1 Samuel 23 - Iñupiatun Mumiksat Uqalugiksuat

David-gum Annautigaa Ini Keilah

¹ David tusaaŋaruq Philistia-ġmiut aŋuyagnivḷugi Keilah-mi suli tigligaġnivḷugich pukuaqqammiŋich palauvaksrat.

² Tavraasii apiġigaa Ataniq, “Aŋuyagiaġlagich Philistia-ġmiut?” “Ii,” Atanġum kiugaa. “Aŋuyagiakkich aasii annautilugu Keilah.”

³ Aglaan David-gum iñuŋisa uqallautigaat, “Maani Judah-mi iqsirugut; anayanaqpaiññiaqtuq Keilah-mukkupta aasii aŋuyaglugich Philistia-ġmiut aŋuyaktiŋich!”

⁴ Tavraasii David-gum apiġilgitkaa Ataniq, aasii Atangum kiuŋagaa, “Aullaġiñ Keilah-mun qanukkii akimmasiġñiaġikpiñ Philistia-ġmiuniñ.”

⁵ Tavraasii David-lu iñuniḷu Keilah-muŋarut aasii aŋuyaaqsivḷugich Philistia-ġmiut; tuqunŋagaich iñugiaktuat suli pamiqsaaŋich pivḷugich. Aasii tavra tainna David-gum annautiŋagaa taamna ini.

⁶ Abiathar iġñiŋa Ahimelech-gum annakkami suli iḷḷatigami David-mun Keilah-mi, kaluŋagaa aŋaiyyuliqsiqpaum kiapiġutaa.

⁷ Saul kiliŋagaat David Keilah-miinnivḷugu, aasii uqallaŋaruq, “God-im ilaa suaŋŋatimnukkaa. David qanuqsausiiŋaruq inmiñun inimukkami katchiḷigaamun iniqpagmun sapukutaqaqtuamun upkuaqpagnik.”

⁸ Tavraasii Saul-gum ququaŋagaich aŋuyaktini aŋuyagiaquvlugich, akiḷḷiqsruquvlugu Keilah suli avallugich David-lu iñuniḷu.

⁹ David tusaagami Saul-mun aŋuyagumaaqtilaamiñik, uqallautiŋagaa aŋaiyyuliqsiqpak Abiathar, “Qaġġisuuttiuŋ aŋaiyyuliqsiqpaum kiapiġutaa uvuŋa.”

¹⁰ Aasii David uqallaktuq, “Ataniiq, God-iŋa Israel, tusaaŋaruŋauvva Saul qaiyumanivḷugu Keilah-mun suli suksraunġiġḷugu uvaŋa pisigiluŋa, ilvich kivgan.

¹¹ Iñuŋisa Keilah-m aitchuutiginiaqpanŋa Saul-mun? Saul qaipiaġniaqpa, tusaaraptun? Ataniiq, God-auruatiin Israel-mun, iŋiqsruġikpiñ kiutquvluŋa!” Atanġum kiugaa, “Saul qaiñiaqtuq.”

¹² “Aasii iñuŋisa Keilah-m aitchuutiginiaqpatigut uvaŋalu iñutkalu Saul-mun?” David-gum apiġilgitkaa. “Qaiññiaġaasi,” Atanġum kiugaa.

¹³ Tavraasii David-lu iñuniḷu 600-tun iñugiaktigivalliqhutik—aullaŋarut Keilah-miñ aasii igliaqsivḷutik. Saul tusaagami David annaksaqhuni aullaġnivḷugu, aġiuŋagaa sivunniutikkaluani.

David Qimiqqaniinman

¹⁴ David iriqsimaŋaruq qimiqqani, nunagluktuami qaniŋaniittuam Ziph. Saul-gum ivasuŋaiññaġuugaa David, aglaan God-im qaitchuitkaa ilaanun.

¹⁵ David iḷisimaŋaruq Saul-mun tuqutchumaaqtilaamiñik. David Horesh-miinŋaruq, nunagluktuami qaniŋani Ziph-gum.

¹⁶ Jonathan-gum ullaŋagaa tavruŋa aasii qapiŋaisaaŋagaa God-im qaunakkutaagun,

¹⁷ uqautivlugu, “Iqsiñak. Aapagma Saul-gum anniġumiñaitkaatin. Iḷisimaruq nalupqinaitchuamik ilvich umialguniaqtilaaġnik Israel-mun aasii uvaŋa tugliuluŋa iliŋnun.”

¹⁸ Iliŋik qiksikkutikun unniqsuqłiiŋaruk avilaitqatigiigukłutik. David inŋaruq Horesh-mi, aasii Jonathan-li aiŋaruq.

¹⁹ Iñuich iḷaŋich Ziph-miut ullautiŋarut Saul-mun Gibeah-mi aasii uqallautivlugu, “David samma iriqsimaruq nunaptigni Horesh-mi Iġġimi Hachilah-mi, kiluliñaaŋani Judea-m nunagluktuaŋani.

²⁰ Iḷisimarugut, Qutchiksuaguruatiin, qanutun iliŋnun tigusuktilaaŋanik David; tavraasii qaiñ nunaptignun, aasii uvagut tigupkaġniaġikput iliŋnun.”

²¹ Saul-gum kiugaich, “Atanġumtuq quviasuusiaqaqtillisi nakuugutikavsiñŋa!

²² Aullaġusi taavaniipiaqtilaaġiaqsiuŋ; iḷitchuġimmaġiksaaġiaġitchi sumiipiaqtilaaŋa suli kimun tautuŋatilaaŋa taamani. Tusaaŋaruŋa pitqiksiġayugnivḷugu.

²³ Iḷitchuġiyumausi sumipiaq iriqsimatilaaŋanik, aasii qaġġiripiaqsaqtusi tusaayugaamik uvamnun iḷitchuġipqauraġuvsi. Tavraasii maligniaġivsi, aasii taavaniitpansuli, paqinniaġiga, iluqaan unnii nunaŋa Judah-m ivaqtuksraugupku.”

²⁴ Tavraasii aullaŋarut aasii utiqhutik Ziph-mun sivuġaqługu Saul. David-lu iñuniḷu nunagluktuaŋani Maon-gum inŋarut, Arabah-mi kiluliñaaŋani nunagluktuaŋan Judah-m.

²⁵ Saul-lu iñuniḷu aullaŋarut ivaġiaqługu David, aglaan David tusaaŋaruq aasii uyaġauruamun qimiqqamun nunagluktuaŋata Maon-gum aullaqhuni aasii tavraniiłłuni. Saul-gum tusaagamiuŋ taamna maliqataŋagaa David.

²⁶ Saul-lu iñuniḷu qimiqqam akianiinŋarut, avinŋavlutik David-miḷḷu iñuŋiññiḷḷu, taavanitchiġniittuaniñ. Qilamiqsruqhutik qimaaŋarut Saul-miḷḷu iñuŋiññiḷḷu, qalliḷġataviksuaniñ piññaktaaġiyasivḷugich.

²⁷ Tainnaiḷimmiullu iñuk tikiñŋaruq Saul-mun aasii uqallautivlugu, “Utiġiñ akkupak! Philistia-ġmiut aŋuyagiaġaat manna nuna!”

²⁸ Tavraasii Saul-gum maliqataŋaiŋagaa David aasii aŋuyagiaqługich Philistia-ġmiut. Tainnamik tavra taamna ini atiqaqtuq Avirvik Qimiġaq.

²⁹ David aullaŋaruq aasii nunaŋanukhuni Engedi-m, tavraniasii iriqsimaaqsivḷuni.