1 Peter 5 - Iñupiatun Mumiksat Uqalugiksuat

God-im Imnaiŋi

¹ Aasii paŋmapak, siḷġiqsuġniaġitka umialiŋnat, uvaŋaptauq umialiŋnauvluŋa, qiñiŋavlugu Christ nagliksaaġman aasii quliaqtuaġivlugu, piqatauyumaaqłuŋa kamanautaanun niptaġumaaqtuamun.

² Siḷġiqsuġivsi qaunagitquvlugich God-im iñuŋi munaqsraġikkasi, piḷusi imnaiḷiqiritun qaunaksriḷḷuataqtuatun imnaimiñik. Qaunagisigik taqiŋaŋaiġḷusi piyummatigilugu, God-im pitqutaatun ilivsiññun. Qaunagisigik pisigiłhaaġlugu piyummatiqaġniqsi, akiḷiusiaksranik piqutiqaġniġmiñ.

³ Atanniqsimaniatagnagich taluqsralliaġilugich iñuich qaunagiraksriusiasi, aglaan tuvraaksriqsigik iñuuniaġutchimik tuvraġumiñakkaŋannik.

⁴ Atanġum niptaġumi, qaukłiatiktun imnaiḷiqirit ittuam ilivsiññun, ilaan akiḷiġñiaġaasi akimaruaq niaquġunmik akiññaktuatun, piqatauyumiñaqsiḷusi isuitchuami qaumaniġmiñi.

⁵ Tainnatuttauq siḷġiqsuġlavsi ilivsi nukatpiat. Kamakkutiqaġitchi utuqqanaanun. Iluqasi kamasaaŋaiġḷusi ikayuutisitchi avanmun, qanuq Bible uqaluqaqtut inna, “God-im akiḷḷiḷiqsuġai kamasaaqtuaguruat, aglaan ikayuqsimaaġai iñuich kamasaaŋitchuat.”

⁶ Kamanaiġitchi ilivsiññi God-mun aŋalatchumiñaqsiḷugich iñuutchisi ilaan suaŋŋanmigun, aasii ilaan kamanaqsipkaġniaġaasi nalautitpan piviksraq.

⁷ Uqauttusiuŋ God uŋiarrisigikkavsiññik aasii tutqiksiḷusi, qanuq ilaan qaunaksraġigaasi.

⁸ Aŋalalluataġitchi ilivsiññik. Nipuŋaitchitchi. Qanuq akiḷḷiqsi Tuunġaq ataramik ukpiġutaiqsitchiñiaqtuq ilivsiññik, iqsiñaqtuatun ugiallavluni lion-tun kukiḷuktuatun sumulliqaa niqiksraqsiuqłuni.

⁹ Akiḷḷiḷiqsuqsiuŋ ukpiġutiqaqtuiññaġlusi suaŋaruamik, qanuq iḷisimarusi ukpiqtuaguqatisi nunami iluqaani nagliksaaġmiuttauq ilivsisun.

¹⁰ Aasii nagliksaaqtuallaanikkuvsi sivikitchuamik, God-im nagliktauqpaktuam qaitquriŋaruavlu ilivsiññik piqatautquvlusi ilaan isuitchuamun kamanaunmiñun atausiŋŋuqatigiŋakavsiuŋ Christ, naamasiñiaġaa ukpiġurri, nalupqisuutiqaġumiñaiġḷusi, maliksuyyataiġḷusiḷu.

¹¹ God isuitchuamun iluqaanik suaŋŋatiqaqtuaguruq. Amen.

Paġlasuiqsaaġutit

¹² Tuyuġivsi ukuniŋa naitchuanik tuyuutinik ikayuqtiqaqłuŋa Silvanus-mik, ukpiġnaqtuaġikkamnik aniqanmik. Qapiŋaisaaġukkivsi uqallautilusiḷu tamanna tusaayugaaġiksuaq God-im iḷumutun nagliktuiñiqpautigigaa iñuŋnik. Ukpiġikavsiuŋ tuniqsimavigisiuŋ.

¹³ Aŋaiyyuliqiruaguqativsi Babylon-mi God-im iñuksraqtaaŋisaptauq paġlammigaasi, iġñiġimmatullu itaġma Mark-gum.

¹⁴ Ukpiqtuat paġlatikaaŋannik paġlatiraġutitchi Christ-miuguruat piviuttaqqutaannik. Tutqiutiqaġitchi iluqasi atausiŋŋuqatauŋaruasii Christ-mun.