1 Samuel 2 - Iñupiatun Mumiksat Uqalugiksuat

Hannah-m Aŋaiyyutaa

¹ Hannah aŋaiyyuruq: “Atanġum siḷivinŋagaa uummatiga quviasuunmik; quviasuutigiqpakkiga taamna savaaŋa! Iglautigigitka akiḷḷiitka; quviasuutiqpaqaqtuŋa qanukkii God-im annautiŋagaaŋa!

² “Allamik salumaruagitchuq Ataniqtun; allamik piitchuq ilaatun ittuamik, qaunaksrimik piitchuq allamik God-iptiktun ittuamik.

³ Nipatulusi kamasaaŋaiġitchi; nutqaqtitkich kamasaaġutauruat uqalusi. Qanukkii Ataniq God-auruq iḷisimaruaq, suli isivġiġaich iluqaisa iñuich savaaŋich.

⁴ Suaŋaruat aŋuyaktit pisiksiŋich naviŋarut, aglaan suaŋaitchuat saŋŋisirut.

⁵ Iñuich niġisuksiuŋiñŋagaluaqtuat savaurrirut allanun niqiksraqaġniaġumik, aglaan kaaktuat kaaŋaiqsut. Miqłiqsisuiñŋagaluaqtuaq miqłiqsiruq tallimat malġugnik, aglaan aakauruaq iñugiaktuanun aliasukpaktuq.

⁶ Ataniq tuqutchisuuruq suli iñuguqtitchisuuruq; iñuich nunaŋanuktitchuugaich tuquŋaruat aasii utiqtinmivḷugich.

⁷ Iñuich iḷaŋich piiḷḷiuqtitkaich suli iḷaŋich umialgupkaqługich; iḷaŋich qiñuiqsił̣ł̣ugich suli iḷaŋich kamanaqsivḷugich.

⁸ Anniqsuqługich piiḷḷiuqtuat nunamiñ avyuqtuamiñ suli makitiłługich suiḷḷiuqtuat nagliksaaġutaanniñ. Avilaitqatiliutivlugich qaukłiuruanun suli inillakługich qiksigñaqtuat iniŋiññun. Maŋŋuŋi nunam Atanġum pigigaich; taapkunuŋa savaaġiŋagaa nunapayaaq.

⁹ “Qaunagigaich iñuggutiŋi ukpiqtuat ilaanun, aglaan piḷuktuat tammaŋarut taaqtuamun; iñuk akimasuitchuq ilaan suaŋŋanmigun.

¹⁰ Atanġum akiḷḷiiŋich maqutauniaqtut; ilaan kallugmun pipkaġniaġaich qiḷagmiñ. Atanġum isivġiġñiaġaa nunapayaaq; suaŋŋasiġñiaġaa umialiñi, ilaan umialiksraqtaani akimapkaġniaġaa.”

¹¹ Elkanah aiŋaruq Ramah-mun, aglaan nukatpiaġruk Samuel Shiloh-miinŋaruq savautivlugu Ataniq qaunaksriqaqhuni aŋaiyyuliqsiqpagmik Eli-mik.

Eli-m Iġñiŋich

¹² Eli-m iġñiŋich pigiiḷḷiqirauŋarut. Qiksiksrautiqaŋaitchut Ataniġmun.

¹³ Tavraaglaan iñuk aitchuimman ikipkautinik, aŋaiyyuliqsiqpaich kivgaŋich qairaqtut kakiuraqpaligaaqłutik. Niqi qalatiłługusuli,

¹⁴ kakiaqsiraġaqtuq utkusikpagmiñ aasii kivġam kakiaqtaŋa aŋaiyyuliqsiqpaum piksraqtaaġiraġigaa. Iluqaisa Israel-miut Shiloh-muktuat aitchuiyyaqłutik tavra tainna aŋalattaġigaich.

¹⁵ Aglaan qaunnaŋa ikipkautigiŋaiñŋaan, aŋaiyyuliqsiqpaum kivgaŋa qairaqtuq aasii uqallautivlugu aitchuisaqtuaq ikipkautikun, “Aitchuġuŋ aŋaiyyuliqsiqpak niqimik samuunnaagaksraŋanik; akuqtuiñiaŋitchuq iligniñ qalatinŋaruamik niqimik aglaan uunŋaitchuamik.”

¹⁶ Iñuk kiukpan inna, “Iluakkuaġuta pisa, iliktitqaaġlugu qaunnaq aasii piksraġutin isumaktun,” aŋaiyyuliqsiqpaum kivgaŋa uqallakkayaqtuq inna, “Naumi! Qairruŋ akkupak! Qaiñŋitkupku aattuksraġiniaġikpiñ!”

¹⁷ Taamna piḷuutaat iġñiŋisa Eli-m atqunaq nuimaruaguruq qiññaŋani Atanġum, qanukkii aŋalataġiŋagaich aitchuutauruat Ataniġmun qiksiksraiqhutik.

Samuel Shilo-mi

¹⁸ Tavrani nukatpiaġruk Samuel inŋaruq savautivlugu Ataniq, atuqhuni ukiłhaaġiksuamik ilaaguaqtauruamik satqaġunmik.

¹⁹ Ukiutuaġman aakaŋata qaliġualiuġuumagaa aasii aałługu iġñiġmiñun malikkamiuŋ uiñi aitchuiyyaġman.

