1 Samuel 11 - Iñupiatun Mumiksat Uqalugiksuat

Saul-gum Akiiḷigaich Ammon-miut

¹ Tatqiq qaaŋianikpalliġman Umialgum Nahash-gum Ammon-mium aullatiŋagaich aŋuyaktini aŋuyagiaqługu nunaaqqiq Jabesh Gilead-miittuaq aasii avałługich. Aŋutiŋisa Jabesh uqallautiŋagaat Nahash inna, “Sivunniuqatigisigut, aasii uvagut aullarriksraqtaaġiniaġivsigiñ.”

² Nahash-gum kiugaich, “Sivunniuqatiginiaġivsi kisian una iviġaumagiguvsiuŋ; iluqavsi iraiġñiaġivsi taliqpiḷḷaavsiññik kanŋusaaqsaġlugu iluqaan Israel.”

³ Aullarriŋich Jabesh-gum uqallaktut, “Tallimat malġugnik uvlunik piviqaqtitchigut kiliksiviksraqaqtilluta iluġaani nunaŋani Israel. Aasii ikayuġniaŋisimappatigut kiaunnii, tavra ilivsiññun qaiññiaqtugut.”

⁴ Kiliktuiruat tikiñŋarut Gibeah-mun, Saul iñuuniaġvianun, aasii kiligmatigi, iñuich qianagutiŋarut tutqiiḷivḷutik.

⁵ Uvva Saul-lu qimuktiniḷu tikitpaallugmiullu nauriaqaġvigmiñ, aasii apiqsriŋaruq inna, “Suvisi? Summan iñuich qiavat?” Uqallautiŋagaat qanuq Jabesh-miñ qairuat uqaqtilaaŋiññik.

⁶ Saul-gum tusaagamiuŋ uqaluat, Iḷitqusiata God-im immiviñaŋagaa, aasii qinnalipiaġataŋaruq.

⁷ Ilaan tiguŋagaik malġuk qimuktik, piḷakługik avguŋagaik, aasii tigumirriḷḷaavlugich kiliktuirit aullaqtinŋagaich sumulliqaa uqaluksrił̣ł̣ugich uumiŋa: “Kialiqaa maliġuaŋitpagik Saul-lu Samuel-lu aŋuyagiaqpagnik, qimuktiŋich tainnaptauq siqumitauniaqtut!” Iñuŋich Israel sivuuġaŋarut Ataniġmun suniaqtilaamignik, aasii iluqapayauraġmik saavinŋarut atautchikun.

⁸ Saul-gum katinŋagaich Bezek-mun: 300,000-tun iñugiaktigiruat Israel-miñ suli 30,000-tun Judah-miñ.

⁹ Uqallautiŋagaich kiliktuiriŋich Jabesh inna, “Uqallautisaġisi iñusi uvlaaku qitiġusiġñaqsiŋaiñŋaan annaurrauniaqtut.” Tusaagamik iñuŋich Jabesh-gum quviasukpaŋarut

¹⁰ aasii uqallautivlugu Nahash inna, “Uvlaaku ilivsiññun qaiññiaqtugut, aasii susupayaaġuvsigut pisuutivsigun piyumiñaqtusi.”

¹¹ Tavrani uvlaakumman Saul-gum ilaaguaŋagaich aŋuyaktini piŋasuułługich, aasii uvlaatchaurami akiḷḷiitik Ammon-miut nullaġviŋannuŋarut aŋuyagiaqługich. Qitiġusiġñaqsimmiuġlu akiiḷiŋagaich. Annaktuat siaminŋarut, atausiullaavlutik.

¹² Tavraasii iñuŋisa Israel uqallautiŋagaat Samuel, “Nauŋ ipkua iñuich uqaqtuat Saul umialigisuŋił̣ł̣ugu? Qaitchigit uvaptinnun tuqutchumagivut!”

¹³ Aglaan Saul uqallaktuq, “Kiñaunnii tuqutauniaŋitchuq uvlupak, qanuq uvva uvlupak Atanġum annautiŋagaa Israel.”

¹⁴ Aasii Samuel-gum uqallautigaich, “Iluqata Gilgal-mukta aasii nalunaivsaaġlugu Saul uvaptignun umialiguqlugu.”

¹⁵ Tavraasii iluqatik Gilgal-muŋarut, aasii tavrani God-im sivuġaani nalunaiŋagaat Saul umialiguqługu. Aitchuiŋarut ikipkautinik aitchuutinik sivuniqaqtuanik iḷammiuġnikun, aasii Saul-lu iluqatiglu iñuŋich Israel quviasugvigiŋagaat uvluq.