1 Samuel 7 - Iñupiatun Mumiksat Uqalugiksuat

¹ Tavraasii iñuŋisa Kiriath Jearim-gum aiŋagaat Atanġum Sivunniuġutim Kiguunniŋa aasii igluanuutivlugu Abinadab-gum igluqaqtuam qimiqqami. Nalunaiŋagaat salumaruakun iġñiŋa Eleazar-m qaunaksrautquvlugu.

Samuel-gum Atanniqsuġaa Israel

² Sivunniuġutim Kiguunniŋa Atanġum Kiriath Jearim-miinŋaruq iñugiaktuani ukiuni, iñuiññatulluunnii (20). Taapkunani ukiuni Israel-miut iŋiqsruŋarut Ataniġmun ikayuqtisiuqłutik.

³ Samuel-gum uqallautigaich Israel-miuguruat, “Saanniaġuvsiuŋ Ataniq iluqaan uummativsiññi, igittuksraġigisi iluqaisa allaniŋŋaqtat god-iliat arriqaqtuat aġnam god-im Astarte-gum. Qaiḷḷusi iluqaaġlusi Ataniġmun suli kisian aŋaiyyuvigilugu, aasii ilaan annautiniaġaasi suaŋŋataaniñ Philistia-ġmiut.”

⁴ Tavraasii Israel-miuguruat iginŋagaich god-iŋŋuat Baal-miḷḷu Astarte-miḷḷu, aasii nanġaqługu kisian Ataniq.

⁵ Tavra Samuel katitquŋagaich iluqaisa Israel-miut Mizpah-mun, innaqługich, “Aŋaiyyutiniaġivsi Ataniġmun tavrani.”

⁶ Tavraasii iluqatik katinŋarut Mizpah-mi. Imiqtaŋarut nivviamin aasii kuvivḷugu aitchuutigivlugu Ataniġmun suli niġiŋiñŋarut uvluq taamna naałługu. Uqallaŋarut inna, “Piḷuusiqiŋarugut Ataniġmun.” (Tavrani Mizpah-mi aullarrauvluni Samuel natqiksruisuumaruq atiŋiñmata Israel-miuguruat.)

⁷ Philistia-ġmiut tusaagamik Israel-miuguruat katinnivḷugich Mizpah-mun, tallimat umialiŋich Philistia-ġmiut aullaŋarut iñutik kaluqługich aŋuyagiaqługich Israel-miuguruat. Israel-miuguruat tusaaŋarut aasii iqsitchakłutik,

⁸ aasii uqallautiŋagaat Samuel, “Aŋaiyyuuġiñ Ataniġmun God-iptignun annautitquluta Philistia-miuguruaniñ.”

⁹ Samuel tuqutchiŋaruq imnaiyaamik aasii iluqaan ikipkaqługu aitchuutigiŋagaa Ataniġmun. Tavraasii iŋiulaŋaruq Ataniġmun ikayuquvlugu Israel, aasii Atanġum kiuŋagaa aŋaiyyutaa.

¹⁰ Samuel ikipkaipkaqługu aitchuunmiñik, Philistia-ġmiuguruat qalliŋarut aŋuyagiaqtuat; aglaan tavrani Ataniq nipaviñaŋaruq qiḷagmiñ tuŋaannun Philistia-ġmiuguruat. Alapipiallaŋarut aasii iqsitchakłutik qimaŋarut.

¹¹ Israel-miut aullaŋarut Mizpah-miñ aasii malikataqługich Philistia-ġmiuguruat Bethcar tikitqayaqługu, tuquġaqługich iglillaġmik.

¹² Tavraasii Samuel uyaġagmik tigusiŋaruq, iḷivḷugu qitkagnun Mizpah-mlu Shen-guvlu, aasii uqallakłuni, “Atanġum ikayuŋagaatigut tamauŋaaglaan.” Aasii atchiŋagaa “Uyaġak Ikayuiri.”

¹³ Tavraasii Philistia-ġmiuguruat akiiñŋarut, aasii Atanġum aŋuyaksaiḷiŋagaich Israel nunaŋich Samuel iñuupkaqługu.

¹⁴ Nunaaqqipayaat Philistia-ġmiuguruat piññaktaaġiŋaraŋich akunġagni Ekron-guvlu Gath-guvlu utiqtinŋagaich Israel-mun, tavraasii Israel nunagipayauraqtatik tasuŋagaich. Suli Israel-miut Amor-ġmiullu aŋuyaŋaiŋarut.

¹⁵ Samuel-gum aullatiŋagaa Israel iñuuniqtutulaamisun.

¹⁶ Ukiutuaġaġimman ullaguugaich Bethel-lu, Gilgal-lu, Mizpah-lu, aasii Samuel-gum isivġiqsruġaġigaich Israel-miittuat taapkua nunaaqqich.

¹⁷ Tavra utiġaqtuq aimaaġvimiñun Ramah-mun, aasii tavranisuli isivġiqsuiraummivḷuni. Ramah-mi ikipkaiviḷiuŋaruq Ataniġmun.