1 Samuel 15 - Iñupiatun Mumiksat Uqalugiksuat

Aŋuyaktuat Akiḷḷiġivlugich Amalek-miut

¹ Samuel-gum uqallautigaa Saul, “Uvva uvaŋa Atanġum tiliŋagaaŋa nalunaiqsaġitquvlutin umialliutilutin iñugmiñun Israel-mun. Aasii naalaġniiñ qanuq Ataniq Sapiġñaqtuaq uqallaktilaaŋa.

² Tatavsaġniaġaich iñuŋich Amalek-gum qanukkii kiŋuniiŋisa akiḷḷiqsruŋagaich Israel-miut qaipkaqługich Egypt-miñ.

³ Aullaġusi aŋuyagiaqsigich Amalek-miut aasii suli siqumillugich suġauttapayaaŋich. Sumikunnii unitchiñasi; tuqullugich iluqaisa aŋutit, aġnat, miqłiqtut, aniqammialaallu; pamiqsaat, imnaich, pikukturuat, suli kakaktit.”

⁴ Saul-gum atautchimuktinŋagaich aŋuyaktini Telem-mi aasii qimilġuuqługich; iñugiaktigiŋarut 200,000-tun Israel-miñ aasii 10,000-tun Judah-miñ.

⁵ Tavraasii aŋuyaktiniḷu nunaŋanuŋarut Amalek-gum aasii utaqqiaqsivḷutik paliumaruami kuugum siñaani tuquttaisukłutiŋ.

⁶ Kiligiaqtinŋagaich Ken-miut, taapkua sivulliiŋisa aŋalalluataŋammagich Israel-miut Egypt-miñ qaimmata: “Aullaġitchi uniḷḷugich Amalek-miut tuqunŋitchumagivsi taputilusi taapkunuŋa.” Tavra Ken-miut aullaŋarut.

⁷ Saul-gum akiiḷiŋagaich Amalek-miut, aŋuyakługich Havilah-miñ Shur-munaglaan kivallianiittuaq Egypt-gum;

⁸ Tiguŋagaa Agag umialiŋa Amalek-gum aasii tuqułługich iluqaisa iñuich.

⁹ Aglaan Saul-gum iñuŋisalu tuqunŋaitkaat Agag suli tuqunŋiñmivḷugich nakuuniqsrat imnaiḷḷu pamiqsaallu, tuttuqpaiyaat suli imnaiyaat, allallu sut nakuuruat; siquminŋagaich allat atuġumiñaisatik naagga suksrauŋitchuat.

Atanġum Ayyakkaa Saul Umialguniġmun

¹⁰ Ataniq uqallaktuq Samuel-mun,

¹¹ “Nunuuraqtuŋa summan Saul umialiguqtinnapku, ilaan tununŋagaaŋa uvaŋa suli kamagiŋiñmivḷugich piraksriutitka.” Samuel qinnaliŋaruq, aasii unnuaqtutilaaŋatun iŋiqsruġvigiŋagaa Ataniq.

¹² Uvlaatchaurami Samuel-gum kasuġiaŋagaa Saul. Tusaavluni imma Saul Carmel-muŋnivḷugu, iñuuraqpaliuġvigmiñun qutchiksisaqłuni ilimiñun, aasii Gilgal-mugmivḷuni.

¹³ Samuel-gum ullaŋagaa Saul, aasii uqallaŋaruq Saul inna, “Atanġum quviasaaġlisiñ, Samuel! Kamagiŋagiga Atanġum piraksriutaa.”

¹⁴ Samuel-gum kiugaa, “Uvvami summan imma tusaavik pamiqsaaniglu imnaiñiglu nipattuanik?”

¹⁵ Saul-gum kiugaa, “Iñugma piraŋich Amalek-miuniñ. Iñuupkaŋagaich nakuuniqsrat imnaiḷḷu pamiqsaallu aitchuutigisukługich ikipkaġlugich Ataniġmun God-ignun, aasii allat iluqaisa tuqunŋagivut.”

¹⁶ “Atta,” Samuel-gum pigaa, “aasii uqallautiniaġikpiñ qanuq Ataniġmun uqallautitilaamnik unnuaq.” “Ki uqallautiŋŋa,” Saul uqallaktuq.

¹⁷ Samuel-gum kiugaa, “Iliŋnun nuimaruaġilutin isumaŋitkaluaqtutin, aullarraurutin maŋŋuqatigiiñun Israel-miunun. Atanġum piksraqtaaġiŋagaatin umialgutquvlutin Israel-mun,

¹⁸ aasii aullaqtiłłutin piraksriqhutin tuqutquvlugich pigiiḷḷiqirauruat iñuŋi Amalek-gum. Aŋuyaquŋagaich iliŋnun iluqaisa tuqulġataġlugich.

