1 Samuel 3 - Iñupiatun Mumiksat Uqalugiksuat

Ataniq Qiñiqtittuq Samuel-mun

¹ Taipkunani uvluni nukatpiaġruum Samuel-gum savautimmauŋ Ataniq iḷisaurriqaqhuni Eli-mik, tusaapiayuitchut Ataniġmiñ, suli qiñiqtuuraat qaikayuitchut iḷaanni.

² Unnuat iḷaŋanni Eli, ayauqqayaŋaruaq, siñiksimaruq inauramiñi;

³ Samuel-li siñiktuaq igluani Atanġum, Sivunniuġutikun Kiguunniġum irviani. Naniq ikumapkaqługusuli,

⁴ Atanġum ququulaŋagaa Samuel. Ilaan kiugaa, “Ii, aŋutii!”

⁵ aasii aqpamik Eli-mukhuni uqallautigaa, “Ququularaġma, uvva qairuŋa.” Aglaan Eli uqallaktuq, “Uvaŋa ququulaŋitkikpiñ; tuttaatqigiñ.” Tavra Samuel tuttaatqiŋaruq.

^6-7 Atanġum ququulalgitkaa Samuel. Nukatpiaġruk naluŋaruq Atanġutilaaŋanik qanukkii qaŋaunnii Atanġum uqautiŋaitkaa. Tavraasii makiłłuni Eli-muktuq aasii uqallakłuni, “Ququularaġma, uvva qairuŋa.” Aglaan Eli-m kiuŋagaa, “Iġñiiŋ, uvaŋa ququulaŋitkikpiñ; tuttaaġiatqigiñ.”

⁸ Atanġum ququulagaa Samuel piŋasuiqsuaqługu; makiłłuni Eli-mulgitchuq aasii uqallakłuni, “Ququularaġma, uvva qairuŋa.” Tavraasii Eli iḷitchuġiruq Ataniġmun ququulatilaaŋanik,

⁹ aasii uqallautigaa, “Tuttaatqigiagiñ; aasii ququulalgitpatin innaqsaqtutin ‘Uqallagiñ Ataniiq, kivgan naalaġniruq.’” Tavraasii Samuel tuttaatqigiaŋaruq.

¹⁰ Ataniq qaiŋaruq aasii makitavluni ququulaŋalgitkaa piḷġusimisun “Samuel! Samuel!” Samuel-gum kiuŋagaa, “Uqallagiñ; kivgan naalaġniruq.”

¹¹ Atanġum uqallautigaa, “Uvlut iḷaŋanni pimaqłuktaġniaġitka iñuŋi Israel aasii kiñaliqaa tusaaruaq tupaŋaniaqtuq.

¹² Tavrani uvlumi naatinniaġitka iluqaisa sivuuġasaaġutitka Eli-mullu iḷaŋiññullu, sivuaniñ aglaan isuanun.

¹³ Kilianiŋagiga tatavsaġniaġnivḷugich iḷaŋi isuitchuamun qanukkii iġñiġutiiŋisa piḷuktuanik uqausiġiŋagaanŋa. Eli-m iḷisimagaluaqłuni nutqaqtinŋaitkai.

¹⁴ Tavraasii unniqsuqłiiruŋa igluanun Eli-m, iḷaŋich qanutun itkaluaqtuam ikipkautim naagga aitchuutim piiġumiñaitkaich nagliksaaġutit taavsrumaŋŋa piḷuunmiñ.”

¹⁵ Samuel tuttaaŋaŋaruq uvlaaġataqtillugu; makinŋaruq aasii aŋmaqługich upkuaŋich igluŋata Atanġum. Sivuuġaŋaruq qanuq uqallautiniaqtilaaŋa Eli qiñiqtuuraamigun.

¹⁶ Aglaan Eli-m ququulaŋagaa, “Samuel, iġñiiŋ!” “Ii, aŋutii,” kiuŋagaa Samuel-gum.

¹⁷ “Qanuq uqallautivatin Atanġum?” Eli-m apiġigaa. “Suna mininnagu. God-im tatavsaġniaġaatin atqunaġlugu uqalupayaaŋiññik uqallautiŋitkumŋa.”

¹⁸ Tavra Samuel-gum quliaqtuaġutiŋagaa uqalupayaaŋiññik; sunaunnii mininŋaitkaa. Eli uqallaktuq, “Ilaa Atanġuruq; savaaġiniaġaa tasamma iluaġiłhaaqtani.”

¹⁹ Samuel aglisiiññaŋaruq, Atanġum itqatigiŋagaa suli taŋŋiŋagaich uqalupayaaŋich Samuel.

²⁰ Tavraasii iñupayaaŋich Israel, iluqaaniñ nunam, iḷisimaŋarut Samuel iḷumun uqaqtautilaaŋanik Ataniġmun.

²¹ Ataniq salapqiqtauŋaruq Shiloh-mi, qiñiqtirrusimisun Samuel-mun uqautigamiuŋ. Tavra Samuel uqaġman, iluqatik Israel-miittuat naalaġnisuuŋarut.