1 Samuel 9 - Iñupiatun Mumiksat Uqalugiksuat

Saul-gum Kasuġaa Samuel

¹ Iñuqaġniqsuq umialguruamik suli kamanaqtuamik atiligmik Kish-mik, maŋŋuqaqtuaq Benjamin-miñ; iġñiġimagaa Abiel-gum suli tutaalugivlugu Zeror-gum, iḷauvluni Becorath-kunnun, Aphiah-m iḷaŋannun.

² Iġñiqaġniqsuq atiqaqtuamik Saul-mik, aŋutigigñiqsuq nukatpiaq. Saul aŋiłhaaġniqsuq isigagniqtun aŋutigił̣haaqłuniḷu iñupayaaŋiññiñ Israel-mi.

³ Iḷaŋich kakaktiŋisa Kish-gum tammaġniqsut, aasii uqallautimagaa Saul, “Iḷaŋannik kivgaligaagłutin ivaġiakkich kakaktit.”

⁴ Igliŋaruk qimiġatigun nunaŋani Ephraim-gum suli Shalishah-gum, aglaan paqinŋaitkaich; tavraasii Shaalim-muŋagaluaqtuk aglaan tavranisuli piiñŋammiut. Tavraasii nunaŋanuŋaruk Benjamin-gum, aglaan paqinŋaitkaich.

⁵ Tikiññamik nunaŋanun Zuph-gum, Saul-gum uqallautiŋagaa kivgani, “Aiḷuk uvaguk, aapaa piiguġlugich kakaktit uvaguk uŋiariginagutiniaġaatiguk.”

⁶ Kivgaŋata kiugaa, “Aaqan! Maani imma iñuk ukpiġniaqtuaq ittuq, qiksigñaqtuaq qanukkii uqalupayaaŋich iḷumun itchuurut. Ullaglakpuk, suagguuq uqallautigaatiguk sumiitilaaŋiññik kakaktit.”

⁷ “Ulakkuptigu, sumik aitchuġniaqpisigu?” Saul-gum apiqsruġaa. “Niqautaiŋaruguk puukataptigni, suli allanik aitchuutiksraitchuguk, naakka piqaqpisa?”

⁸ Kivgaŋata kiugaa, “Uvva qatiqtuamik maniuraqaqtuŋa. Taamna qaitchumiñaġiga iñuanun God-im, aasii uqallautiniaġaatiguk sumiitilaaŋiññik kakaktit.”

^9-11 Saul-gum kiugaa, “Tavrapiaġataq! Aullaġluk.” Tavraasii tavruŋa nunaaqqimuŋaruk ukpiġniaqtuam iñuum irvianun. Qimiġakuaqłutik mayuŋaruk nunaaqqimun, aasii kasuiŋaruk niviaqsianik imiqtaqtuanik. Apiqsruŋagaich taapkua aġnat, “Qiñiqtuuraaqti maaniitpa?” (Taimani God-im uqaqtiŋich taisuuŋagaich qiñiqtuuraaqtinik, tavraasii kia iñuum apiqsruġukkamiuŋ God sumik uqallaguuruq inna, “Tautugiaġlakput qiñiqtuuraaqti.”)

^12-13 “Ii, tamaaniittuq,” aġnat kiugaat. “Avani samma sivuġavsiññi. Qilamiqsruaġuvsik aŋuniaġiksik. Tikipqauraġuvsik nunaaqqimun paqinniaġiksik. Uvlupak tikitchuaq tamauŋa qanukkii iñuich ikipkaiḷutik aitchuiyumaaqtut qimiqqami ikipkaivigmi. Iñuich aayugaaŋaraŋich niġisaġniaŋitchut takpiuŋaġaluaqtinnagu, qanukkii ilaan aŋaiyyutiruksraġigaa aitchuutaat. Akkupak aullaġuvsik paqinniaġiksik mayuŋaiñŋaan qimiqqamun niġiyaqtuġluni.”

