1 Samuel 19 - Iñupiatun Mumiksat Uqalugiksuat

David Aŋalamaqłuktauŋaruq Saul-miñ

¹ Saul-gum uqallautigaich Jonathan-lu iluqaisalu atanaurani tuqutchumaaġnivḷugu David. Aglaan Jonathan-gum piqpagiliqpaŋagaa David,

² tavraasii kiliktuŋagaa David inna, “Aapaa tuqutchumaaġaatin. Qaunakłaaqsaqtutin uvlaaku uvlaami; iriġutin naluraŋannun aasii tavrani iriqsimasaqtutin.

³ Makitaqatigiyyaġniaġiga aapaga nunaraani iriqsimavigñi, suli uqautiniaġiga ilikkun. Sumik iḷitchuġiguma iḷisimapkaġniaġikpiñ.”

⁴ Jonathan-gum nanġaġaa David Saul-mun suli uqallakhuni, “Umialiik, pimaqłuktaġnagu kivgan David. Ilaan sumik killukuaqtautiŋaitkaatin; aglaan uvva, savaapayauraŋata ikayuqpaŋagaatin.

⁵ Inmiñun anayasaaŋaruq tuqunnamiuŋ Goliath, aasii Ataniġum akimmatiŋagaa Israel. Tautukkapku quyaŋarutin. Summan aasiuvva, paŋmapak pimaqłuktaġukpiuŋ patchisaiḷaaq aŋun suli tuqullugu David sumik pimaqłuktaŋaiḷaaq?”

⁶ Saul naalaġniŋaruq Jonathan-gum uqaluŋiññik aasii unniqsuqłiiŋaruq Atanġum atqagun tuqunniaŋiññivḷugu David.

⁷ Tavraasii Jonathan-gum qaipkaŋagaa David aasii quliaqtuaġutivlugu iluqaiññik; tavra Jonathan-gum David Saul-muutiŋagaa, aasii David-gum savautiŋagaa umialik piusikaamisun sivuani.

⁸ Aŋuyanagutiŋalgitchut Philistia-ġmiullu. David-gum paaqłaŋagaich aasii akiiḷipiaġataqługich qimaapkaqtaallaisa.

⁹ Uvlut iḷaŋanni iḷitqusiqłuum qairuam Ataniġmiñ payariŋagaa Saul. Saul aquppiruaq iglumiñi tigumiaqługu nauligani, suli David tamaaniinmiruaq atuqtuuraqłuni.

¹⁰ Saul-gum nauliksaġaluaġaa nauligamiñik, aglaan David inuŋagaa aasii Saul-gum nauligaŋa tunŋaruq katchimun. David aqpamik qimaŋaruq aasii annakłuni.

¹¹ Tavrani unnuaġman Saul-gum tiliŋagaich aŋutit qaunagitquvlugu David-gum iglua aasii tuqullugu uvlaaqpan. Michal-gum, David tuvaaqataata, kiliŋagaa, “Aullaŋisuaġuvich unnuapak, uvlaaku tuqutauniaqtutin.”

¹² Michal-gum atqaqtinŋagaa igalaurakun, aasii aqpamik annaŋaruq.

¹³ Tavraasii iglum iñuuraqpaŋa pivḷugu, iḷiŋagaa tuŋiutinun, akisimik savaaguruamik nagrulium mitquŋiññik iḷisivḷuni niaquanun, aasii ulikł̣ugu.

¹⁴ Saul-gum iñuŋich qaimmata David aivḷugu Michal-gum uqallautiŋagaich naŋinnivḷugu.

¹⁵ Aglaan Saul-gum utiqtinŋagaich iliŋiññun tautupiaġlugu pitquvlugich. Pitqurriŋagaich inna, “Tigumiaqsiuŋ mauŋa tuŋiutiŋiññiillugu, aasii uvaŋa tuqunniaġiga.”

¹⁶ Isiŋarut aasii paqiłługu iñuuraqpak tuŋiutini suli nagruligum mitquŋiññik akisiliaq niaquani.

¹⁷ Saul-gum apiġigaa Michal, “Summan pitqiksiġautiviŋa inna aasii annaktiłługu akiḷḷiġa?” Michal-gum kiugaa, “Tuqunniaġniraani ikayuŋitkupku annaksaġumi.”

¹⁸ David annaŋaruq aasii Samuel ullakługu Ramah-mi aasii quliaqtuaġutivlugu iluqaiññik Saul-gum piraŋiññik inmiñun. Tavraasii David-lu Samuel-lu Naioth-muŋaruk aasii tavrani iłłutik.

¹⁹ Saul uqallautiŋagaat David Naioth-miinnivḷugu Ramah-miittuami,

²⁰ tavra aŋutinik aullaqtitchiŋaruq tigutquvlugu. Tautuŋarut uqaqtauruanik God-mun kanaakkiuruanik suli nipaalaruanik, Samuel-mik aullariqaqhutik. Tavraasii Iḷitqusiata God-im isiŋagaich Saul-gum iñuŋich, aasii kanaakkiunagutiŋammiut suli nipaalavlutik.

²¹ Saul-gum taamna tusaagamiuŋ, aullaqtitchivsaaŋaruq allanik, aasii kanaakkiunagutiŋammiut suli nipaalavlutik. Aullaqtitchivsaalgitchuq piŋayuanni, aasii tainnaptauq piŋammiut.

²² Tavra ilaa aullaŋaruq Ramah-mun. Tikiññami aŋiruamun nivviamun Secu-mi, apiqsriŋaruq sumiinmagaigñik Samuel-lu David-lu aasii uqallautiŋagaat Naioth-miinnivḷugik.

²³ Aasii Saul taamuŋanmuktillugu, Iḷitqusiata God-im isiŋammigaa, aasii kanaakkiuŋaruq suli nipaalaŋaruq tikiḷġataqhuni Naioth-mun.

²⁴ Annuġaiyaqhuni kanaakkiuŋaruq suli nipaalaŋaruq Samuel-gum takkuani, aasii nalaŋaruq annuġaiḷaq uvluq naałługu suli unnuaq naałługu. (Tavra tavraŋŋa uqaluk aullaqiŋaruq, “Saul unnii tavra uqaqtiġuqpa God-mun?”)