1 Samuel 10 - Iñupiatun Mumiksat Uqalugiksuat

¹ Tavraasii Samuel-gum tiguŋagaa misuġuqtuun imalik olive uqsruŋanik aasii kuvivḷugu Saul-gum niaquanun, kunikł̣ugu aasii uqallakłuni, “Atanġum piksraqtaaġigaatin aullarrautquvlutin iñugmiñun Israel-miuguruanun. Aullatiniaġitin iñugiraŋich suli pitchaiḷiḷugich akiḷḷiiŋiññun. Aasiuvva nalunaiñŋutaq iliŋnun Ataniġmun ilvich piksraqtaaġitilaaġnik aullarrautquvlutin iñugmiñun:

² Unitkumŋa uvlupak, kasuġniaġikkiñ malġuk iññuk qaniŋani Rachel-gum iḷuviŋata Zelzah-miittuam nunaŋani Benjamin. Uqallautiniaġaatin iliŋisa taipkua kakaktit ivaqtatin paqinŋaniḷugich, suli aapakpich isumaalugiŋaiŋagaich aglaan ilvich isumaalugigaatin, suli apiqsruqtuiruq inna, ‘Suniaqpik uvaŋa iġñipkun?’

³ Igliġniaqtutin suli tavraŋŋa tikiḷġataġutin napaaqtuqpagmun Tabor-miittuamun, tavrani kasuġniaġitin piŋasut aŋutit aitchuiyyaqsaqtuat ikipkaiḷutik God-mun Bethel-mi. Iḷaŋat aullarriñiaqtuq piŋasunik nutaġauranik nagrulignik, iḷaŋalli tigumiaġniaqtuq piŋasunik punniġnik, aasiiḷi piŋayuat tigumiaġniaġmiuq qisigmik puumik imaligmik wine-mik.

⁴ Paġlaniaġaatin aasii aitchuġlutin malġugnik punniigñik, akuqtuqtaksraġigikkiñ.

⁵ Tavraasii aullaġnialgitchutin Qimiġaŋanun God-im Gibeah-mi, Philistia-ġmiut aŋuyaktiŋisa nullaġviannun. Paaŋani taavsruma nunaaqqim kasuġniaġisi God-im uqaqtiŋi atqaqtuat ikipkaivigmiñ qimiġami, atuqtuuraġutik nuqaqtilignik, qiḷautinik, suvluaqtuġnanik, suli lyres-nik. Kanaakkiuniaqtut nipaalalutiglu.

⁶ Tavraŋŋatchiaq iḷitqusiata Atanġum aŋalanagutiniaġaatin, aasii kanaakkiuqasiġñiaġitillu nipaallaqpaqasiġḷugilu suli allatun iñuktun iḷiñiaqtutin.

⁷ Tamatkua salapqiqpata, supayaamik savagukkuviñ savaksaqtutin qanuq God-im itqatigigaatin.

⁸ Sivupkun Gilgal-mugniaqtutin, tavrani kasuġniaġikpiñ aasii aitchuiñiaqtuŋa ikipkaiḷuŋa allatigullu iḷammiuġutikun aitchuutauruat. Tavrani utaqqisaqtutin tallimat malġugni uvluni qaiḷġataqtilluŋa aasii uqallautiniaġikpiñ suraksraġnik.”

⁹ Saul-gum unitchaġmauŋ Samuel, God-im allaŋŋuŋagaa iñuusia Saul-gum. Aasii suli Samuel-gum nalautinniaġnikkaŋi taŋŋiŋarut tavrani uvlumi.

¹⁰ Saul-lu kivganiḷu tikiñmagnik Gibeah-mun, qavsit samma God-im uqaqtiŋisa kasuŋagaat. Tavraŋŋatchiaq Iḷitqusiata God-im aŋalanagutiŋagaa, aasii iḷḷatiŋaruq kanaakkiuruanun nipaallatigillaan.

¹¹ Iñuich iḷisimariŋisa sivuani qiñiŋagaat tainnaqtuaq aasii avanmun apiqsruutiŋarut inna, “Uvvauna sumava iġñiŋa Kish-gum? Uvvauna Saul God-mun uqaqtiġuqpa?”

