1 Samuel 31 - Iñupiatun Mumiksat Uqalugiksuat

Tuqummata Saul-lu Iġñiŋiḷḷu

¹ Philistia-ġmiut aŋuyaŋagaich Israel-miut Mount Gilboa-mi. Iñugiaktuat Israel-miut tuqutauŋarut tavrani; aasii iḷaŋich qimaŋarut, taputivlugich Umialik Saul-lu iġñiŋiḷḷu.

² Aglaan Philistia-ġmiut maliqataqtuulavlugich Saul-lu iġñiġutiiŋiḷu, aasii tuqułługich Jonathan, Abinadab, Malchisua-lu.

³ Aŋuyakpaŋarut avataani Saul-gum, aŋummarruŋaasii pisiktauŋammiuq akiḷḷiimi qaġruŋiññiñ aasii atqunaq ikiḷḷiiŋagaat.

⁴ Uqallautigaa tigumiaqtiŋa satkumiñik, “Savikpaiñ isaglugu tuqunŋa, apkua nalunaiñŋutchiŋaitchuat sirguqtaunikun piyugiaqpiaġaanŋa.” Aglaan satkumiñik tigumiaqtiŋa iqsivaił̣ł̣uni tainna pisuŋaitkaa. Tavraasii Saul-gum savikpani tiguvlugu inmiñun kapivḷuni.

⁵ Tavraasii tigumiaqtiŋa satkumiñik tautugmauŋ Saul tuquŋaraq, ilaaptauq tiguvlugu savikpani inmiñun kapivḷuni tuquŋammiuq.

⁶ Tavraasii Saul-lu, piŋasullu iġñiŋi, nukatpiaġlu tuquŋarut; iluqaġmiŋ Saul-gum iñuŋich tuquŋarut tavrani uvlumi.

⁷ Israel-miuguruat taavanitchiani Jezreel Valley-m, kivaliñaaŋani Jordan Kuuŋata, tusaakamik Israel-miut aŋuyaktiŋich qimagnivḷugich, Saul-lu iġñiŋiḷḷu tuqutaunivḷugich, qimaŋagaich nunaaqqitik. Aasii Philistia-ġmiut nunannaktaaġiŋagaich.

⁸ Uvlaakumman, Philistia-ġmiut satkuiyaġiaġmatigiŋ tuquŋaruat timiŋich, paqinŋagaich Saul-lu piŋasullu iġñiŋi nalaruat Iġġiŋani Gilboa-m.

⁹ Saul niaquiŋagaat, aŋuyaunnaiyaqługulu. Aasii aullaqtitchivḷutik kiliktuiriñik iluqaanun Philistia-m nunaŋanun tusaayugaaġiksuamik aŋaiyyuvianni iñuuraqpaŋmiŋnullu iñumiŋnullu.

¹⁰ Aasii aŋuyaunnaŋich iḷiŋagaich aŋaiyyuvianun god-iŋŋuam Astarte-m, suli kikiaktuutivlugu timaa katchiŋanun nunaaqqim Beth Shan-gum.

¹¹ Tusaagamik iñuŋich Jabesh Gilead-mi qanuq aŋalatilaaŋa Saul Philistia-ġmiunun,

¹² iqsiiññiqsrat iñuŋi aullaŋarut aasii pisuaqhutik unnuapak Beth Shan-mun. Piiŋagaich timiŋich Saul-guvlu iġñiŋisalu katchimiñ, utiutiŋagaich Jabesh-mun, aasii ikipkaqługich tavrani.

¹³ Tavraasii sauniŋich iḷuviŋagaich ataanun napaaqtum tamarisk-gum Jabesh-mi, aasii niġiŋaiḷaŋarut tallimat malġugni uvluni.