1 Samuel 16 - Iñupiatun Mumiksat Uqalugiksuat

David Umialiksraqtaaguruq

¹ Ataniq uqallaktuq Samuel-mun “Qanutun imña qiñuniaqpiuŋ Saul? Umialiguŋaiŋagiga Israel-mun. Aglaan akkupak olive uqsruŋanik piḷutin Bethlehem-mugiñ, aŋunmun atiqaqtuamun Jesse-mik, qanukkii iġñiġutiiŋisa iḷaŋat umialiksraqtaaġigiga.”

² “Qanuġluŋa tainna piyumiñaqpik?” Samuel-gum apiqsruġaa. “Saul tusaagumi, tuqunniaġaaŋa!” Atanġum kiugaa, “Tuttuqpaiyaamik kaluġutin aasii ikipkaiyyaġniḷutin Ataniġmun.

³ Aiyugaaġlugu Jesse ikipkaiguvich, aasii uqallautiniaġikpiñ sutqugupkiñ. Nalunaiġñiaġiñ umialiguġlugu aŋun iliŋnun pitquraġa.”

⁴ Samuel piŋaruq Atanġum pitqutaagun aasii Bethlehem-mukłuni, tavrani nunaaqqim aullarriŋisa ullaŋagaat uullaġruaqtun aasii apiġivlugu, “Aŋuyautaiḷaakun qaivich?”

⁵ “Ii,” kiugaich. “Qairuŋa ikipkaiyyaqłuŋa Ataniġmun. Salummaġusi maliksiñŋa.” Uqallautimmigaich suli Jesse-ḷu iġñiġutiŋiḷḷu salummaquvlugich, aasii aiyugaaqługich ikipkaivigmun.

⁶ Tikiññamik, Samuel-gum tautuŋagaa Jesse-im iġñiŋa Eliab aasii inmiñun uqallakłuni, “Taamna aŋun makitaruaq Atanġum takkuani nalunaitchuamik piksraqtaaġigaa.”

⁷ Aglaan Atanġum uqallautigaa, “Qaunaginagu qanutun aŋitilaaŋalu aŋutigiksilaaŋalu. Pigisuŋitkiga, qanukkii isivġiisuitchuŋa iñuktun. Qiñiġuurut iñuum qiññaŋagun, aglaan uvaŋa Atanġuruaŋaa, qiñiġuugiga uummataagun.”

⁸ Jesse-m ququulaŋagaa iġñiñi Abinadab aasii Samuel-muutivlugu. Aglaan Samuel uqallaktuq, “Naumi, Atanġum piksraqtaaġiŋiñmigaa.”

⁹ Jesse-m qaġġisilgitkaa Shammah. “Naumi, Atanġum piksraqtaaġiŋaiñmigaa,” Samuel uqallaktuq.

¹⁰ Tainna tavra Jesse-m qaġġirruġaich tallimat malġuk iġñiñi Samuel-mun. Aasii Samuel-gum uqallautigaa, “Naumi, Atanġum nalliat unnii piksraqtaaġiŋaitkaa.”

¹¹ Tavra Samuel-gum apiqsruŋagaa, “Iġñiqavsaaqpich?” Jesse-im kiugaa, “Nukaqłiq imma, aglaan qaunaksriruq imnaiñik.” “Mauŋaquuŋ,” Samuel uqallaktuq. “Ikipkaiñiaŋitchugut mauŋaŋaunnagu.”

¹² Taimma Jesse-m qanniqsruġaa. Taamna aŋutigiksuq, surruutaitchuq nukatpiaq, suli irrak qivliaġiŋaruk. Atanġum uqallautigaa Samuel, “Tavra taamna naliġaaġigiga, niaquŋa uqsruqtiġuŋ!”

¹³ Samuel-gum piŋagaa olive uqsruŋa aasii uqsruqtiqługu David saaŋanni aniqatiiŋisa. Tavraŋŋatchiaq iḷitqusiŋata Atanġum isiŋagaa David aasii nayuqługu tavraŋŋaaglaan uvlumiñ. Tavra Samuel utiŋaruq Ramah-mun.

David Saul-gum Inaanuktuq

¹⁴ Atanġum ilitqusiġiksuaŋata uniñŋagaa Saul, aasii ilitqusiqł̣uum Ataniġmiñ qairuam nagliksaaqtinŋagaa.

¹⁵ Kivgaŋisa uqallautigaat inna, “Iḷisimarugut ilitqusiqł̣uum qaipkaqtaata God-im nagliksaaqtittaatin.

¹⁶ Tavra tilisigut, ivaġiaġniaġikput aŋun atuqtuurallaruaq nuqaqtiligmik. Tavraasii ilitqusiqł̣uk iliŋnukpan, aŋutim piuraaġniaġaa nuqaqtiligaaq atuqtuuraq, aasii nakuusitqigḷutin.”

¹⁷ Saul-gum tiliŋagai innaqłuni, “Paqitchiuŋ aŋun piuraayuqtuaq aasii qaġġisilugu uvamnun.”

¹⁸ Iḷaŋat savaktiŋisa uqallaktuq, “Jesse samma Bethlehem-miu iġñiqaqtuq atuqtuurayuqtuamik. Ilaa sivuuqqataitchuq suli aŋutigiŋmivḷuni, aŋuyaktilluataq, suli uqayuġmivḷuni. Atanġum nayuġaa.”

¹⁹ Tavraasii Saul-gum ullaktinŋagaa Jesse innaquvlugu, “Qaipkaġuŋ uvamnun iġñiġiñ David, qaunaksrauruaq imnaiñik.”

²⁰ Jesse-im David Saul-muktinŋagaa kaluqtiłługu nagruliayaamik, kakakti nanmiqł̣ugu punniġnik, suli qisiŋmik puumik siḷiviñŋaruamik wine-mik.

²¹ David-gum ullaŋagaa Saul aasii iḷḷativluni savaktiŋiññun. Saul-gum nakuaġiqpaŋagaa aasii tigumiaqtigiliutiŋagaa satkuutimiñun.

²² Tavraasii Saul-gum tuyuŋagaa Jesse inna: “David nakuaġigiga. Maaniitirruŋ uvaŋa savautiluŋa.”

²³ Tavraŋŋaaglaan, ilitqusiqł̣uum God-miñ qairuam ullatuaġmauŋ Saul, David-gum isakługu nuqaqtilik atuqtuurani piuraaġuugaa. Ilitqusiqł̣uk piiġuuruq, aasii Saul nakuusitqiguuruq.