1 Peter 4 - Iñupiatun Mumiksat Uqalugiksuat

Iñuusatqiksuat Iñuich

¹ Tavra Christ nagliksaaqtuksrauŋamman timimiñi nalaunŋarualiqiniq pisigivlugu, ilaatun ilivsi isumaqaqtuksraummiusi, aasii itqanaiḷḷusi nagliksaaġutigiraksraġuqpan nalaunŋarualiqiniq. Kiñaliqaa nagliksaaġumi tainnatun tasamma piḷuusiqiuraaŋaiqsuq,

² aglaan aŋalatitaaliqsuq God-mun iñuuniqtutilaamisun, nunami aŋalatinŋaiqł̣uni piḷuksisuguuruamun iñuutchimiñun.

³ Qaŋauvlugu qaaŋianiktuami aptatigianiŋagisi atuqługich ukpiŋaitchuat piḷḷatukkaŋich. Atuġuuŋagaluakkaqsi piviksraqsi qanusipayaakun pitquraiḷaġnikun, allatuqłusi, imiŋasivḷusi, pialapiaġataġniġmi taaŋŋaqłutiŋ aliasuŋitchuani, suli pivḷugich piḷuusiqutiŋich tamatkua aŋaiyyusuuruat iñuuraqpaŋnun.

⁴ Aasii paŋmapak ukpiŋaitchuat allasuktut iḷaliqsuutiŋaiqavsi ilimiŋnun pialapiaġataġniġmi, suurimmaanġiqł̣uniḷu iñuuniaġniġmi, aasii pisaaŋaaqsivḷusi.

⁵ Taamna pisigilugu inmiŋnik uqaġiruksrauniaqtut God-mun isivġiisałhiñaaġuŋaruamun iñuuruanik tuquŋaruaniglu.

⁶ Summan tusaayugaaġiksuaq alġaqsruutauŋava iñuuŋŋaisa paŋmapak tuquŋaruat? Alġaqsruutauŋaruq iñuuyumiñaquvlugich ilitqutchimiŋni God-itun iñuuruatun, isivġiqsauŋagaluaŋŋaġmiŋ iñupayaatuttauq isivġiqsauruatun iñuuŋŋaġmiŋ nunami.

Aŋalatchiḷḷuataqtuat God-im Aitchuutiŋiñik

⁷ Isuksraŋat supayaat qalliruq. Ilivsiññik aŋalalluataġitchi nipuŋaiḷḷusi aŋaiyyuyumiñaġumausi.

⁸ Naumaniqsrauruaq uvva, piviuttaqqutipiaġitchi avanmun qanuq piviuttaqqutiruni avanmun nalunaiqsimałhaiññaġnaitchut iluqaisa naġġunautit avanmun.

⁹ Tukkuliqsuutisitchi avanmun uqaallatigiŋaiġḷugu.

¹⁰ Iñullaam atuġligich inmigun aitchuusiallaani God-miñ ikayuutigisaġlugich allanun iñuŋnun. Tainna pigumi, aŋalatchiriḷḷuatauniaqtuq allakaaġiiñik God-im aitchuutiŋiñik inmiñun.

¹¹ Kiñaliqaa alġaqsruiruaq alġaqsruutiqaqtuksrauruq God-im uqaluanik. Kiñaliqaa savaurriruaq God-mik suaŋŋasiqsuqtiqaqtuksrauruq God-mik iluqaani, God nanġaqtauyumauq Jesus Christ-kun. Christ-tuq kamanaqsipkaqtauli nanġaqtauluniḷu isuitchuamun. Amen.

Nagliksaaġniq Ukpiqtuaguvluni

¹² Piviuttaġirauruasii, ukpiġurri uuktuaqtaumman nagliksaaqtitauvlusi, tupautiginagu isumavsiññi allayuaġilugu taamna piruaq ilivsiññun.

¹³ Aglaan quviasuksiññaġitchi piqasiutiniḷusi Christ-mun nagliksaaġutiŋigun, taimanigu quviasupiaġataġumausi Christ niptaqpan qaumaniqaġluni.

¹⁴ Quviasugitchi pisaaŋŋasiaqaġuvsi pisigilugu ukpiqtuaguniqsi Christ-mun, qanuq tainna pikpasi, sivuniqaqtuq God-im Ilitqusiġiksuaŋa qaiŋatilaaŋanik iḷuvsiññun salapqiiḷḷaruaq ilaan qaumanġanik.

¹⁵ Aglaan nalliqsiunni nagliksaalaqsruġnani iñuaġluni, naagga tigligluni, naagga pitquranik kipuqłaiḷuni, naagga iḷaksiatiluni iñuich allat piraŋiññun.

¹⁶ Aglaattauq nagliksaaqtitauguvsi pisigilugu Christ-miuguniqsi, kanŋusuutiginagu. Quyyavigigiññaqsiuŋ God iḷisimanaqavsi Christ-mun iñugitilaavsiññik.

¹⁷ Isivġiqsausaġviksraq tikitchuq, aasii God-im nanmiñiq iñuŋi isivġiqsauqqaaqtuksraurut. Uvagut isivġiqsauqqaaġupta, qanuġlikiaq isuqaġniaqpa isivġiusiaksraŋat iñuich ukpiŋaitchuat God-im tusaayugaaġiksuaŋanik?

¹⁸ Bible uqaluqaqtut inna, “Siġġaġnaqpan iñulluatat annaurrauniksraŋat, qanuġli inniaqpa tamatkunuŋa god-aiḷaqtuanun piḷuktuanullu iñuŋnun?”

¹⁹ Tavraasii iñuich nagliksaaqtitauruat God-im pisuutaagun, nakuurualiqilich qaunagipkaġlutiŋ iñuġuqtitchiŋaruamun inmiŋnik ataramik taŋŋiisuuruamun unniqsuqłiiñmiñik.