1 Samuel 12 - Iñupiatun Mumiksat Uqalugiksuat

Samuel-gum Uqautigaich Iñuich

¹ Tavraasii Samuel-gum uqallautigaich iluqaisa iñuŋich Israel, “Apiqqutigiraqsi tavra piŋagiga. Aitchuŋagivsi umialigmik aullarriksravsiññik,

² aasii tavra aullarriginiaġiksi. Aasii uvaŋa utuqqaliruŋa suli nutchatka qirġiqviiñaurut, suli iġñiġutitka ilivsiññun nayuutirut. Aullatiŋagivsi nutaġauraunimniñ paŋmamun aglaan.

³ Uvva uvaŋa. Sumik killukuaqtaŋaguma, akkupak pasiuqsiñŋa sivuġaagni Atanġuvlu umialiksraqtaaŋatalu. Piksraqtaaġiŋavigu iñuum immulivia naagga kakaktiŋa? Saglutaŋavigu naagga nagliksaaqtinŋavigu iñuk? Uqayutauŋavik iñugmun? Nalliat taapkua piŋamagupku, utiqtitchiñiaqtuŋa.”

⁴ Iñuich kiuŋagaat, “Naumi, saglutaŋaitkivsigut naagga nagliksaaqtilluta; kimiñ unnii sumik piŋaitchutin.”

⁵ Samuel-gum kiugaich, “Ataniġlu umialiksraqtaaŋalu iḷisimarauruk uvlupak ilivsi sumik killukuaŋaiññigavsiñŋa.” “Aaŋ, Ataniq qiñiqtigigikput,” iliŋisa kiugaat.

⁶ Samuel uqavsaaqtuq inna, “Atanġum ilaan piksraqtaaġiŋagaik Moses-lu Aaron-lu suli maŋŋuuvsi annautivlugich Egypt-miñ.

⁷ Makitavivsiññiñ aulanasi, aasii uvaŋa uqautiñiaġivsi sivuġaani Atanġum itqaqtillusi iluqaiññik nalaunŋaruanik savaaŋiññik Atanġum ilivsiññullu maŋŋuuvsiññullu.

⁸ Jacob-lu iḷaniḷu Egypt-mugmata aasii Egypt-miut nagliksaaqtinmatigich maŋŋuusi aŋaiyyuuŋarut Ataniġmun ikayuquvlutik, aasii ilaan qaipkaŋagaik Moses-lu Aaron-lu, aasii annautipkaqługich Egypt-miñ suli inillaktiłługich mauŋa nunamun.

⁹ Aglaan iñuich piiguŋagaat Ataniq God-iktik; aasii God-im ilaan akiiḷipkaŋagaich Philistia-ġmiuniḷḷu suli umialiŋaniḷḷu Moab-miut, suli Siseramiḷḷu, qaukłiġiraat aŋuyaktiŋisa nunaaqqimi Hazor-m.

¹⁰ Tavraasii aŋaiyyuŋarut Ataniġmun ikayuquvlutik inna, ‘Piḷuksiŋarugut qanukkii tununŋagivsigiñ, Ataniiq, aasii aŋaiyyuvigivlugich iñuuraqpaŋik Baal-lu Astarte-mlu. Annautisigut akiḷḷiptigniñ, aasii ilvich aŋaiyyuviginiaġivsigiñ.’

¹¹ Aasii Atanġum qaipkaŋagaich Gideon-lu Barak-lu Jephthah-lu uvaŋaasii aqulliuvluŋa. Atanġum annautikasakkaasi akiḷḷiivsiññiñ, aasii iñuuvlusi piyuaqtaił̣ł̣usi.

¹² Aglaan iḷitchuġikavsi Umialik Nahash-gum Ammon-miu aŋuyaaqsimammasi, pisunġiŋalgitkiksi Ataniq umialiksi aasii uqallautivluŋa inna, ‘Umialiqaġuktugut aullarriksraptignik.’

¹³ “Uvvaasii umialiksraqtaaqsi; pigisuŋagiksi, aasii tavra Atanġum qaiñŋagaa ilivsiññun.

¹⁴ Sunaliqaa iluaġniaqtuq suuŋiḷaġiŋitkuvsiuŋ Ataniq God-iksi, savautilugu, naalaġniḷugu, suli kamagilugich pitquraŋich. Aasii ilivsiḷu umialivsiḷu maliġuaġuvsiuŋ nakuuniaqtuq.

¹⁵ Aglaan naalaġniŋitkuvsiuŋ Ataniq aasii kamagiŋiḷḷugich pitquraŋich, ilaan akiḷḷiqsruġniaġaasi ilivsiḷu umialiksiḷu.

¹⁶ Tavraasii, aulanasi aasii qiñiġniaġisi aliuġnaqtuat savagniaqtaŋich Atanġum.

¹⁷ Paliumaruq nuna pagmapak, amii? Aglaan aŋaiyyuniaqtuŋa, aasii Ataniq qaipkaiñiaqtuq kallugmiglu sialugmiglu. Taamna nalautpan, iḷitchuġiniaqtusi nalaunŋaisilaavsiññik Ataniq apiġigavsiuŋ umialiqaġukłusi.”

¹⁸ Tavraasii Samuel aŋaiyyuŋaruq, aasii tavrani uvlumi Atanġum kalluktinŋagaa sialuktiłługulu. Aasii iluqaġmik iñuich iqsigiliŋagaik Ataniġlu Samuel-lu,

¹⁹ aasii uqallautiŋagaat Samuel inna, “Iŋiqsruqtugut, aŋutii, aŋaiyyutisigut Ataniġmun God-ignun tuquŋitchumaugut. Akkupak iḷitchuġirugut, avataatigun allat piḷuusiqiapta, piḷuusiqimammiugut suli apiqsrikapta umialiqaġukłuta.”

²⁰ “Iqsiñasi,” Samuel-gum kiugaich. “Piḷukpaktuamik pigaluaŋŋavsi tununnasiuŋ Ataniq, aglaan savautisiuŋ iluqaaġlugu uummativsiññiñ.

²¹ Saannasi god-iŋŋuanun; ikayuġumiñaitkaasi naaggaunnii annautilusi, qanukkii anniqsuisuitchut.

²² Atanġum pisigivlugu kamanaqtuaq atqa, ilaan suksraaġumiñaitkai iñuni, qanukkii Atanġum iviġaumagigaasi iñugisukłusi.

²³ Uvaŋaliasii, Atanġum piḷuksitquŋitkaaŋa ilivsi aŋaiyyutiŋaiquŋił̣ł̣usi. Aglaan uvva, iḷisautiniaġivsi nakuuruamik suli iluaqtuamik piraksravsiññik.

²⁴ Kamagisiuŋ Ataniq suli savautilugu aġiuraġaŋaiġusi iluqaanik uummativsiññik. Itqaumalugich kamanaqtuat ilaan ilivsiññun savaaŋich.

²⁵ Aglaan piḷuusiqiŋaiŋitkuvsi, ilivsiḷu umialiksiḷu suksraunġiqsauniaqtusi.”