²⁰ Tavra Eli-m aŋaiyyutiraġigaik Elkanah-lu nuliaŋalu, aasii uqallautivlugu Elkanah, “Atanġuptuq aitchuvsaaġlisik allanik miqłiqtunik siŋaiyaupkaġlugu una aġnaq inaŋiqsaġlugu taamna qaitchaqtik ilaanun.” Tainnaanigmatik tavra utiġaqtuk aimaaġvigmiŋñun.

²¹ Tavra Atanġum quviasuusiŋagaa Hannah, aasii piŋasunik iġñiqavsaaŋaruq suli malġugnik paniqaqłuni. Aŋutaiyaaq Samuel iñuguŋaruq savautivlugu Ataniq.

Eli-ḷu Iġñiġutiiniḷu

²² Eli aŋayuqaaqpaŋaruq. Tusaaraġigaich iġñiġutiimi surġautiŋich Israel-miuguruanun suli tusaammiuq siñiqatiqaġuunivḷugich aġnanik savaktuanik upkuaŋani Tupiqpaum Atanġum irviani.

²³ Tavraasii uqallautiŋagaich, “Summan uvva tainna pivisi? Iñupayaat uqautigaanŋa piḷuktuanik savaavsiññik.

²⁴ Tainna piŋaiġitchi iġñiġutiiŋ! Piḷuktuq uvva iñuŋisa Atanġum uqautigiraŋat!

²⁵ Iñuum pimaqłukpauŋ alla iñuk God-im ikayuġuugaa kaŋiqsipkaqługu killukuaqtuaq; aglaan kia ikayuġniaqpauŋ qiññuaqtuutilugu Ataniġmun?” Aglaan naalaġniŋiñŋagaat aapaktik, qanuq Atanġum tuqutaksriŋamagaich.

²⁶ Nukatpiaġruk Samuel aglisiiññaŋaruq suli iñunnaġiŋagaat Atanġuvlu iñuiḷḷu.

Uqaluata God-im Akiḷḷiqsruŋagai Eli-ḷu Iḷaŋiḷḷu

²⁷ God-im uqaqtaa Eli-muŋaruq uqallautiyyaqługu uumiŋa uqalugmik Ataniġmiñ: “Maŋŋuġiran Aaron iḷaniḷu kivgaummata umialgannun Egypt-gum, nalupqinaiqł̣ugu iḷitchugipkaŋaitpik kiŋuniivsiññun Egypt-miinmata qaukłiqaqłutik Pharaoh-mik.

²⁸ Maŋŋuqatigiipayaaqtuaniñ Israel-guruat piksraqtaaġiŋagitka Aaron-kut aŋaiyyuliqsiqpagisukługich, savaquvlugich ikipkaivigmi, ikipkaiḷutik tivraġiksuanik, suli atuquvlugu aŋaiyyuliqsiqpaum kiapiġutaa takkumni. Piksrallasiŋagitkalu iḷaŋiññik aitchuutit ikipkaqtat.

²⁹ Summan aasiuvva suuŋiḷaġivigi aitchuutigitquratka ikipkautikullu aitchuutikullu piraksriutipkun iñumniñ? Summan, Eli, qiksigiłhaaqpigi iġñiġutitin uvamniñ aasii quiññaktillugi nakuuniqsraŋiññik aitchuutigiraŋiññin ikipkautikun iñuŋisa Israel uvamnun?

³⁰ Uvaŋa Ataniq God-iŋa Israel, unniqsuqłiiŋaruŋa taimani ilvich iḷagnullu kiŋuvaaksraġnullu savautiniaġnivḷuŋa aŋaiyyuliqsiqpaulutik isuitchuamun. Aglaan akkupak uqallaktuŋa tainnaitinniaŋitkiga! Tavraŋŋaaglaan, qiksiginiaġitka iliŋich uvamnik qiksiksraqtuat, aasii aŋalamaqługniaġitka uvamnik suuŋiḷaġiññiktuat.

³¹ Naalaġniŋŋa, uvva tikiññiaqtuq tuqutchiviksraġa nutaġanik aŋutinik ilivsiññiḷḷu iḷagniḷḷu, aŋutit ilivsiññi utuqqaliḷutik iñuuyumiñaiġḷugich.

³² Iluiginiaġaluaġiñ suli tusulugich ikayuutitka allanun Israel-miunun, aglaan kiñaunnii iḷagni utuqqaliḷuni iñuutqigñiaŋitchuq.

³³ Tavraaglaan atausiq kiŋuvaaġiran iñuupkaġniaġiga aasii ilaan savautiniaġaaŋa aŋaiyyuliqsiqpauluni. Aglaan ayauniaqtuq suli niġiukkutaiġuni suli allat iluġatik kiŋuvaatin tuquniaqtut pimaqłuktautikun.

³⁴ Iġñakiñ Hophni-ḷu Phinehas-lu atautchikun tuqukpagnik uvlumi tavra taaptuma iḷisimapkaġniaġaatin uqalutka nalaunniaqtilaaŋiññik.

³⁵ Aŋaiyyuliqsiqpaksraġniaqtuŋa piŋitqataaŋitchuamik suli pisuutipayaamnik kamaksriñiaqtuamik. Kiŋuvaaksriññiaġiga, ataramik savaktuksranik umialiksraqtaamnun.

³⁶ Kiŋuvaatin iñuuruat taaptumuŋa aŋaiyyuliqsiqpaŋmuktuksrausuuniaqtut maniqaġukkumik naagga niqiqaġukkumik, suli iŋiqsruqtuksrausuuniaqtut ikayuġukkumisigiŋ aŋaiyyuliqsiqpaich, niqiksraqaġniaġumik.”