1 Samuel 21 - Iñupiatun Mumiksat Uqalugiksuat

David Qimaktuq Saul-miñ

¹ David aŋaiyyuliqsiqpagmuŋaruq Ahimelech-mun Nob-mi. Ahimelech aniŋaruq uulillaġmi kasuġiaqługu David aasii apiġivlugu, “Summan qaivich kisivich?”

² “Qairuŋauvva umialik pisigivlugu,” David-gum kiugaa. “Uqallautiraani iḷisimapkaquŋił̣ł̣ugu kiñapayaaq summan qaipkaŋammagaaġma. Uqallautiŋagitkaimma iñutka sumi kasuġniaġnivḷugi.

³ Tavraasii, sunik taquanik piqaqpich? Aitchuŋŋa tallimanik punniġnik naaggaunnii sunik allanik piqaġuvich.”

⁴ Aŋaiyyuliqsiqpak uqallaktuq, “Punniġruiññanik piitchuŋa, salumaruałhiñanik; pigiyumiñaġiñ aŋutitin aġnaqiŋaitpata.”

⁵ “Naumi piŋaipiaqtut,” David-gum kiugaa. “Aŋutigma piḷġusikaaq salumaniq tuvraġuugaat aullaġruiññaġaluaġaptaunnii; maannauvva akkupak tuvraġaat uumani inmikkuaŋaruami aullaġapta!”

⁶ Tavraasii aŋaiyyuliqsiqpaum qaiñŋagaa salumaruaq punniq David-mun, qanukkii punniġich pigitualuktaŋich aitchuutausuuruat God-mun, piiŋaraŋich salumaruamiñ niġġivigmiñ simmausiŋaruanik uutqammianik punniġnik.

⁷ (Saul-gum pamiqsaaliqiriŋisa qaukłiŋat, Doeg, Edom-miu, tamaaniinŋaniqsuq tavrani uvlumi, qanukkii piḷġusikaani aŋaiyyuliqinikun naatittuksrauvlugu.)

⁸ David-gum uqallautiŋagaa Ahimelech, “Nauligautiqaqpich naagga savikpagmik piksramnik? Umialgum akkupauraq aullaqtitpaił̣ł̣uŋa savikpagaunnii naagga allat satkut isaŋiñiŋagitka.”

⁹ Ahimelech-gum kiugaa, “Savikpaŋa Goliath-gum Philistia-ġmium pigigiga, ilvich tuquttaqpich Elah Valley-mi; tunuaniittuq aŋaiyyuliqsiqpaum kiapiġutaata, puuqaqhuni kalikumik. Pigisukkupku, piuŋ-tavratualuk satku maaniittuaq.” “Qairruŋ,” David uqallaktuq. “Nakuułhaaqtuamik savikpagmik piitchuq sumiḷiqaa!”

¹⁰ Tavra David aullaqtuq, qimakłuni Saul-miñ, aasii Umialigmun Achish-mukłuni Gath-miittuamun.

¹¹ Umialgum qaukłiuraŋisa uqallautigaat Achish, “David-guŋitpauna, umialguruaq nunamiñi? Taamnauvva aŋun aġnat atuutiraat, kanaakkiullaġmik inna, ‘Saul tuqutchiŋaruq 1,000-guruanik, aglaan David tuqutchiŋaruq 10,000-guruanik.’”

¹² Taapkua uqaluŋich sivuniqtuŋarut David-mun, aasii iqsigiliqpaŋagaa Umialik Achish.

¹³ Tavraasii David-gum nayutuaġamigich, kinnaġuŋŋuaġaqtuq suli kinnaqtun isagutiraqtuq tigunialammanni; kaŋiqsiñaiḷanik aglakhuni upkuaqpagmun suli quġliaqhuni umigmiñun.

¹⁴ Tavra Achish uqallautiŋagaich qaukłiurani, “Tautuksiuŋ! Taamna aŋun kinnaŋaaqtuq! Summan uvva qaġġisiraqsi uvamnun?

¹⁵ Taimmaipkua kinnaŋaaqtuat iñutka naamaitpat? Summan allamiksuli qaġġisimmivisi kinniqiriksramik maani iglumni?”