1 Samuel 28 - Iñupiatun Mumiksat Uqalugiksuat

¹ Tavraniitkaluaġamik Philistia-ġmiut katinŋagaich aŋuyaktitik aŋuyagukługu Israel, aasii Achish-gum uqallautigaa David, “Tavraami kaŋiqsirutin ilviḷḷu iñukpiḷḷu aŋuyaqasiqtuksrauniaqtavsiñŋa.”

² “Tavraami,” David-gum kiugaa. “Kivgaġigiŋma, aasii qiñiġniaġiŋma iliŋnik sullatilaamnik.” Achish uqallaktuq, “Aarigaa uvamnun munaksriḷiutiniaġikpiñ.”

Saul Uqaqatiqaqtuq Nalautchuġaqtimik

³ Tavra Samuel tuquŋaruq, aasii iluqaġmiŋ Israel-miut qiñuŋagaat suli iḷuviŋagaat aimaaġvianun Ramah-mun. Saul-gum aninŋagaich nalautchuġaqtit Israel-miñ.

⁴ Philistia-ġmiut aŋuyaktit atautchimuŋarut aasii nullaqhutik qaniŋanun nunaaqqim Shunem; Saul-gum katinŋagaich Israel-miuguruat aasii nullaqhutik Mount Gilboa-mun.

⁵ Saul-gum tautukkamigich Philistia-ġmiut aŋuyaktiŋich iqsitchakpaŋaruq,

⁶ tavraasii apiqsruŋagaa Ataniq suniaqtilaamiñik. Aglaan Atanġum kiuŋaitkaa suuramikunnii, siññaktukun unnii naagga Urim-kuaġluni naagga Thummim-kuaġluni naaggaunnii uqaqtaagun God-im.

⁷ Tavra Saul-gum tiliŋagaich atanaurani, “Paqitchaqtuaġitchi aġnamik nalautchaqtimik, aasii ullaglugu uqaqatiginiaġiga.” “Tainnasiqaqtuq samma Endor-mi,” kiugaat.

⁸ Tavraasii iḷisaġnaiyaŋaruq Saul; allanik annuġaaqłuni, aasii taaqsianigman aullaŋaruq malġugnik iñumiñik piqasiqł̣uni tautugiaqługu aġnaq. “Uqautikkich iḷitqutchit aasii iḷisimapkaġluŋa suniaqtuamik,” Uqallautigaa Saul-gum aġnaq. “Qaipkaġuŋ iḷitqusiŋa iñuum tairaġma.”

⁹ Aġnam kiugaa, “Iḷisimasuŋnaqtutin Umialgum Saul-gum piŋaraŋanik, aullaqtiłługich nalautchuġaqtit Israel-miñ. Aasiuvva, summan pisaasuġmiaqpiŋa taimaasii tuqutilluŋa?”

¹⁰ Aasii Saul unniqsuqłiiruq. “Iñuuruakkun Atanikkun unniqsuqłiiruŋa tatavsaqtauniaŋiññiḷutin taaptumiŋa piguvich,” Saul-gum uqallautigaa.

¹¹ “Kiña ququaquviuŋ?” aġnam apiġigaa. “Samuel,” Saul-gum kiugaa.

¹² Aġnam tautukkamiuŋ Samuel, avaalaŋaruq aasii Saul-mun uqallakłuni, “Summan pitqiksiġaqpiŋa? Ilvich Umialik Saul!”

¹³ “Iqsiñak!” umialgum uqallautigaa. “Sumik tautukpich?” “Tautuktuŋa iḷitqusimik nuiruamik nunamiñ,” aġnam kiugaa.

¹⁴ “Qanuq qiññaqaqpa?” apiġigaa. “Aŋayuqaksraq nuiruq,” kiugaa. “Qaliġuaqtuqtuq.” Tavraasii Saul iḷitchuġiruq Samuel-gutilaaŋanik, aasii punŋaruq nunamun qiksigivlugu.

¹⁵ Samuel uqallaktuq Saul-mun, “Summan piñaiḷutaqpiŋa? Summan utiqtitpiŋa?” Saul-gum kiugaa, “Uvva iluirrutiqpaqaqtuŋa! Philistia-ġmiut aŋuyakkaanŋa, suli God-im uniñŋagaaŋa. Kiusuitkaaŋa, nalautchaqtikkaluatigun naagga siññaktukkaluatigun. Tavraasii ququaġikpiñ, uqallautitquvluŋa suruksrautilaamnik.”

¹⁶ Samuel uqallaktuq, “Summan ququaqpiŋa Atanġum uniñŋammatin aasii akiḷḷiliutivluni iliŋnun?

¹⁷ Atanġum nalautinŋagaa uqallausimisun uvapkuaqługu: umialgutin piiŋagaa iliŋniñ aasii qaił̣ł̣ugu David-mun.

¹⁸ Kamagiŋaitkiñ Atanġum piraksriutaa suli suksraunġimmaġiksaaŋaitkitin Amelek-miut suli pigipayaaqtaŋich. Taamna pisigivlugu Atanġum tainna pigaatin.

¹⁹ Qaiññiaġaatin Israel-lu Philistia-ġmiunun. Uvlaaku ilviḷḷu iġñiġutikpiḷḷu ullagniaġivsiñŋa, suli Atanġum qaiññiaġmigaich aŋuyaktiŋich Israel-gum Philistia-ġmiunun.”

²⁰ Tavraŋŋatchiaq Saul ulġuvluni nallaŋaruq nunamun, iqsitchaivaił̣ł̣ugu Samuel-gum uqaluŋisa. Sayaiñŋaruq, qanukkii niġiŋaił̣ł̣uni uvlupaglu unnuapaglu.

²¹ Aġnam ullaŋagaa Saul aasii iḷitchuġiŋaruq iqsiqpaktilaaŋanik, tavraasii uqallautiŋagaa, “Aŋutii, anayanniuqtinŋagiġma iñuggutimnik kamagikapku apiqqutin.

²² Akkupagli kamagiŋŋa. Niqiksraġnik itqanaiqsiḷaŋa. Niġiruksraurutin suaŋŋatiqaġumautin iglauguvich.”

²³ Saul pisuŋinŋaruq aasii uqallakhuni niġiñiaŋiññivḷuni. Aglaan atanauraŋisa tiliuġmigaat niġitquvlugu. Kiisaimmaa kamagivaich, makiłłuni nunamiñ aquvinŋaruq tuŋiutinun.

²⁴ Aġnam qilamiuraq tuqunŋagaa tuttuqpaiyaaq quiññaksaaŋarani. Tavra palauvaksraqhuni itqanaiyarraqsiŋaruq, aasii naqiłługu, punniliuqłuniasii puvlaksautaiḷaamik.

²⁵ Iḷiŋagaich niqit saaŋannun Saul-guvlu atanauraŋisalu, aasii niġiŋagaich. Aasii aullaŋarut tavrani unnuaġman.