1 Samuel 6 - Iñupiatun Mumiksat Uqalugiksuat

Utiqtinmarruŋ Sivunniuġutim Kiguunniŋa

¹ Atanġum Sivunniuġutikun Kiguunniŋa Philistia-miitkanigman tallimat malġugni tatqiñi,

² Philistia-ġmiut qaipkaŋagaich aŋaiyyuliqsiqpaiḷḷu nalautchaqtillu aasii apiġivḷugich, “Sulakput una Atanġum Sivunniuġutim Kiguunniŋa? Utiqtinniaġuptigu inaanun, sumik iḷaniaqpisigu?”

³ Kiuŋagaich, “Utiqtitkuvsiuŋ Sivunniuġutim Kiguunniŋa God-iŋanun Israel, nalunaitchuq iḷaruksraġigiksi aitchuunmik ilaanun piḷuutisi akiḷiqsaġlugich. Sivunniuġutim Kiguunniq kisian utiqtitaksraġiŋitkiksi iḷagaluaġnagu sumik aitchuunmik. Tainnaġuvsi mamitauniaqtusi, suli iḷitchuġiniaqtusi summan tatavsaqtaummagaavsi.”

⁴ “Sumik aitchuġniaqpisigu?” Philistia-ġmiut apiqsrirut. Kiugaich, “Tallimanik kaviqsuamiñ manigmiñ piḷianik arrivḷugich timimi nauruat suli tallimat aviŋŋatun piḷiat kaviqsuamiñ manigmiñ, qavsiutilaaŋat nalaullugu umialiŋisa Philistia-ġmiut. Atunim naŋirrutiqpaum piyuŋagaasi ilivsiḷu umialisiḷu tallimauruat.

⁵ Piḷiuġitchi tuvraġlugich timimi nauruat suli aviŋŋaich piyuaqtisi nunavsiññi, suli qiksiksrautiksi qiñiqtillugu God-iŋanun Israel. Suagguuq tatavsaŋaiġaasi ilivsi, god-isi, suli nunaksi.

⁶ Summan sivunmuuniaqpisi piḷġusiatitun Egypt-miut umialiŋatalu Egypt-miuguruallu? Piiguġnasi qanutun God-mun kipagisilaaŋiññik Israel-miuguruat aullaqtilġataqtillugich Egypt-miñ.

⁷ Tavraasii itqanaiyaisitchi nutauruamik aksraktuuramik malġugniglu immuliviigñik qamuŋaitchuagnik sivuani; pituglugik aksraktuuramun aasii piayaaŋich niġrutiqaġvigmuktillugich.

⁸ Atanġum Sivunniuġutim Kiguunniŋa ikulugu aksraktuuramun aasii saniġaanun ikulugu alla kiguunniq imalik piḷiavsiññik aitchuutivsiññik akiḷiqsaqługich piḷuutisi. Aullaqtillugu aksraktuuraq aasii ilaagun iglaupkaġlugu.

⁹ Qiñiġlugu; aullaqpan tuŋaanun Beth Shemesh-gum, tavra iḷisimanaqtuq God-iŋata Israel-miut nagliksaaqtisimagaatigut. Aglaan tuŋaanuŋitpan, iḷisimaniaġmiugut ilaan nagliksaaqtinŋisimagaatigut; uvaptignun tikisiññaŋaruq.”

¹⁰ Kamagigaat uqaurrusiaqtik; malġuk immuliviik anuŋagaik aksraktuuramun, aasii umŋutivlugik piayaaŋik niġrutiqaġvigmun.

¹¹ Ikuŋagaat Sivunniuġutim Kiguunniŋa aksraktuuramun, taputivlugi kiguunniq aviŋŋaŋŋualiaġlu timimiḷu nauruaŋŋualiaq kaviqsaamiñ manigmiñ.

¹² Immuliviik aullaqiruk apqutikun tuŋaaġipiaqługu Beth Shemesh, apqunmiñ saqugaluaġnatik. Niparrutigillaan igliŋaruk. Tallimat Philistia-ġmiut umialiŋisa maliŋagaik tikiḷġataqługu killiŋa nunaŋata Beth Shemesh-gum.

¹³ Iñuich Beth Shemesh-mi palauvaksriuqtuat natiġnami, qunmun qiviaġamik tautuŋagaat God-im Sivunniuġutim Kiguunniŋa. Quviasuutigiqpaŋagaat tautuktaqtik.

¹⁴ Taamna aksraktuuraq nutqaŋaruq nunaŋiññun aŋutim atiqaqtuam Joshua-mik, tavrani Beth Shemesh-mi iñuuniaqtuam, aasii nutqaŋaruq qaniŋanun uyaġakpaum. Iñuich anauttaqługu siqumiñŋagaat aksraktuuraq suli tuqułługik immuliviik aasii ikipkaqługich aitchuutigivlugich Ataniġmun.

¹⁵ Taapkua Levite-guruat piŋagaat Atanġum Sivunniuġutim Kiguunniŋa suli kiguunniq imalik kaviqsaamiñ manigmiñ piŋŋualiagnik, aasii qaaŋanun iḷivḷugich uyaġakpaum. Tavraasii iñuŋich Beth Shemesh-gum aitchuiŋarut ikipkaqtanik allaniglu aitchuutinik Ataniġmun.

¹⁶ Tallimauruat umialiŋisa Philistia-ġmiut qiñiŋagaich tainna pimmata aasii utiqhutik Ekron-mun tavrani uvlumi.

¹⁷ Philistia-ġmiut tuyuġiŋagaich tallimat kaviqsaamiñ manigmiñ piḷiat, timimi nausuuruat Ataniġmun, akiḷiutigisaqługich piḷuutimignun, atausiq sivuniġillaavlugu ukunuŋa nunaaqqiñun—Ashdod, Gaza, Ashkelon, Gath, suli Ekron-mun.

¹⁸ Tuyuŋammiut kaviqsuanik manigmiñ aviŋŋaŋŋualiat, atausiḷḷaa sivuniġillaavlugu iniqpak aullarriqallaaruaq tallimaniñ umialiŋiññiñ Philistia-ġmiut, iluqatik init nunaaqqiḷḷaat sapukutaqaqtuat sapukutaitchuallu. Uyaġaniqłuk nunaŋani Joshua-m Beth Shemesh-mi, irviata Atanġum Sivunniuġutim Kiguunniŋa, ittuqsuli tavrani itqautausaqłuni taaptumuŋa qaaŋiqsuamun.

¹⁹ Atanġum tuqunŋagaich piŋasukipiaq qulit (70) aŋutit Beth Shemesh-mi qanukkii itchuaŋarut iḷuanun Sivunniuġutim Kiguunniġum. Iñuich qiñuqpaŋarut qanukkii Atanġum tuquġaiqpaŋagaich aŋutit avataiññiñ.

Sivunniuġutim Kiguunniŋa Kiriath Jearim-mi

²⁰ Tavraasii aŋutiŋi Beth Shemesh-gum uqallaktut, “Kiña makitayumiñaqpa saaŋani Atanġum, uuma salumaruaguruam God-im? Sumun aullaqtitchumiñaqpisigu maaŋŋa piiqsaġlugu?”

²¹ Aullaqtitchiŋarut kiliktuiriñik iñuŋiññun Kiriath Jearim-gum uqallautitquvlugich inna, “Philistia-ġmiut utiqtinŋagaat Atanġum Sivunniuġutim Kiguunniŋa. Qaiḷusi aisiuŋ.”