyaqtuqługich piḷuktuat iñuich. Aasiuvva uvaŋa piḷuŋniqsrauruŋa piḷuusiqiriniñ.

¹⁶ Taamna pisigivlugu God-im nagligiŋagaaŋa. Piḷugniqsraugaluaqtilluŋa piḷuusiqiriniñ, Christ manimmiḷguŋagaaŋa annautillasiḷaaqamiŋa. Aasii paŋmapak iḷitchuqqutauyumiñaqtuŋa ilaan manimmiḷgutaanun iluqaiññun ukpiliġumaaqtuanun inmiñun aasii iñuullasiḷutiŋ isuitchuamun.

¹⁷ Umialik isuitchuamun tuqulaitchuaq, qiñiġnaitchuaq, kisimi God-tauruaq, illi qutchiksuakun isumakkusiaqaġli taimuŋa isuitchuamun. Amen.

¹⁸ Timothy iġñiiŋ, piraksriġikpiñ ukpiġnaqtuagutquvlutin savaurriñiġni Ataniġmik. Taamna piraksriutigigiga uqaqtiŋisa God-im ilipkun. Taipkua uqaluata piyummiqsillisin aŋuyagluataġumiñaqsiḷugu pigiitchuaq,

¹⁹ ukpiġnaqtuagulutin savaaġikkaġni, suli iñuullasiḷutin naġġutchaktaġnaitchuakun isumaŋni. Iñuich iḷaŋich tainna iñuuŋitchut aglaan pisaaġiugaqsiññaqłutiŋ sunik iḷisimagaluakkaġmiŋnik piḷuusiqutautilaaŋannik, aasii ukpiġutaiqsivḷutiŋ inmiŋnik.

²⁰ Tainnaqtuat iñuich iḷagigaich Hymenaeus-lu Alexander-lu, aitchuutigiŋakkaka Satan-mun tatavsaquvlugik, iḷisausiaqaquvlugik uqamaqłuutiqaġumiñaiġḷutik God-mik.