1 Peter 3 - Iñupiatun Mumiksat Uqalugiksuat

Nuliaguruat Uiguruallu

¹ Uiqaqtuasii, kamagisigik uisi, pisigilugich uiguruat iḷaŋich ukpiġutaitpata God-im uqaluanun, iḷaanni ukpiqtitauviaqtut ilivsi iñuulluataġnivsigun, uqautiŋiḷḷuġisiunnii,

² qanuq iḷitchuġiniaqtut qanuq iñuulluataġniaġnivsiññik, qiksiksrautivsiññiglu God-mun.

³ Piññaġnaġniqsi piññaġnaqusiqsułhaaġnagu qaałhiñakun, nutchiqinivsigun naagga uyumitqurriqsuġnivsigun akisurualuŋnik, naagga annuġaaġiksuanik atukkavsiññik.

⁴ Aglaan piññaġnaġniqsi piqutiqaqtuksrauruq nakuutivsiññik iḷuvsiññi, pikałaktautairrunmik, uŋiarrisairrunmik, iḷumutun piññaġnaqsiḷiġutauruamik akisuruamiglu God-im qiññaŋani.

⁵ Tainnatuttauq piḷuutaitchuat aġnat taimani ukpiġutiqaqtuat God-mun iñuuŋammiut piññaġnaqutiqaqłutiŋ iḷumiŋni kamagivlugich uisiŋ.

⁶ Sarah-tun kamaksriruatun Abraham-mik, taivḷugu kamanamiñik. Aasii paŋmapak ilaan panigigaasi nakuurualiqiguvsi qanusipayaamik iqsiŋaiġḷusi.

⁷ Tainnatuttauq uiguruasii nalaiñ iḷiuqsigik nuliasi, puttuqsrimaugaġlusi aġnat suaŋaił̣haaqtilaaŋannik aŋutiniñ. Itqaumasitchi tuvaaqatigigisi aitchuusiaqaġnivsigun iñuggunmik isuitchuamik, tavraasii aŋalalluataqsigik aasii kiggusiaksraŋich aŋaiyyutivsi piñaiḷutaiḷḷutiŋ.

Nagliksaaġniq Nalaunŋarualiqiniq Pisigivlugu

⁸ Paŋmapak uqallautilavsi atausiullaalusi. Iñuusitchi atautchimi atilusi, saġiakkutilusi avanmun, piviuttaqqutilusi aniqatigiisun, piaqłuktautiŋiḷḷusi kamasaaŋaiġḷusiḷu avanmun.

⁹ Akisautiqaġnasi pigiitchuamik iñuŋnun pigiitchualiqiruanun ilivsiññun, naagga uqamaqłuunmik uqamaqłuurrivsiññun. Aglaan aŋaiyyutisigik God-mun ikayuqulugich aasiiḷi God-im quviasuusiġñiaġaasi. God-im ququaqamisi unniqsuqłiiŋagaasi quviasuusiaqaqtinniaġnivḷusi.

¹⁰ Aglausimaruq Bible-ni inna, “Kiñaliqaa quviasuuttaqaġuktuaq iñuggunmik, suli uvluqaġluni quvianaqtuani, uqaqtuksrauŋitchuq pigiitchuanik sagluuŋaiġḷuniḷu.

¹¹ Piḷuktualiqiruksrauŋitchuq aglaan nakuurualiqiluni. Ataramik tutqiutiqaqtitchiñiaġluni allanik iñuŋnik.

¹² Qanuq Atanġum munaġigai nalaunŋaruat, suli ataramik naalaġnigai aŋaiyyutiŋich. Aglaan akiḷḷiġigai iñuich pigiitchualiqiruat.”

¹³ Paŋmapak sum imma anniaġumiñaqpasi kipiġniuttaġiguvsiuŋ nalaunŋaruaq?

¹⁴ Aglaattauq nagliksaaġaluaġuvsi pisigilugu nalaunŋarualiqiniq, quviasaaġusiaqaġniaqtusi. Sivuuġaginagich iñuich, naaggaunnii uŋiarrisaġinagich.

¹⁵ Christ iḷumutun Atanniuttusiuŋ iḷuvsiññiñ kamagiugaġlugu. Ataramik itqanaitchitchi kiggutiksravsiññik kialiqaa apiqsruqtuqpasi annaurrauyummativsigun.

¹⁶ Kiummaġiksaaġumagisi piġuqtiŋaiġḷusi. Nalaunŋarualiqisitchi iñuich uqautigigumisi saglutigilusi pigiitchualiqiriġuġlusi kanŋutchaksiññaġumaut iḷitchuġilutiŋ nakuurualiqiavsiññik maliġuaqługu Christ tuvraaksriutaa.

¹⁷ Qanuq iłuałhaaqtuq nagliksaaġutigiruni nakuurualiqiniq piḷuusiqiniġmiñ, tainnainniqpan God-im pisuutaa.

¹⁸ Christ nagliksaaŋammiuq. Ilaa tuquŋaruq atausiaqłuni pisigivlugich iluqata piḷuusiqirinii piḷuutivut, iñuk nalaunŋaruaq pisivlugich nalaunŋaitchuat, akuqtuġnaqsisaqłuta God-mun. Ilaan timaa tuqutauŋagaluaqtuq ilitqusia iñuuruq-suli.

¹⁹ Aasii ilitqusiuvluni ilaan ullaŋagai ilitqutchich tigutaaġviŋmiittuat nagliksaaġviŋmi aasii alġaqsruqługich.

²⁰ Tamatkua ilitqutchit ilitqusiġigaich taipkua iñuich kamaksriŋaitchuat God-mik Noah umiaqpipkaqługu, God-im utaqqiŋagaluaġai isumalitqiksiaġivlugich. Aglaan iñukisuurat, tallimat piŋasut iñuich annaurrauŋarut umiaqpaŋmi ipiniksraŋanniñ uliqpaŋman.

²¹ Taamna arrilisauruq paptaiġunmun paŋmapak annaurrautigikkavsiññun God-im tatavsautiksraŋaniñ. Paptaiġutikun annaurrauŋarusi pisigisuŋaġnagu timivsi salummaġniŋa ipiġmiñ, aglaan iḷisimanaqsiŋakavsiuŋ piḷuutaiqsilaaqsi sivuġaani God-im nutaaġuqtauvlusi aŋŋisaagun Jesus Christ.

²² Aasii paŋmapak Christ qiḷaŋmiittuq aquppivḷuni kamanaqsipkaqtauruam inaani taliqpiata tuŋaani, God-im atanniqsimavlugich iluqaisa isaġulgiḷḷu, qiḷaŋmiittuallu ataniġnaqutit, suaŋŋatillu.