Biblia Todo Logo
Bìoball air-loidhne

- Sanasan -

1 Samuel 27 - Iñupiatun Mumiksat Uqalugiksuat


David Philistia-ġmiuniinman

1 David ilimiñun uqallaktuq, “Uvlut iḷaŋanni Saul-gum tuqunniaġaaŋa. Piḷḷuatałhaaġniaqtuŋa aullaġuma Philistia-mun. Tavraasii Saul-gum ivaŋaiġñiaġaaŋa Israel-mi, aasii annaummiñiaqtuŋa.”

2 Tavra David-lu six hundred-guruallu (600) iñuni Achish-muŋarut iġñiŋanun Maoch-gum, umialiŋata Gath-gum.

3 David-lu iñuniḷu, iḷatiglu, inillaŋarut Gath-mun. David itqatigiŋagaik malġuuk tuvaaqatigni, Ahinoam Jezreel-miu, suli Abigail, Nabal-gum uiḷgaqtaŋa, Carmel-miu.

4 Saul tusaagami David qimagnivḷugu Gath-mun, ivaŋaiŋagaa.

5 David uqallaktuq Achish-mun, “Avilaitqatigigumŋa, nunaaqqiuramik iñuuniaġviksriñŋa. Uvaniinŋitkuma iniqpagiraġni suŋitchuq, aŋutii.”

6 Tavraasii Achish-gum aitchuŋagaa nunaaqqimik Ziklag-mik, aasii taamna pisigivlugu tavra Ziklag pigisuugaat umialiŋisa Judah-m tavraŋŋaaglaan.

7 David iñuuniaŋaruq Philistia-mi akimiaq atausiñi (16) tatqiñi.

8 Tavraniillaġmik David-lu iñuniḷu aŋuyagaġigaich iñuŋi Geshur-miut, Girzi-miut, suli Amalek-miut, tamaani iñuuniaŋaruat qaŋasugruk. Nunat tigligaiviraġigaich Shur-munaglaan, taunuŋaaglaan Egypt-mun,

9 tuqułługich iluqaisa aŋutillu aġnallu, suli piksraqtaaġivlugich imnaich, pamiqsaat, kakaktit, kakaktit pikukturuat, annuġaanunaglaan. Aasii tavra utiġaqtuq Achish-mun.

10 Achish-gum apiqsruġaġigaa, “Sumulgitpich tigligaiyaqhutin uvlupak?” aasii David-gum uqallautiraġigaa unuŋatchianugnivḷuni Judah-m, naaggaunnii nunaŋannun iñuŋisa Jerahmeel-gum, naaggaunnii nunaŋannun Ken-mium.

11 David-gum tuquttaġigaich aŋutillu aġnallu, utiqtuksraiqł̣ugich Gath-mun, aasii quliaqtuaqhutik David-lu iñuniḷu supiaqtilaaŋiññik. Tainna tavra David piŋaruq Philistia-miilgutilaamisun.

12 Aglaan Achish-gum ukpiġiŋagaa David aasii inmiñun uqallakłuni inna, “David uumigipiaġataqługu ilaan iñuŋisa Israel-miuguruat, kivgauruksrauniaqtuq uvamnun iñuuniqtutilaamisun.”

Iñupiatun Mumiksat Uqalugiksuat (North Slope Iñupiaq Bible) © American Bible Society.

All rights reserved.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

American Bible Society
Lean sinn:



Sanasan