1 Thessalonians 1 - Iñupiatun Mumiksat Uqalugiksuat

¹ Paul-lu Silvanus-lu Timothy-lu tuyuqtut ukuniŋa tuyuutinik aŋaiyyuliqiruanun iniqpaŋmi atiqaqtuami Thessalonica-mik, atausiŋŋuqatauŋaruanun God-mun Aapamun, Ataniġmullu Jesus Christ-mun. Nagliktuusiaqpaqaġitchisuq tutqiunmiglu.

Iñuuniaġniŋat Ukpiġutaallu

² Quyyavigisuugikput God ataramik, quyyatigivlusi iluqasi, ataramik itqaumavlusi aŋaiyyutiptiŋni.

³ Quyyavigigiga God Aapavut pisigivlugich savaasi qanuq ukpiqtuaguvlusi, suli siġġaqutisi qanuq piviuttaqsrivḷusi, igḷutuutilguniqsiḷu qanuq niġiugiugaqługu qaitqigñiksraŋa Atanipta Jesus Christ.

⁴ Aniqatiit, God-im piviuttaġiraŋasi, iḷisimarugut God-mun piksraqtaaġiŋatilaavsiññik,

⁵ qanuq alġaqsruutigikaptigu tusaayugaaġiksuaq ilivsiññun, uqalułhiñakun piŋaitchuq, aglaallu Ilitqusiġiksuam suaŋŋataagun, nalupqinaiqsruutipiaġatakullu. Iḷisimammiusi qanuq iñuuŋatilaaptiŋnik akunnavsiññi ilivsi pisigivlusi.

⁶ Aasii ilivsi piñiarraqsiŋarusiḷi uvaptiktun Ataniqtullu, akuqtuqługu tusaayugaaġiksuaq, quviasuutiqaqłusi Ilitqusiġiksuamiñ, qanutupayauraq nagliksaaqtitaugaluaŋŋavsi.

⁷ Tainna pikavsi, ilivsi tuvraaksriiŋarusi iluqaiññun ukpiqtuaguruanun Macedonia-mi Greece-miḷu.

⁸ Qanuq ilivsi siaminŋagiksi tusaayugaaġiksuaq iluqaiññun nunaŋiñun Macedonia-vlu Greece-lu. Aasiisuli tusaayugaaq ukpiġutiqaġnivsigun God-mun siaminŋammiuq sumulliqaa, uvaptiŋnun-unnii quliaqtuaġiraksraiqł̣ugu.

⁹ Suli quliaqtuaġutigaatigut qanutun niġummaaŋmatun unnii paġlativsi itilaaŋanik uvaptiŋnun, suli quliaqtuaġivlugu mumiŋatilaaqsi savaurriñivsiññiñ iñuuraqpaŋnik savautisukługu iñuuruaq iḷumullu ittuaq God.

¹⁰ Quliaqtuaġimmigaat niġiugniqsi God-im Iġñiŋanik qiḷaŋmiñ, Jesus-mik, ilaan aŋipkaŋaraanik tuqqunmiñ, annaurriruaq uvaptiŋnik God-im tatavsautiksrautaaniñ.