1 Samuel 24 - Iñupiatun Mumiksat Uqalugiksuat

David-gum Iñuupkaġaa Saul

¹ Saul utiġman aŋuyaktuaniñ Philistia-ġmiuniñ, kiliŋagaat David nunagluktuamiinnivḷugu qaniŋani Engedi-m.

² Saul-gum kaluqługich 3,000-tun iñugiaktigiruat aŋuyaktilluataqpaich ivaġiaŋagaa David-lu iñuŋiḷḷu kivalliani Wild Goat Rocks-gum.

³ Tikiñŋaruq qaiġusugmun qanittuamun imnaich iniŋannun, apqutim saniġaani, aasii quisaqtuqhuni. Suagguuq ukua qaiġusugmi David-lu iñuñiḷu iriqsimamaruat tatqamanisaaq iḷuani.

⁴ Uqallautiŋagaat iñuŋisa David, “Piviksran nalauttuq! Atanġum uqallautiŋagaatin akiḷḷiġiran qaiññiaġnivḷugu suaŋŋatignun suli isumaktun aŋalatchumiñaġnivḷugu.” David-gum nalunaukkivłuni iḷaŋŋaqsiŋaruq Saul-gum quppiġaaŋaniñ naluŋŋaan.

⁵ Aglaan David-gum isumaŋa anniŋaruq,

⁶ aasii uqallaŋaruq iñumiñun “Atanġumtuq ikayuġliŋa anniŋitchumagiga umialiga, Atanġum piksraqtaaġiŋaraŋa umialiguqługu! Anniqtuksraġiŋitkiga suuramikunnii, qanukkii Atanġum umialiksraqtaaġiŋagaa!”

⁷ Tavraasii David-gum isummiqsinŋagaich iñugirani pisaġitquŋił̣ł̣ugu Saul. Saul makinŋaruq, anivḷuni qaiġusugmiñ, aasii aullaqhuni.

⁸ Tavra David-gum maliŋagaa aasii ququulavlugu, “Qutchiksuaguruatiin!” Saul-gum saanŋagaa, aasii David kurraŋaruq nunamun qiksiksrautikun

⁹ aasii uqallakhuni, “Summan uvva naalaġnisuuvigich iñuich uqaġmata uvamnun anniġñialanivḷutin?

¹⁰ Iḷitchuġiyumiñaqtutin akkupak qaiġusugmi Atanġum iḷiŋagaluaġaatin suaŋŋatimnun. Iḷaŋisa iñugma tuqutqugaluaġaatin, aglaan nagligiŋagikpiñ aasii uqallautiŋagitka anniġumiñaiññivḷutin suuramikunnii, qanukkii ilvich Atanġum piksraqtaaġiŋagaatin umialgutquvlutin.

¹¹ Tautuguŋ uvva, aapaaŋ Saul, quppiġaaqpich iḷaviñiŋa tigumiaġiga! Tuqutchumiñaŋagaluaġikpiñ, aglaan uumiŋa iḷaŋŋaqsisiññaŋaruŋa. Taavsruma ukpiqtitaksraġigaatin isumaqaŋisilaamnik akiḷḷiqsruġuglutin naaggaunnii anniaġuglutin. Ilvich ivaaġigigma tuqutchukłuŋa, uvvaluuvvaa uvaŋa sumaqłuktaŋaitkaluaqtillutin.

¹² Atanġumtuq isivġiġḷiuŋ nalliqpuk killukuaŋatilaaŋa! Tatavsaġlisittuq surġausikkun uvamnun, qanukkii uvaŋa anniġumiñaitkikpiñ suuramikunnii.

¹³ Tusaaŋagiñ una utuqqaq uqaluk, ‘Pigiitchuaq savaaġisuugaat kisimik pigiitchualiqirit iñuich.’ Tavraasii uvaŋa anniġñiaŋitkikpiñ.

¹⁴ Tautuksiuŋ uvva umialiŋata Israel tuqunniataktaŋa! Tautuksiuŋ maliqataaŋa! Tuquŋaraq qimmiq, qupilġuuraq!

¹⁵ Ataniq isivġiiñiaqtuq, suli sivunniiñiaqtuq nalliqpuk killukuaŋatilaaŋa. Ilaantuq qimilġuġliuŋ taamna, ikayuġugluŋa uvaŋa, aasii annautiluŋa iliŋniñ.”

¹⁶ David uqaanigman Saul uqallaktuq, “Ilviuvich tavra, David iġñiġa?” Aasii qianagutiruq.

¹⁷ Aasii uqallautivlugu David, “Ilvich iluakkuaqtutin aasii uvaŋa killukuaqtuŋa. Ilvich aŋalalluataŋagiŋma, uvamnulli aŋalamaqłuktillutin!

¹⁸ Uvlupak qiñiqtitkiñ qanutun nakuugutitilaamnik iliŋnun, qanukkii tuqunŋitkigma, uvvaluuvvaa Ataniġmun qaitkaluaqtilluŋa iliŋnun.

¹⁹ Qavsiiqsuaŋava iñuum akiḷḷiñi tikitkaluaqługu annaktinmauŋ anniġaluaġnagu? Atanġum ikayuġlisin uvaŋa tainna aŋalatkamŋa uvlupak!

²⁰ Nalupqisuŋaipiaqtuŋa ilvich umialguġniaqtilaaġnik Israel-mun suli umialgun igliġniaqtuq iliŋnik aullariqaġuni.

²¹ Aglaan unniqsuqłiiŋŋa Atanġum atqagun anniġñiaŋiññiḷugich kiŋuvaaksratka, atiġalu suli nanmiñiq iḷagma atiŋat piiguqtauŋitchumaut.”

²² David unniqsuqłiiŋaruq. Tavraasii Saul aiŋaruq, aasiiḷi David-lu iñuniḷu isitqiŋarut iriqsimavigmignun.