1 Samuel 18 - Iñupiatun Mumiksat Uqalugiksuat

¹ Saul-lu David-lu uqaqatigiiganiktuk. Taamna qaaŋiġman, Saul-gum iġñiŋata Jonathan nakuaġiliqpaŋagaa David aasii piqpagiliqpakługu inmiñun piqpakkutimisun.

² Saul-gum David ilimiñiitinŋagaa tavraŋŋa uvlumiñ aglaan suli aipkatqiŋaitkaa.

³ Jonathan sivunniŋaruq isuitchuamun avilaitqatigisukługu David qanukkii piqpakkutiqpaqaqłuni ilaanun.

⁴ Jonathan-gum mattaŋagaa qaliġuaq atuqtani aasii qaił̣ł̣ugu David-mun, taputivlugich aŋuyaunnat annuġaat, suli savikpani, pisiksiñi, suli tavsiñi.

⁵ David piḷḷuataġuuŋaruq sunulliqaa Saul-gum tilimmani, tavraasii Saul-gum qaukłiuraġuġniġaa aŋuyaktimiñun. Taamna iviġaumagiŋagaat Saul-gum qaukłiuraŋisalu iñuŋisalu iluqaġmik.

Saul-gum Killuġiliŋagaa David

⁶ David utiġman tuqunŋaqqaaqługu Goliath suli aŋuyaktit aiñmuktiłługich, aġnapayaaŋisa nunaaqqipayaat Israel-miittuat paaŋagaat Umialik Saul. Atuqłutik quvianaqtuanik atuutinik, kanaakkiuvlutik, suli atuqtuuraqłutik tambourine-nik suli nuqaqtilignik.

⁷ Quviasualaniġmigni aġnat atuŋarut inna, “Saul tuqutchiŋaruq 1000-guruanik, aglaan David tuqutchiŋaruq 10,000-guruanik.”

⁸ Saul-gum taamna nakuaġiŋaiñŋagaa, aasii qinnaliqpaŋaruq. Ilaa uqallaktuq, “David-mun tutitkaich quliułługich 10,000-guruat, aglaan uvamnun 1,000-gusiññaqtuat. Tavra umialigiliutisugniaġaat!”

⁹ Tavraasii Saul-gum iḷimagiliqł̣ugu tavraŋŋaaglaan uvlumiñ.

¹⁰ Uvlaakumman ilitqusiqłuum God-miñ qairuaq isiŋagaa Saul tavraŋŋatchiaq, aasii saqłaŋaruq iglumiñi kinnaġuŋaruatun. David atuqtuuraqtuaq nuqaqtiligmik, piusikaamisun uvlutuaġman. Tavrali Saul tigumiaŋaruq nauligaunmik.

¹¹ “Katchimun David niviŋŋaġniaġiga,” Saul inmiñun uqallaktuq, aasii nauliksaqługu David malġuiqsuaqhuni; aglaan David nauliktitchaiḷiŋaruq qiptaił̣ł̣uni.

¹² Saul-gum iqsigiŋagaa David qanukkii Atanġum itqatigiŋagaa David aglaan uniñŋavlugu Saul.

¹³ Tavraasii Saul-gum aullaqtinŋagaa aasii qaukłiġuqługu thousand-tun (1,000) iñugiaktigiruanun aŋutinun. David-gum aullatiŋagaich iñugni aŋuyaktuani

¹⁴ aasii piḷḷuataqhuni supayaaġami, qanukkii Atanġum nayuqługu.

¹⁵ Saul-gum iḷitchuġiŋagaa David-gum piḷḷuatautiŋa aasii iqsigilipiksuaqługu.

¹⁶ Aglaan iluqaġmik Israel-miullu Judah-ġmiullu nakuaġiŋagaat David qanukkii aullarriḷḷuatauvluni.

