1 Samuel 13 - Iñupiatun Mumiksat Uqalugiksuat

Aŋuyagmatigik Philistia-ġmiuguruat

¹ Saul umialiguġami ukiuqaŋaruq [iñuiññaq qulitun (30)]; aasii Israel-mun umialguŋaruq [malġukipiaq malġuktun (42)] ukiuni.

² Saul iñuksraŋaruq 3,000-guruanik, inmiñiitiłługich 2,000-guruat Michmash-mi suli qimiġaŋiññi Bethel aasii 1,000-guruat aullaqtiłługich iġñiġmigun Jonathan-kun Gibeah-mun, nunaŋaniittuamun maŋŋuqaqtuat Benjamin-mik. Kisiŋŋuqtauruat aasii Saul-gum aipkaŋagaich.

³ Jonathan-gum tuqunŋagaa Philistia-ġmiut aŋuyaktiŋisa umialiŋat Geba-mi, aasii Philistia-ġmiuguruat tusaaŋarut taaptumiŋa. Tavraasii Saul aullaqtitchiŋaruq kiliktuiriñik nipauqłuktaquvlugich Hebrew-ġmiupayaat aŋuyagiaquvlugich iluqaani nunami.

⁴ Israel-miupayaat tusaaŋarut Saul-mun tuqunnivḷugu Philistia-ġmiut aŋuyaktiŋisa umialiŋat suli Philistia-ġmiuguruanun uumiginivḷugich. Tavraasii iñuich ullaŋagaat Saul Gilgal-mi.

⁵ Philistia-ġmiut katinŋarut aŋuyagukługich Israel-miut; 30,000-tun iñugiaktigiruanik aksraktuuraqaŋarut, 6,000-nik aŋuyaktinik tuttuqpaġaqtuanik aasii suli allavsaanik aŋuyaktinik iñugiaktigiruanik qaviaŋatun taġium siñaata. Michmash-muŋarut, qavanitchianiittuam Bethaven-gum aasii nullaqłutik tavruŋa.

⁶ Tavraasii aŋuyarraqsiŋagaich Israel-miut, qanuqsausiiqtitaallaisa. Iḷaŋich Israel-miut iriġaqtuŋarut qaiġusugnullu, nivagniġnullu, akunniŋiññullu uyaġaich, suli itiqsranun naagga nivvianun;

⁷ allat ikaaŋagaat Kuuk Jordan nunaŋiññun Gad-gumlu Gilead-gumlu. Saul Gilgal-miinŋaruqsuli, aasii iñuich tavraniitqatiŋich uulillaŋarut iqsivaił̣ł̣utik.

⁸ Utaqqiŋagaa Samuel tallimat malġugni uvluni, tainna Samuel-gum pitquŋammani, aglaan Samuel qaiŋaitchuq Gilgal-mun. Iñuich uniñagutiŋagaat Saul;

⁹ aasii uqallautiŋagaich inna, “Qaġġisuurrisitchi ikipkaġlugich aitchuutiksranik suli iluaqtuakun iḷagiigñiġmik sivuniqaġlugich aitchuutiksranik.” Ikipkautinik aitchuiŋaruq,

¹⁰ aasii tavra naatchiaqsimmiuġlu Samuel tikiñŋaruq. Saul-gum anivḷuni paaŋagaa aasii paġlavlugu,

¹¹ aglaan Samuel uqallaŋaruq, “Suruatin imña?” Saul-gum kiugaa, “Iñuich uniñagutiraanni, suli qaiŋiñmivḷutin qaiviksrautikkaluakkun; aasii suli amma Philistia-ġmiut katinmiut Michmash-mun.

¹² Tavraasii isumaruŋa inna, ‘Philistia-ġmiut amma aŋuyagiaġniaġaanŋa uvuŋa Gilgal-mun, ikayuqtisiuŋaiñmiruaŋa Ataniġmiñ.’ Tavraasii aitchuiruksraunasugivluŋa ikipkairuŋa.”

¹³ “Isumalluaġiitchutin uvva,” Samuel-gum kiugaa. “Ilvich kamagiŋaitkiñ pitquraq qaitchaŋa Atanġum God-ikpich. Kamagiŋagupku, ilaan aullarriġuqtinnayaġaasi ilviḷḷu kiŋuniisiḷu Israel-mun isuitchuamik.

¹⁴ Aglaan uvva umialgutin iglauŋaiġniaqtuq. Qanukkii kamagiŋitkapku Ataniq paqinniaqtuq iviġaumagiramiñik iñugmik aasii aullarriġuġlugu iñugmiñun.”

¹⁵ Samuel aullaŋaruq Gilgal-miñ. Iluqaġmik iñuich maliŋagaat Saul aŋuyaktini ullagmagich. Gilgal-miñ Gibeah-muŋarut nunaŋaniittuamun Benjamin. Saul-gum qanuġitilaaŋagaich aŋuyaktini 600-tun iñugiaktigiruat.

¹⁶ Saul-lu, iġñiniḷu Jonathan, iñutiglu inillaŋarut Geba-mun nunaŋani Benjamin; Philistia-ġmiut inillaŋarulli Michmash-mun.

¹⁷ Philistia-ġmiuguruat aŋuyaktit aullaqłutik aŋuyagiaqtaŋarut piŋasuułłutik: sivulliich aullaŋarut tuŋaaġivlugu Ophrah Shual-miittuaq,

¹⁸ tugliiŋiḷḷi aullaŋarut tuŋaaġivlugu Beth Horon, aasiiḷi piŋayuuŋich killiŋanuŋarut Zeboim Valley-m qulaaniittuaq nunagluktuam.

¹⁹ Savił̣haliqiraiñŋaruq Israel-mi qanukkii Philistia-ġmiut sivunniŋarut Hebrew-guruat savikpaliuquŋił̣ł̣ugich naaggaunnii nauligaliuquŋił̣ł̣ugich.

²⁰ (Israel-miuguruat Philistia-ġmiunuktuksrauŋarut nunaliqutitiglu, sikł̣atiglu, anauttatiglu, kivriññatiglu ipiksaqtitchaqtuqł̣ugich;

²¹ akiŋat atausiq maniuraq ipiksaġmarruŋ sikł̣aq suli iluaqsruġmarruŋ tuggauraq, aasiisuli malġuk maniurak ipiksaġmatigik nunaliqutit.)

²² Tavraasii aŋuyagniaġmata tavrani uvlumi nalliat unnii Israel-miut aŋuyaktit savikpaqaŋaitchut naaggaunnii nauligaqaŋaitchut; kisimik Saul-lu iġñiniḷu Jonathan.

²³ Philistia-ġmiut aullaqtitchiŋarut aŋuyaktinik munaġitquvlugu Michmash Iglauyaaq.