1 Samuel 26 - Iñupiatun Mumiksat Uqalugiksuat

David-gum Iñuupkalgitkaa Saul

¹ Aŋutit Ziph-miñ Saul ullaŋagaat Gibeah-mi aasii uqallautivlugu David iriqsimanivḷugu Iġġiani Hachilah-m killiŋani Judean-gum nunagluktuaŋata.

² Saul aullaŋaruq piqasiqhuni 3,000-nik nakuuniqsranik aŋuyaktinik Israel-mi nunagluktuaŋanun Ziph-gum ivaġiaqługu David,

³ aasii nullaqhuni apqutim saniġaanun Iġġiani Hachilah-m. David nunagluktuamiinŋaruq. Aasii iḷitchuġigami Saul qaisilaaŋa ivaġiaqługu ilaa,

⁴ aullaqtitchiŋaruq nalunaukkiruanik aasii iḷitchuġivluni Saul qaiŋapiaqtilaaŋanik.

⁵ David aullaŋaruq aasii paqiłługik sumipiaq Saul-lu Abner-lu, iġñiŋa Ner-m, qaukłiuruaq Saul-gum aŋuyaktiŋiññik, siñiktilaaŋigñik. Saul siñigniqsuq iḷuani nullaġvium, aasii iñuŋich avataani.

⁶ Tavraasii David-gum apiqsruŋagaik Ahimelech-lu Hit-miuguruaq, Abishai-lu aniqataa Joab-gum (aakagiraŋak Zeruiah), “Nallivsik piqasiġñiaqpaŋa Saul-gum nullaġvianukkuma?” “Uvaŋa,” Abishai-m kiugaa.

⁷ Tavraasii unnuaġman David-lu Abishai-ḷu tikiñŋaruk Saul-gum nullaġvianun, aasii paqinŋagaak Saul siñiktuaq qitqanni, nauligautiŋa napavluni nunami saniġaani niaquata. Abner-lu aŋuyaktillu siñigniqsut avataani Saul-gum.

⁸ Abishai-m uqallautigaa David, “God-im iḷiŋagaa akiḷḷiġiran suaŋŋatignun anaqapak. Nauligautaa una puttutilagu ilaanun aasii nauliutilugu nunamun atausiaġlugu—nauliksatqiktaksraitchuq!”

⁹ Aglaan David uqallaktuq, “Anniqsuksraġiŋitkiñ! Atanġum tatavsapiaġniaġaa iñuk anniġñiktuaq ilaan umialiksraqtaamiñun.

¹⁰ Atanġum Iñuuruam takkuani,” David uqaqtuq, “Iḷisimaruŋa ilaan Atanġum tuqunniaġaa Saul, tuquviksraŋa tikitpan naaggaunnii tuqukpan aŋuyaktuani.

¹¹ Atanġum pitchaiḷiḷiŋa anniŋitchumagiga Atanġum umialiguqtaŋa! Piḷugik nauliŋalu imiqaġvialu, aullaqta.”

¹² Tavraasii David-gum piŋagaik nauliglu imiqaġviglu saniġaaniñ niaquata Saul, aasii ilaalu Abishai-ḷu aullaŋaruk. Kia unnii tautuŋaitkaik naagga iḷisimaruagitchuq suruamik naaggaunnii itiqtuagiñŋaruq—siññaaġiŋarut, qanukkii Atanġum siññaaġiksinŋagaich iluqaisa.

¹³ Aasii David ikaaŋaruq taavuŋatchianun natiġnaam qaaŋanun qimiqqam, tikisiġumiñaiqhuni,

¹⁴ aasii saqłautivlugich Saul-gum aŋuyaktiŋich suli Abner, “Abner! Tusaallaviŋa?” “Kiñaimña saqłakpa tupaaqługu umialik?” Abner apiqsriruq.

¹⁵ David-gum kiugaa, “Abner, Israel iñuŋiññi qutchiksuaguŋitpich? Summan aasiuvva qaunagiŋitpiuŋ umialgiñ, umialguruaq? Akkupak uvva iñuk isiŋaruq nullaġvivsiññun tuqutchukługu umialgiñ.

¹⁶ Savaaksrautikkaluan piŋitkiñ, Abner! Uqallaktuŋa takkuani Atanġum iluqavsi tuquruksraugaluaqtusi, qanukkii munaġiŋitkiksi umialiksi, Atanġum umialiguŋaraŋa. Qiñiġitchi! Nauŋ imña umialgum nauliŋa? Nauŋ imña imiqaġviŋa niaquata saniġaaniittuaq?”

¹⁷ Saul-gum iḷisaġivlugu David-gum iġñaŋa apiqsriruq, “David, ilvich, iġñiġa?” “Ii, Qutchiksuaguruatiin,” David-gum kiugaa.

¹⁸ Innaqhuniḷu, “Summan uvva piyuumigiviŋasuli, iliŋnun kivgaq? Suŋavik imña? Sumik pitquramik naviksiŋavik?

¹⁹ Umialguruatiin, David uqallaktuq, naalaġniuŋ uqaluksraġa. Atanġum ilaata akiḷḷiġuutiŋakpaŋa iliŋnun, aitchuun ilaanun isumalitqiutiginiaġaa; aglaan iñuich piŋakparruŋ, Atanġum pimaqłuksaġaich. Qanukkiuvva aullaqtinŋagaanŋa Atanġum nunaksrirrutaaniñ uvamnun. Uqallakłutiŋ ‘Aullaġlutin sumun nanġaiyyaġiñ allaŋŋaqtanik god-inik.’

²⁰ Tuqutinnaŋa taagani nunami, piiḷḷuŋa nayuutiniŋanin Atanġum. Summan uvva umialiŋa Israel-gum qaiñiaqpa tuqutchuglugu qupilġuuratun ittuaŋa uvaŋa? Summan aŋuniaqtuatun qupaługmik pivaŋa?”

²¹ Saul-gum kiugaa, “Killukuaŋaruŋa. Utiġiñ, David, iġñiiŋ! Anniatqigñiaŋitkikpiñ, qanukkii iñuupkaġiŋma uvva. Isumalluaġiipaluktuŋa! Piḷḷuataŋipaluktuŋa!”

²² David uqallaktuq, “Uvva nauligautin, Umialguruatiin. Iḷaŋat iñukpich qaiḷuni piḷiuŋ.

²³ Atanġum akiññaktitchuugaich ukpiqtuallu iluakullu iñuuruat. Uvlupak qaitkaluaġaatin uvamnun, aglaan anniŋitkikpiñ, ilvich Atanġum umialiguqtaŋa.

²⁴ Iñuupkaġapkiḷḷi uvlupak, Atanġumlituq tainna piyumagaaŋa suli iluiḷḷiuġutipayaaniñ piiġḷuŋa!”

²⁵ Saul-gum uqallautigaa David, “God-im ikayuġlisin, iġñiiŋ! Suliqipayaaqtaġni piḷḷuataġniaqtutin!” Tavraasii David aullaŋaruq, aasiiḷi Saul utiŋaruq aimaaġvigmiñun.