¹² Tamaaniittuaq aŋun apiqsriŋaruq, “Aasii makkua allat God-im uqaqtiŋi kitkunnik aapaqaqpat?” Tainna tavra una uqaluk isagutiŋaruaq, “Tavrauna Saul unnii God-mun uqaqtiġuqpa?”

¹³ Saul kanaakiuganikkamiḷu nipaalaqpaanikkamiḷu, ikipkaivigmuŋaruq qimiqqamiittuamun.

¹⁴ Saul-gum aŋaaluata tautukkamigik kivgaŋalu, apiqsruŋagaik, “Sumiittuasik imña?” “Ivaqtavuk kakaktit,” Saul-gum kiuŋagaa. “Paqinŋiññaptigik Samuel tautugiaqtaqpuk.”

¹⁵ “Aasii qanuqpasik?” Saul-gum aŋaaluata apiqsruġaik.

¹⁶ “Niġrutit paqinŋaniraŋich,” Saul-gum kiugaa aglaan uqallautiŋaitkaa aŋaaluni Samuel-gum uqallausianik umialiguġniaġniḷuni.

Saul Umialiguqtitkaat

¹⁷ Samuel-gum atautchimuktinŋagaich iñuich aŋaiyyutquvlugich Ataniġmun Mizpah-mi

¹⁸ aasii uqallautivlugich, “Ataniq, God-iŋa Israel, uqallaktuaq, ‘Egypt-miñ aullautiŋagivsi suli annautivlusi Egypt-miuniḷḷu allaniḷḷu iñugniñ piyuaqtivsiññiñ.

¹⁹ Uvaŋa God-igigivsiñŋa, annaurriksi iluiḷḷiuġutipayaavsiññiḷḷu siġġaqutivsiññiḷḷu, aglaan uvlupak pigisuŋitkivsiñŋa suli apiqsrirusi qaukłiksravsiññik. Tainna pisugniqsusi, katittitchi saaŋani Atanġum maŋŋuġiillaaguruasii iḷagiiktuasiḷu.’”

²⁰ Tavraasii Samuel-gum saavitillaaŋagaich maŋŋuġiich, aasii Atanġum piksraqtaaġiŋagaich maŋŋuŋi Benjamin-gum.

²¹ Tavraasii Samuel-gum saavitilgitkaich aŋayuqaaġiiḷḷaat maŋŋuuruat Benjamin-mun, aasii Matri-m nanmiñiq iḷaŋich iliŋikkuaŋagaich. Tavrasuli aŋutit taapkunaŋŋa saavinmiut; aasii Saul iġñiŋa Kish-gum piksraqtaaguŋaruq. Ivaŋagaluaġaat aglaan paqinŋiññamirruŋ,

²² apiqsruŋagaat Ataniq inna, “Imma qaiganikpa?” Atanġum kiuŋagaich, “Saul ikka ikaniittuq, iriqsimaruq tunuanni suġauttat.”

²³ Tavraasii aqpamik aiŋagaat Saul akunġannuktiłługu iñuich, aasii qiñiŋagaat aŋiłhaaqtuq isigagniqtutilaatun iluqaiññiñ.

²⁴ Samuel uqallaŋaruq iñugnun inna, “Uvva aŋun Atanġum piksraqtaaŋa! Allamik piitchuq ilaatun ittuamik akunnaptinni.” Iluqaġmik iñuich saqłaŋarut inna, “Iñuuniqtuli umialik!”

²⁵ Samuel-gum uqallautiŋagaich iñuich piḷḷaniaqtaŋiḷḷu savaaksraŋiḷḷu umialgum, aasii suli aglakługich makpiġaanun, iḷivlugiasii salumaruamun inimun. Aasii aipkaqługich iñuich iluġaisa.

²⁶ Saul-tauq aiŋammiuq Gibeah-mun. Suaŋaruat aŋutit aŋuyaktit uummatiŋich aksiktauruat God-mun maliŋagaat.

²⁷ Aglaan pigiiḷḷiqirauruat inna uqallaŋarut, “Qanuġuniuma taavsruma iñuum ikayuġniaqpatigut?” Suuŋiḷaġiŋagaat Saul suli qaġirriŋaitchut aitchuutinik ilaanun. Aglaan Saul nipaisaaŋaruq.