David-gum Tuvaaqasiutigaa Saul-gum Paniŋa

¹⁷ Tavraasii Saul-gum uqallautigaa David, “Uvva aŋayukłiq paniga Merab. Qaiññiaġiga ilignun tuvaaqatigitqulu aglaan kisian piraksriġutin aŋuyaktautqulutin uluġiiḷḷutin suli allanugaŋiḷḷutin, aasii aŋuyaaġilugich Atanġum aŋuyaktaŋich.” (Saul isumavluni Philistia-ġmiunun tuqunniaġasugivlugu David, aasii ilaan piŋiḷḷugu.)

¹⁸ David-gum kiugaa, “Kiuvik uvaŋa suli kitkut iḷatka inna umialigmun niŋauliutiniaqpik?”

¹⁹ Aglaan tikiñman Merab-gum qairviksraŋa David-mun, Merab qaisaumaruq aŋunmun atiqaqtuamun Adriel-mik Meholah-ġmiu.

²⁰ Tavraaglaan Saul-gum paniata, Michal, nakuaġiliqpagniġaa David, aasii Saul tusaagami iviġaŋamaruq.

²¹ Inmiñun uqallagniqsuq, “Michal qaiññiaġiga David-mun; sagluqiniaġiga Michal-kuaġlugu, aasii David tuqutauniaqtuq Philistia-ġmiunun.” Tavraasii Saul-gum uqallautivsaaġaa David, “Ilvich niŋauginiaġikpiñ.”

²² Saul-gum piraksriŋagaich atanauraġirani uqautitquvlugu David iñuiḷaami inna, “Umialgum iviġaumagigaatin suli iluqaġmiŋ atanaurat nakuaġigaatin; nalautittuq uvva tuvaaqasiutigupku paniŋa.”

²³ Tavraasii tainna uqallautiŋagaat David, aasii ilaan kiugaich, “Kamasuutigigaluaġiga umialigmun niŋauliutiniq, uvamnun aŋivaitchuq iḷiappauruamullu nalliumatiŋitchuamullu.”

²⁴ Atanaurat kilikkaat Saul David-gum uqaluŋiññik,

²⁵ aasii Saul-gum tiligaich David uqallautitquvlugu inna: “Umialgum akiḷiutigitqutualuktaŋich tuvaaqatiksraġnun nalunaiñŋutchiġḷugit sirguqtaunikun tuquŋaruat tallimakipiat (100) Philistia-ġmiut, akisaqsaġlugich akiḷḷiiñi.” (Tainnaġluguuvva Saul isummiŋavluni David tuqutautquvlugu Philistia-ġmiunun.)

²⁶ Saul atanauraŋisa kilikkaat David Saul uqaluŋiññik, aasii David-gum quviagiŋagaa isumagikami inmiñun umialigmun niŋaugiluni. Uvluq tikiñŋaiñŋaan katitirviksrani,

²⁷ David-lu iñuniḷu tuqutchiŋarut 200-nik Philistia-ġmiunik. Aanŋagaich nalunaiñŋutchiŋaruat sirguqtaunikun umialigmun aasii saaŋani kisiłługich, niŋauliutisukhuni. Tavraasii Saul-gum qaiñŋagaa paniñi Michal tuvaaqasiutitquvlugu David-mun.

²⁸ Saul iḷitchuġiŋaruq nalunaiqł̣ugu Ataniġmun nayuqtilaaŋanik David suli iḷitchuġimmiuq panimiñun nakuaġiqpaktilaaŋanik David.

²⁹ Tavraasii Saul-gum iqsigilivsaaŋagaa David suli akiḷḷiġiŋagaa iñuuniqtutilaamisun.

³⁰ Philistia-ġmiut aŋuyaktiŋich qairaqtut aŋuyagiaqhutik, aglaan iluqaiññi David piḷḷuataġuuŋaruq allaniñ Saul atanauraŋiññiñ. Taamna pisigivlugu David qutchiksuaġiliŋagaat.