¹⁴ Tavraasii Saul-lu kivganiḷu nunaaqqimuŋaruk, aasii isiġiallaġmik, tautuŋagaak Samuel aniruaq, paaqługu aŋaiyyuvigmuksaqtuaq.

¹⁵ Unnuŋmami uvva Atanġum uqallautiraŋa Samuel inna,

¹⁶ “Uvlaaku uvluq innaiḷikpan iñuk iliŋnuktinniaġiga Benjamin maŋŋuŋanniñ; uqsruqtiqsaġiñ aullarriġuġlugu iñumnun Israel-mun, aasii ilaan annautiniaġaich Philistia-ġmiuguruaniñ. Qiñiŋagitka nagliksaaqtuat iñutka suli tusaavlugich ikayuqtisiuġutiŋich.”

¹⁷ Samuel-gum tautugmauŋ Saul, Atanġum uqallautigaa inna, “Tavra taamna aŋun uqausiġiraġa iliŋnun. Ilaan atanniqsuġniaġaich iñutka.”

¹⁸ Tavraasii Saul-gum ullaŋagaa Samuel, paam qaniŋaniittuaq, aasii apiġivlugu, “Uqallautiŋŋa, sumiitpa qiñiqtuuraaqti?”

¹⁹ Samuel-gum kiugaa, “Uvaŋa qiñiqtuuraaqtauruŋa. Sivulliuqsiñŋa aŋaiyyuvigmun. Iluqasik niġiqasiġñiaġivsiñŋa uvlupak. Uvlaaku uvlaami kiuniaġitka iluqaisa apiqqutisik aasii aullaqtillusik.

²⁰ Isumaaluginasigik taipkua kakaktit tammaŋaruat piŋasuni uvluni; paqitaniŋagaich. Immaimña kiña Israel-miuguruat pigisukpakparruŋ? Ilviḷḷuuva, aapakpiḷḷu nanmiñiq iḷaŋich.”

²¹ Saul-gum kiugaa, “Uvaŋauvva maŋŋuqaqtuaŋa Benjamin-miñ, iñugiakiññiqsrauruat Israel-mi, suli uvagut alliuniqsraurugut nuimanaqtuani maŋŋuuptiŋni taapkunani. Summan aasiuvva tainna uqautiviŋa?”

²² Samuel-gum itqutigaik Saul-lu kivgaŋalu inituruamun inimun aasii aquvitiłługik niġġivigmun iñuqaqsimaruamik iñuiññaq qulinigluunnii (30) aquppiruanik.

²³ Samuel-gum uqallautigaa igari, “Qaġġisuuttuuŋ niqi taimña qaitchaġa, tutququvlugu.”

²⁴ Tavraasii igarim qaġġisuutiŋagaa nakuuniqsraq niuviñiq aasii iḷivḷugu saaŋanun Saul-gum. Samuel uqallaktuq, “Tautuguŋ, una niqi iliŋnun piksraqtaaq. Niġġiuŋ. Tutquqtittaġa iliŋnun niġitquvlugu niġiqatigilugich ukua aayugaaqtatka.” Taavrumani uvlumi Saul-gum niġiqatigiŋagaa Samuel.

²⁵ Tavraŋŋa aŋaiyyuvigmiŋniñ atqaġmata nunaaqqimigñun tuŋiusiuŋagaat Saul iglum qaaŋani,

²⁶ aasii tavrani siñiŋaruq. Uvlaatchaurami Samuel-gum ququulaŋagaa Saul tatpamuŋa, “Makittin, aullaqtinniaġikpiñ.” Saul makinŋaruq, aasii ilaalu Samuel-lu aniŋaruk atautchikun.

Samuel-gum Saul Aullarriġuġaa

²⁷ Tikiññamirruŋ nunaaqqim killiŋa Samuel-gum uqallautiŋagaa Saul, “Kivgan aullaquuŋ sivuptigun.” Kivgaq aullaŋaruq, aasii Samuel uqallavsaaŋaruq, “Tavraniivsaallagiñ, aasii uqallautiniaġikpiñ God-im uqaluanik.”