¹⁹ Uvvaasii summan kamagiŋitchan? Summan piksraqtuqsauraŋavich niġrutinik, aasii tavra isummaaŋił̣ł̣ugu Ataniq?”

²⁰ “Kamagiŋagiga Ataniq,” Saul-gum kiugaa. “Aullaŋaruŋa pisuutaagun, utiutivlugu umialiŋat Agag, suli tuqułługich iluqaisa Amalek-miut.

²¹ Aglaan iñugma tuqunŋiñŋagaich nakuuniqsrat imnaiḷḷu pamiqsaallu; mauŋautiŋagaich Gilgal-mun aitchuutautquvlugich ikipkaġlugich Ataniġmun God-iŋnun.”

²² Samuel uqallaktuq, “Nalliak Atanġum nakuaġiłhaaqpauŋ: kamaksriñiq naagga aitchuiñiġlu ikipkaiñiġlu? Nakuułhaaqtuq kamagiruni ilaa ikipkaiñiġmiñ aitchuutigilugu ilaanun nakuuniqsrauruaq imnaiq.

²³ Paaqłaŋŋatiqaġniq ilaanun nakuuŋisigiruq nalautchuġautikun, suli kamanniraaġutiqaġniq piḷuutautigimmiuq iñuuraqpagnun ukpiġutiqaġmatun. Suunnaġiŋił̣ł̣ugu kamagiŋiññapku Atanġum pitquraŋa, ilaan umialguniġiñ suuŋiḷaġigaa.”

²⁴ “Ii, piḷuusiqiŋaruŋa,” Saul-gum kiugaa. “Kamagiŋaitkiga Atanġum pitquraŋa ilviḷḷu iḷisaurrutitin. Iqsigiŋagitka iñutka tavraasii pisuutaat kamagivlugu.

²⁵ Aglaan akkupak apiġigikpiñ, suliqutigiŋaikkich piḷuutitka aasii utiqasiġḷuŋa, nanġallasaġiga Ataniq.”

²⁶ “Utiqasiġñiaŋitkikpiñ,” Samuel-gum kiugaa. “Kamagiŋiñŋagiñ Atanġum pitquraŋa, tavraasii Ilaan qaukłiutquŋaiġaatin Israel-mun.”

²⁷ Tavra Samuel tunułłuni aullaqsaŋaruq, aglaan Saul-gum tiguŋagaa qaliġuaŋa, aasii aliŋaruq.

²⁸ Samuel-gum uqallautiŋagaa, “Atanġum piiŋagaa umialgutaa Israel-gum iliŋniñ uvlupak aasii qaił̣ł̣ugu allamun iñulluataułhaaqtuamun iliŋniñ.

²⁹ Israel-gum kamanapiallaktuaq God-iŋa saglusuitchuq naagga isumalitqiyuitchuq. Iñugruiññauŋitchuq—isumalitqiyuitchuq.”

³⁰ “Piḷuusiqiŋaruŋa,” Saul-gum kiugaa, “Aglaan qiksigiruatun uvaŋa aŋalanŋa sivuġaanni aullarrigma suli Israel iñupayaaŋisa. Utiqasiŋŋa nanġallayumagiga Ataniq God-in.”

³¹ Tavraasii Samuel-gum utiqasiŋagaa, aasii Saul-gum nanġaŋagaa Ataniq.

³² “Qaġġisuutisiuŋ Umialik Agag uvamnun,” Samuel tilisiŋaruq. Agag-gum ullaŋagaa, uullaġruaqtun iqsivaił̣ł̣uni, inna isumavluni, “Qanutun piḷuktigiva tuqqun!”

³³ Samuel uqallaktuq, “Savikpakpich iñugiaktuat aakauruat miqłiqtuiŋagaich, tavraliasii ilvich aakan miqłiqtuiġñiaġmiuq.” Aasii avgusugruŋagaa timaa Agag-gum saaŋani ikipkaivium Gilgal-mi.

³⁴ Tavra Samuel Ramah-muŋaruq, aasiiḷi Umialik Saul aiŋaruq Gibeah-mun.

³⁵ Iñuuniqtutilaamisun Samuel-gum taututqiŋaitkaa Umialik Saul; aglaan qiñuuŋaruq pisigivlugu. Ataniq isumaaliŋaruq summan Saul umialiguqtinŋatilaaŋanik Israel-mun.