1 Samuel 8 - Iñupiatun Mumiksat Uqalugiksuat

Iñuich Qasiḷiŋarut Umialiqaġukłutik

¹ Samuel utuqqaligami, iġñigni aullarriġuŋagaik (natqiksruqtiġuŋagaik) Israel-mi.

² Aŋayukłium atiŋa Joel aasii nukaqłium atiŋa Abijah; Beersheba-mi aullarrauŋaruk.

³ Aglaan aapamiktun inŋaiññiqsuk; maniññaktaaksraqtik pitqiksiġautikun aŋalatchukługu, tavraasii akiḷiqsittaġniqsuk suli saglutautikun sivunniuqłutik uqaqsitaaġmata.

⁴ Tavraasii aullarriŋich Israel katinniqsut, aasii Samuel ullakługu Ramah-mi,

⁵ aasii uqallautivlugu, “Uvvahii utuqqalirutin suli iġñakpich maliġuaŋitkaich tuvraaksriutitin. Tavraasii, piksraġiñ umialigmik aullarriksraptignik, umialiqaġumaugulli allatun nunauruatun.”

⁶ Samuel-gum iviġagiŋaitkaa umialiqaġukłutik apiqsruutaat; aasii aŋaiyyuŋaruq Ataniġmun,

⁷ aasii Atanġum uqallautiŋagaa, “Naalaġnikkich iñuich uqalupayaaŋich ilignun. Ilvich pisunġiŋitkaatin; uvaŋauvva umialigisunġiŋagaanŋa.

⁸ Annautigapkich qaŋa Egypt-miñ, tunułłuŋa allanun god-inun aŋaiyyurraqsiŋarut; aasiuvva tainnali aŋalanagutigaatin uvaŋa aŋalanmatun.

⁹ Tavraasii, naalaġnikkich, aglaan kiliktuaġlugich suli uqautilugich qanuq umialguruanun aŋalatchiġñiaqtilaaŋiññik.”

¹⁰ Samuel-gum kilikkaich iñuich Atanġum uqaluŋiññik qasiḷiruat umialiqaġukłutik.

¹¹ “Innauvva umialgum aŋalanniaġaasi,” Samuel-gum uqautigaich. “Aŋuyaktiġuqtinniaġaich iġñisi; iḷaŋich iḷaulutik aŋuyaktuani qamuktit kaliŋiññi, iḷaŋich aŋuyaktinun iḷauniaqtut, suli iḷaŋich sivulliulutik aqpattuani sivuanni ilaan usiaqsiġviani qamuktit kalittaŋanni.

¹² Iḷaŋich aullarriġuġniaġaich 1,000-tun iñugiaktigiruanun, suli iḷaŋich aullarraulutik malġukipiaq qulitun (50) iñugiaktigiruanun. Iġñivsi nauyumiññaksaqtuksraġiniaġaich nunaŋich, pukuglugich nauriaŋich, suli aŋuyautiksriuġutiglu savalġusiuġutiglu qamuktit kaliŋiññun.

¹³ Paniutisi tivraġiksautiliuqtuksrauniaqtut ilaan piksraŋiññik suli igariġuġutiglu punniliuqtiġuġutiglu ilaanun.

¹⁴ Umialgum piksraqtaaġiniaġaich nunagigñiqsrat nunautisi, iḷagilugich siiġñaniglu olive-niglu nautchiivisi aasii qaiḷḷugich ilaan qaukłiuramiñun.

¹⁵ Piksraġniaġmiuqsuli quliŋannik nauriaqpich palauvaksraniglu siiġñaniglu qaisaksramiñik qaukłiuraġiramiñullu allanullu qaukłiuruanun.

¹⁶ Piksraqtaaġiniaġmigaich kivgasi suli naliġaaġilugich nakuuniqtauruat immuliviiḷḷu, kakaktillu, aasii inmiñun savaktiliutilugich.

¹⁷ Piñiaġmigaich suli quliŋich kanŋuuruat imnaivsi. Aasii ilivsi kivgaġiliutiniaġaasi.

¹⁸ Tainnasiq tikitpan, uqaviḷukpagniaqtusi umialiksi pisigilugu, ilivsi pigisuktaqsi, aglaan Atanġum naalaġniñiaŋitkaich uqaviḷuutisi.”

¹⁹ Iñuich naalaġniŋiñŋagaat Samuel, aglaan uqallaŋarut inna, “Naumi! Umialiqaġuktugut,

²⁰ allatulli nunauruatun itchumaugut, umialiqaġuta aullarriksraptignik suli sivulliuqtiksraptignik aŋuyagiaġupta suli aŋuyaktiksraptignik.”

²¹ Samuel-gum naalaktuaŋagaich aasii uqautigivsaaŋagaich Ataniq-mun uqaluŋiññik.

²² Atanġum kiuŋagaa inna, “Kamagilugich umialiksrakkich.” Tavraasii Samuel-gum uqallautiŋagaich iñuich aitquvlugich.