1 Samuel 4 - Iñupiatun Mumiksat Uqalugiksuat

Pisaġiniŋa Sivunniuġutim Kiguunniŋata

¹ Taimani Israel-miut aullaŋarut aŋuyagiaqsaqługich Philistia-ġmiut. Israel-miut nullaŋarut Ebenezer-mun aasiiḷi Philistia-ġmiut Aphek-mun.

² Philistia-ġmiut saavittut aasii aŋuyautiqpakłutik akiiḷigaich Israel-miut tuqutchivḷutik 4,000-tun iñugiaktigiruanik aŋutinik.

³ Tuqutauŋaitchuat utiġamik nullaġvigmignun aullariŋich Israel uqallaktut, “Summan Atanġum akiiḷipkaqpatigut Philistia-ġmiunun uvlupak? Aiḷuguamna mauŋautilakput Atanġum Sivunniuġutim Kiguunniŋa Shiloh-miñ, ilaan piqatigisaġaatigut aasii annautiluta akiḷḷiiptigniñ.”

⁴ Tavraasii aullaqtitchiŋarut Shiloh-mun aipkaqługu Sapiġñaqtuam Atanġum Sivunniuġutikun Kiguunniŋa, inillaŋaruaq qutchiksuaġivlugu akunġagnun cherubim. Eli-m malġuk iġñiŋiksa Hophni-ḷu Phinehas-lu itqatigivlugu Sivunniuġutim Kiguunniŋa.

⁵ Tikiutimmarruŋ Sivunniuġutim Kiguunniŋa, Israel-miut quyavaił̣ł̣utik nipaalammata nuna aulaŋaruq.

⁶ Philistia-ġmiut tusaagamisigik nipaalaruat uqallaŋarut, “Naalaksigik nipaalaqpaktuat Hebrew-guruat inimigni! Sumik sivuniqaqpa?” Iḷitchuġikamik Atanġum Sivunniuġutim Kiguunniŋa tikiutitilaaŋannik,

⁷ iqsitchaŋarut, aasii uqallakłutik, “Amma god-auruaq iniŋannuktuq! Akimayumiñaitchugut! Tainnaqtilġataŋaitchugut sivuani!

⁸ Kia annautiyumiñaqpatigut taamapkunaŋŋa suaŋaruaniñ god-iniñ? Taapkua god-it naŋirrutiqpaktigun tuquġaaqtisugruŋagaich Egypt-miut nunagluktuami!

⁹ Qapiŋaittitchi, Philistia-ġmiuguruasii! Aŋuyagitchi aŋutitun, kivgaġuqpiaqtugut Hebrew-guruanun, kivgaurusiatitun uvaptignun. Tavraasii aŋuyagitchi aŋutitun!”

¹⁰ Philistia-ġmiut aŋuyakpaŋarut aasii akiiḷivḷugich Israel-miut, aasii aiyaaŋarut aqpamik iglumignun. Tuquġaiqpaŋarut: 30,000-tun iñugiaktigiruanik aŋuyaktinik.

¹¹ God-im Sivunniuġutikun Kiguunniŋa pisaġiŋagaat aasii Eli-m iġñiŋik Hophni-ḷu Phinehas-lu tuqutauŋammiuk.

Eli Tuqumman

¹² Taaptumani uvlumi, aŋun maŋŋuqaqtuaq Benjamin-miñ aqpanŋaruq aŋuyagvianniñ Shiloh-mun. Qiñiġnaquvlugu qiñuniñi aligaŋagaich annuġaani suli nunamiñ nanuŋagaa niaquni.

¹³ Eli aquppiŋaruq, takunnaqhuni, apqutim saniġaani aquppiutamiñi uŋiarrisaġivlugu Sivunniuġutim Kiguunniŋa. Aŋutim qairuam iḷisimapkaŋagaich iluqaisa tavrani nunaaqqimi ittuat, aasii iluqatik avaalaŋarut iqsitchakhutik.

¹⁴ Eli-m tusaavlugich apiqsriŋaruq, “Sunaimña nipaallatigivarruŋ?” Aŋun qilamik Eli-muŋaruq uqallautisukługu.

¹⁵ (Eli ukiuqaŋaruq sisamakipiaq akimiaq piŋasutun (98) suli ayauqqayaŋammiuq.)

¹⁶ Aŋun uqallaktuq, “Aŋuyaktuaniñ uvva qimaŋaruŋa aqpamik uvlupak.” Eli-m apiqsruġaa, “Suruat ipkua, iġñiiŋ?”

¹⁷ Aŋutim kiugaa, “Israel-miut qimaŋarut Philistia-ġmiuniñ; akiiḷipaluŋagaatigut! Suli iġñikkiñ Hophni-ḷu Phinehas-lu tuqutaummiruak, suli Sivunniuġutim God-im Kiguunniŋa pisaġiŋaŋaat!”

¹⁸ Aŋutim uqallausiġimmauŋ Sivunniuġutim God-im Kiguunniŋa Eli tununmun ulġuŋaruq aquppiutamiñiñ upkuaqpaum saniġaani. Utuqqaliŋavaił̣ł̣uni quiñivaił̣ł̣uniḷu ulġugami quŋusiñiñi naviŋagaa, aasii tuquvluni. Aullarrauŋaruq uvva Israel-mi malġukipiatun (40) ukiuni.

Tuqumman Phinehas-gum Tuvaaqataa

¹⁹ Eli-m ukuaŋa, tuvaaqataa Phinehas-gum siŋaiyauruaq suli tikiutiyasiŋagaa miqłiqtum aniñiksraŋata. Tusaagami Sivunniuġutikun God-im Kiguunniŋa pisaġitilaaŋanik, aasii aaparuaniḷu uiñiḷu tuqunivḷugik aulayyautiŋagaa iġñivḷuniasii, aglaan iglutulguiñŋagaa saŋŋitqatautimmani.

²⁰ Tuquaqsimman aġnat ikayuqtiŋisa uqallautigaat, “Qapiġnak! Iġñiqaqtutin!” Aglaan suliqutigiŋiñŋagai suli kiuŋitkai.

²¹ Atchiŋagaa iġñiñi Ichabod-mik, innaqhuni, “God-im kamanautaata unitkaa Israel,” pisigivlugu pisaġiñiŋata Sivunniuġutim Kiguunniŋa suli tuquniŋiksa aaparuaġmiḷu uimiḷu.

²² “God-im quviasuutaata unitkaa Israel,” uqallaktuq, “qanukkii Sivunniuġutim God-im Kiguunniŋa pisaġiŋagaat.”